ਲਾਸ ਏਂਜਲਸ (ਬਿਊਰੋ)— ਹਾਲੀਵੁੱਡ ਗਾਇਕਾ ਮਾਇਲੀ ਸਾਇਰਸ ਦਾ ਕਹਿਣਾ ਹੈ ਕਿ ਉਹ ਰਾਸ਼ਟਰਪਤੀ ਡੋਨਾਲਡ ਟਰੰਪ ਕਾਰਨ ਅਮਰੀਕਾ ਨਹੀਂ ਛੱਡੇਗੀ, ਸਗੋਂ ਉਹ ਓਦੋਂ ਤਕ ਉੁਨ੍ਹਾਂ ਦੇ ਖਿਲਾਫ ਆਵਾਜ਼ ਉਠਾਉਂਦੀ ਰਹੇਗੀ, ਜਦੋਂ ਤੱਕ ਉਸ ਕੋਲ ਇਹ ਮੰਚ ਹੈ। ਖਬਰ ਮੁਤਾਬਿਕ 'ਰੇਕਿੰਗ ਬਾਲ' ਗੀਤ ਦੀ ਗਾਇਕਾ ਨੇ 2016 ਰਾਸ਼ਟਰਪਤੀ ਚੋਣਾਂ ਦੌਰਾਨ ਕਿਹਾ ਕਿ ਜੇਕਰ ਟਰੰਪ ਦਫਤਰ ਸੰਭਾਲਦੇ ਹਨ, ਤਾਂ ਉਹ ਦੇਸ਼ ਛੱਡ ਕੇ ਸਵਦੇਸ਼ ਪਰਤ ਜਾਏਗੀ ਪਰ ਹੁਣ ਉਨ੍ਹਾਂ ਨੇ ਕਿਹਾ ਕਿ ਉਹ ਅਮਰੀਕਾ ਛੱਡ ਕੇ ਕਦੇ ਨਹੀਂ ਜਾਏਗੀ। ਦੇਸ਼ ਛੱਡਣਾ ਬੇਵਕੂਫੀ ਹੋਵੇਗੀ।
ਜਾਣਕਾਰੀ ਮੁਤਾਬਕ ਗਾਇਕਾ ਮਾਇਲੀ ਸਾਇਰਸ ਨੇ ਹਿਊਸਟਨ ਸ਼ਹਿਰ 'ਚ ਹਾਰਵੇ ਤੂਫਾਨ ਕਾਰਨ ਹੋਈ ਤਬਾਹੀ ਤੋਂ ਬਾਅਦ ਰਾਹਤ ਕਾਰਜਾਂ ਦੇ ਮੱਦੇਨਜ਼ਰ ਪੀੜਤਾਂ ਲਈ 5 ਲੱਖ ਡਾਲਰ ਦੀ ਰਾਸ਼ੀ ਦਾਨ ਦਿੱਤੀ ਸੀ। ਖ਼ਬਰਾਂ ਮੁਤਾਬਕ ਸਾਇਰਸ ਨੇ ਇਕ ਸ਼ੋਅ ਦੌਰਾਨ ਇਹ ਐਲਾਨ ਕੀਤਾ ਸੀ। ਉਸ ਨੇ ਆਖਿਆ ਕਿ ਉਹ ਤੂਫਾਨ ਕਾਰਨ ਪ੍ਰਭਾਵਿਤ ਹੋਏ ਲੋਕਾਂ ਦੀ ਮਦਦ ਲਈ ਹੈਪੀ ਹਿੱਪੀ ਫਾਊਂਡੇਸ਼ਨ ਨਾਲ ਕੰਮ ਕਰ ਰਹੀ ਹੈ ਅਤੇ ਰਾਹਤ ਕਾਰਜਾਂ ਲਈ ਦਾਨ ਕਰ ਰਹੀ ਹੈ। ਇਕ ਖਬਰ ਮੁਤਾਬਕ ਸਾਇਰਸ ਨੇ ਕਿਹਾ ਕਿ ਉਹ ਪੀੜਤਾਂ ਦੀ ਮਦਦ ਲਈ ਭਾਵੁਕ ਹੋਣ ਕਾਰਨ ਖੁਦ ਨੂੰ ਰੋਕ ਨਹੀਂ ਸਕੀ ਅਤੇ ਰੋ ਪਈ ਸੀ, ਜਿਸ ਤੋਂ ਬਾਅਦ ਉਨ੍ਹਾਂ ਦੀ ਮਦਦ ਕਰਨ ਦਾ ਫੈਸਲਾ ਕੀਤਾ।
ਤੁਹਾਨੂੰ ਦੱਸ ਦਈਏ ਕਿ ਹਾਰਵੇ ਤੂਫਾਨ ਟੈਕਸਾਸ ਕੰਡੇ ਨਾਲ ਟਕਰਾਉਣ ਕਾਰਨ ਲਗਭਗ ਇਕ ਹਫਤੇ ਬਾਅਦ ਵੀ ਪ੍ਰੇਸ਼ਾਨ ਲੋਕ ਹੜ੍ਹ 'ਚ ਬਿਨਾਂ ਭੋਜਨ ਅਤੇ ਬਿਨਾਂ ਪਾਣੀ ਦੇ ਫਸੇ ਹੋਏ ਸਨ। ਅਧਿਕਾਰੀ ਜੀਵਤ ਲੋਕਾਂ ਦੀ ਭਾਲ ਕਰ ਰਹੇ ਹਨ ਅਤੇ ਛਤਾਂ 'ਤੇ ਫਸੇ ਲੋਕਾਂ ਨੂੰ ਹੈਲੀਕਾਪਟਰਾਂ ਰਾਹੀਂ ਕੱਢਿਆ ਗਿਆ ਸੀ। ਹਾਰਵੇ ਕਾਰਨ ਮਰਨ ਵਾਲਿਆਂ ਦੀ ਗਿਣਤੀ ਘੱਟ ਤੋਂ ਘੱਟ 47 ਸੀ। ਹਜ਼ਾਰਾਂ ਐਮਰਜੈਂਸੀ ਰਾਹਤ ਟੀਮਾਂ ਪ੍ਰਭਾਵਿਤ ਲੋਕਾਂ ਦੀ ਮਦਦ ਕਰ ਰਹੀ ਹੈ।