ਮੁੰਬਈ (ਬਿਊਰੋ)— ਜਦੋਂ ਵੀ ਗੱਲ ਭਾਰਤੀ ਸਿਨੇਮਾ ਦੀ ਆਉਂਦੀ ਹੈ ਤਾਂ ਕੁਝ ਚਿਹਰੇ ਅਜਿਹੇ ਹਨ, ਜਿਨ੍ਹਾਂ ਨੂੰ ਕਦੇ ਨਹੀਂ ਭੁਲਾਇਆ ਜਾ ਸਕਦਾ। ਮਹਿਮੂਦ ਉਨ੍ਹਾਂ ਹੀ ਚਿਹਰਿਆਂ 'ਚੋਂ ਇਕ ਹਨ।
29 ਸਤੰਬਰ 1932 ਨੂੰ ਜਨਮੇ ਮਹਿਮੂਦ ਅਲੀ ਨੂੰ ਦੁਨੀਆ ਮਸ਼ਹੂਰ ਕਾਮੇਡੀਅਨ-ਅਭਿਨੇਤਾ, ਗਾਇਕ, ਨਿਰਦੇਸ਼ਕ ਅਤੇ ਨਿਰਮਾਤਾ ਦੇ ਤੌਰ 'ਤੇ ਯਾਦ ਕਰਦੀ ਹੈ।
ਮਹਿਮੂਦ ਨੇ ਜਿਸ ਵੀ ਕਿਰਦਾਰ ਨੂੰ ਨਿਭਾਇਆ, ਉਨ੍ਹਾਂ 'ਚ ਆਪਣੇ ਜੋਸ਼ ਅਤੇ ਕਲਾ ਨਾਲ ਜਾਨ ਭਰ ਦਿੱਤੀ। ਮਹਿਮੂਦ ਦੀ ਜ਼ਿੰਦਗੀ ਨਾਲ ਜੁੜੀਆਂ ਕਈ ਅਜਿਹੀਆਂ ਗੱਲਾਂ ਹਨ, ਜਿਨ੍ਹਾਂ ਨੂੰ ਘੱਟ ਹੀ ਲੋਕ ਜਾਣਦੇ ਹਨ।
ਅੱਜ ਅਸੀਂ ਤੁਹਾਨੂੰ ਮਹਿਮੂਦ ਦੇ ਕੁਝ ਅਜਿਹੇ ਹੀ ਕਿੱਸੇ ਦੱਸਾਂਗੇ। ਮਹਿਮੂਦ ਨੇ ਉਂਝ ਤਾਂ ਸਾਲ 1945 'ਚ ਫਿਲਮ 'ਸਨਿਆਸੀ' ਨਾਲ ਆਪਣੇ ਫਿਲਮੀ ਕਰੀਅਰ ਦੀ ਸ਼ੁਰੂਆਤ ਕੀਤੀ ਸੀ ਪਰ ਕੀ ਤੁਸੀਂ ਜਾਣਦੇ ਹੋ ਕਿ ਉੁਨ੍ਹਾਂ ਨੇ 'ਕਿਸਮਤ' ਫਿਲਮ 'ਚ ਇਕ ਬਾਲ ਕਲਾਕਾਰ ਦੀ ਭੂਮਿਕਾ ਵੀ ਨਿਭਾਈ ਸੀ।
ਮਹਿਮੂਦ ਨੇ ਵੱਡੇ ਪਰਦੇ 'ਤੇ ਆਉਣ ਤੋਂ ਪਹਿਲਾਂ ਕਈ ਛੋਟੇ-ਮੋਟੇ ਕੰਮ ਵੀ ਕੀਤੇ, ਜਿਨ੍ਹਾਂ ਨੂੰ ਉਨ੍ਹਾਂ ਨੇ ਪੂਰੀ ਸ਼ਿੱਦਤ ਨਾਲ ਕੀਤੇ। ਇਕ ਸਮਾਂ ਸੀ ਜਦੋਂ ਉਹ ਨਿਰਦੇਸ਼ਕ ਰਾਜਕੁਮਾਰ ਸੰਤੋਸ਼ੀ ਦੇ ਪਿਤਾ ਪੀ. ਐੱਲ. ਸੰਤੋਸ਼ੀ ਦੇ ਡਰਾਈਵਰ ਹੁੰਦੇ ਸਨ।
ਬਾਅਦ 'ਚ ਰਾਜਕੁਮਾਰ ਨੇ ਹੀ ਉਨ੍ਹਾਂ ਨੂੰ ਫਿਲਮ 'ਅੰਦਾਜ਼ ਅਪਨਾ ਅਪਨਾ' 'ਚ ਕੰਮ ਦਿੱਤਾ। ਇਸ ਤੋਂ ਇਲਾਵਾ ਮਹਿਮੂਦ ਕੁਝ ਸਮੇਂ ਤੱਕ ਮੀਨਾ ਕੁਮਾਰੀ ਨੂੰ ਟੇਬਲ ਟੇਨਿਸ ਵੀ ਸਿਖਾਉਂਦੇ ਰਹੇ।
ਮਹਿਮੂਦ ਦੇ ਪਿਤਾ ਮੁਮਤਾਜ਼ ਅਲੀ ਇਕ ਸਟੇਜ ਐਕਟਰ ਅਤੇ ਬਿਹਤਰੀਨ ਡਾਂਸਰ ਸਨ। ਉਹ 40 ਅਤੇ 50 ਦੇ ਦਹਾਕੇ ਦਾ ਇਕ ਵੱਡਾ ਨਾਂ ਸਨ।
ਮਹਿਮੂਦ ਨੇ ਮੀਨਾ ਕੁਮਾਰੀ ਦੀ ਵੱਡੀ ਭੈਣ ਮਧੂ ਨਾਲ ਵਿਆਹ ਕੀਤਾ ਸੀ। ਹਾਲਾਂਕਿ ਬਾਅਦ 'ਚ ਕਿਸੇ ਕਾਰਨ ਉਨ੍ਹਾਂ ਨੇ ਤਲਾਕ ਦੇ ਦਿੱਤਾ।
ਇਕ ਦੌਰ ਸੀ ਜਦੋਂ ਅਮਿਤਾਭ ਆਪਣੇ ਸੰਘਰਸ਼ ਦੇ ਦਿਨਾਂ ਤੋਂ ਗੁਜ਼ਰ ਰਹੇ ਸਨ। ਉਸ ਸਮੇਂ ਮਹਿਮੂਦ ਨੇ ਮੁੰਬਈ 'ਚ ਉਨ੍ਹਾਂ ਨੂੰ ਆਪਣੇ ਘਰ 'ਚ ਇਕ ਕਮਰਾ ਰਹਿਣ ਲਈ ਦਿੱਤਾ ਸੀ।
ਹਾਲਾਂਕਿ ਬਾਅਦ 'ਚ ਦੋਹਾਂ ਦੇ ਰਿਸ਼ਤਿਆਂ 'ਚ ਨਾਰਾਜ਼ਗੀ ਤੇ ਦੂਰੀਆਂ ਆ ਗਈਆਂ।