ਮੁੰਬਈ(ਬਿਊਰੋ)- ਟੀ. ਵੀ. ਦੀ ਦੁਨੀਆ ’ਚ ਮਸ਼ਹੂਰ ਸੁਪਰਹੀਰੋ ‘ਸ਼ਕਤੀਮਾਨ’ ਅੱਜ ਵੀ ਲੋਕਾਂ ਦੇ ਦਿਲਾਂ ’ਤੇ ਛਾਇਆ ਹੋਇਆ ਹੈ। ਇਸੇ ਸੁਪਰਹੀਰੋ ਦੇ ਮੁੜ ਪਰਦੇ ‘ਤੇ ਵਾਪਸੀ ਦੀਆਂ ਖ਼ਬਰਾਂ ਸਾਹਮਣੇ ਆ ਰਹੀਆਂ ਹਨ। 14 ਸਾਲ ਪਹਿਲਾਂ ਇਹ ਸ਼ੋਅ ਬੱਚਿਆਂ ‘ਚ ਬੇਹੱਦ ਹਰਮਨ ਪਿਆਰਾ ਸੀ । ਇਸ ‘ਚ ਮੁਕੇਸ਼ ਖੰਨਾ ਨੇ ‘ਸ਼ਕਤੀਮਾਨ’ ਦਾ ਕਿਰਦਾਰ ਨਿਭਾਇਆ ਸੀ । ਇਸੇ ਦੌਰਾਨ ਇਕ ਖਬਰ ਸਾਹਮਣੇ ਆ ਰਹੀ ਹੈ ਕਿ ਜੋ ‘ਸ਼ਕਤੀਮਾਨ’ ਦੇ ਚਾਹੁਣ ਵਾਲਿਆਂ ਦੇ ਚਿਹਰਿਆਂ ‘ਤੇ ਖੁਸ਼ੀ ਲਿਆ ਸਕਦੀ ਹੈ।
ਦਰਅਸਲ ਸੋਸ਼ਲ ਮੀਡੀਆ ‘ਤੇ ‘ਸ਼ਕਤੀਮਾਨ’ ਦੀ ਇਕ ਤਸਵੀਰ ਵਾਇਰਲ ਹੋ ਰਹੀ ਹੈ । ਜਿਸ ‘ਚ ਦਾਅਵਾ ਕੀਤਾ ਸ਼ਕਤੀਮਾਨ ਮੁੜ ਤੋਂ ਪਰਦੇ ‘ਤੇ ਵਾਪਸੀ ਕਰ ਸਕਦਾ ਹੈ । ਇਹ ਤਸਵੀਰ ਕਿਸੇ ਹੋਰ ਨੇ ਨਹੀਂ ਬਲਕਿ ਇੰਸਟਾਗ੍ਰਾਮ ਅਕਾਊਂਟ ‘ਤੇ ‘ਓਰੂ ਅਦਾਰ ਲਵ’ ਦੇ ਡਾਇਰੈਕਟਰ ਉਮਰ ਲੁਲੂ ਨੇ ਸਾਂਝੀ ਕੀਤੀ ਹੈ । ਜਿਸ ‘ਚ ਸ਼ਕਤੀਮਾਨ ਦੀ ਡਰੈੱਸ ‘ਚ ਉਹ ਨਜ਼ਰ ਆ ਰਹੇ ਹਨ। ਇਹ ਤਸਵੀਰ ‘ਚ ਮੁਕੇਸ਼ ਖੰਨਾ ਦੀ ਥਾਂ ਸਾਊਥ ਐਕਟਰ ਮੁਕੇਸ਼ ਨਜ਼ਰ ਆ ਰਹੇ ਹਨ। ਮੁਕੇਸ਼ ਦੀ ਇਹ ਲੁੱਕ ਉਨ੍ਹਾਂ ਦੀ ਅਗਲੀ ਫਿਲਮ ਦਾ ਹਿੱਸਾ ਹੈ । ਫਿਲਮ ਦੇ ਇਕ ਹਿੱਸੇ ‘ਚ ਉਹ ਸ਼ਕਤੀਮਾਨ ਦੇ ਰੂਪ ‘ਚ ਦਿਖਾਈ ਦੇਣਗੇ ।
ਮੁਕੇਸ਼ ਖੰਨਾ ਵੱਲੋਂ ਬਣਾਇਆ ਜਾਣ ਵਾਲਾ ‘ਸ਼ਕਤੀਮਾਨ’ ਲੜੀਵਾਰ ਬੱਚਿਆਂ ‘ਚ ਬੇਹੱਦ ਹਰਮਨ ਪਿਆਰਾ ਸੀ ਪਰ ਉਨ੍ਹਾਂ ਨੂੰ ਇਹ ਸੀਰੀਅਲ ਬੰਦ ਕਰਨਾ ਪਿਆ ਸੀ ਕਿਉਂਕਿ ਦੂਰਦਰਸ਼ਨ ‘ਤੇ ਚੱਲਣ ਵਾਲੇ ਇਸ ਸੀਰੀਅਲ ਬਾਰੇ ਕਈ ਅਫਵਾਹਾਂ ਫੈਲ ਗਈਆਂ ਸਨ ਕਿ ਬੱਚਿਆਂ ਵੱਲੋਂ ਸੀਰੀਅਲ ‘ਚ ਦਿਖਾਏ ਗਏ ਕਿਰਦਾਰਾਂ ਦੀ ਨਕਲ ਕੀਤੀ ਜਾ ਰਹੀ ਹੈ।
ਬੀਤੇ ਕੁਝ ਦਿਨ ਪਹਿਲਾਂ ਐਕਟਰ ਮੁਕੇਸ਼ ਖੰਨਾ ਨੇ ਖੁਲਾਸਾ ਕੀਤਾ ਸੀ ਕਿ ਦੂਰਦਰਸ਼ਨ ਵੱਲੋਂ ਲਗਾਤਾਰ ਫੀਸ ਵਧਾਉਣ ਕਾਰਨ ਆਰਥਿਕ ਕਾਰਨਾਂ ਕਰਕੇ ਇਸ ਨੂੰ ਬੰਦ ਕਰਨਾ ਪਿਆ ਸੀ ।