ਜਲੰਧਰ (ਬਿਊਰੋ)— ਕਈ ਸੁਪਰਹਿੱਟ ਫਿਲਮਾਂ ਦੇਣ ਵਾਲੀ ਐਮੀ ਵਿਰਕ ਤੇ ਸੋਨਮ ਬਾਜਵਾ ਦੀ ਜੋੜੀ ਮੁੜ ਤੀਜੀ ਵਾਰ ਇਕੱਠੀ ਨਜ਼ਰ ਆਵੇਗੀ। ਇਹ ਜੋੜੀ ਪਹਿਲਾਂ 'ਨਿੱਕਾ ਜ਼ੈਲਦਾਰ' ਤੇ 'ਨਿੱਕਾ ਜ਼ੈਲਦਾਰ 2' 'ਚ ਨਜ਼ਰ ਆ ਚੁੱਕੀ ਹੈ। ਮਜ਼ੇਦਾਰ ਗੱਲ ਇਹ ਹੈ ਕਿ ਇਸ ਜੋੜੀ ਦੀ ਪਹਿਲੀ ਫਿਲਮ ਸਿਮਰਜੀਤ ਸਿੰਘ ਨੇ ਹੀ ਡਾਇਰੈਕਟ ਕੀਤੀ ਸੀ, ਜਿਨ੍ਹਾਂ ਨੇ ਬਾਅਦ 'ਚ 'ਨਿੱਕਾ ਜ਼ੈਲਦਾਰ 2' ਤੇ ਹੁਣ 'ਮੁਕਲਾਵਾ' ਡਾਇਰੈਕਟ ਕੀਤੀ ਹੈ।
ਦੱਸਣਯੋਗ ਹੈ ਕਿ ਐਮੀ ਵਿਰਕ ਤੇ ਸੋਨਮ ਬਾਜਵਾ ਦਾ ਇਸ ਫਿਲਮ 'ਚ ਰੋਲ ਕਾਫੀ ਦਿਲਚਸਪ ਹੈ। ਹਾਲਾਂਕਿ 'ਮੁਕਲਾਵਾ' ਫਿਲਮ ਇਨ੍ਹਾਂ ਦੋਵਾਂ ਦੀਆਂ ਪਹਿਲੀਆਂ ਫਿਲਮਾਂ ਨਾਲੋਂ ਅਲੱਗ ਹੈ। ਟਰੇਲਰ ਮੁਤਾਬਕ ਐਮੀ ਵਿਰਕ ਦਾ ਕਿਰਦਾਰ 'ਸ਼ਿੰਦਾ' ਨਾਂ ਦੇ ਇਕ ਵਿਆਹੇ ਮੁੰਡੇ ਦਾ ਹੈ, ਜੋ ਵਿਆਹ ਤੋਂ ਬਾਅਦ ਆਪਣੀ ਘਰਵਾਲੀ ਨੂੰ ਦੇਖਣ ਦੀ ਤਾਂਘ ਰੱਖਦਾ ਹੈ। ਦੂਜੇ ਪਾਸੇ ਸੋਨਮ ਬਾਜਵਾ ਨੇ ਫਿਲਮ 'ਚ 'ਤਾਰੋ' ਨਾਂ ਦੀ ਉਸ ਕੁੜੀ ਦਾ ਕਿਰਦਾਰ ਨਿਭਾਇਆ ਹੈ, ਜੋ ਵਿਆਹ ਤੋਂ ਬਾਅਦ ਆਪਣੇ ਘਰਵਾਲੇ ਨੂੰ ਤਾਂ ਮਿਲਦੀ ਹੈ ਪਰ ਉਸ ਨੂੰ ਡਰ ਰਹਿੰਦਾ ਹੈ ਕਿ ਕਿਤੇ ਉਸ ਦੇ ਘਰਵਾਲਿਆਂ ਨੂੰ ਪਤਾ ਨਾ ਲੱਗ ਜਾਏ।
ਫਿਲਮ 24 ਮਈ ਨੂੰ ਵਰਲਡਾਈਡ ਰਿਲੀਜ਼ ਹੋਣ ਜਾ ਰਹੀ ਹੈ। ਫਿਲਮ ਦੀ ਕਹਾਣੀ ਤੇ ਸਕ੍ਰੀਨਪਲੇਅ ਉਪਿੰਦਰ ਵੜੈਚ ਤੇ ਜਗਜੀਤ ਸੈਣੀ ਨੇ ਲਿਖਿਆ ਹੈ। 'ਵਾਈਟ ਹਿੱਲ ਸਟੂਡੀਓ' ਤੇ ਗਰੇਸਲੇਟ ਦੀ ਇਹ ਸਾਂਝੀ ਪੇਸ਼ਕਸ 'ਮੁਕਲਾਵਾ' 24 ਮਈ ਨੂੰ ਰਿਲੀਜ਼ ਹੋਵੇਗੀ। ਫਿਲਮ ਦੇ ਨਿਰਮਾਤਾ ਗੁਨਬੀਰ ਸਿੰਘ ਸਿੱਧੂ ਤੇ ਮਨਮੌੜ ਸਿੱਧੂ ਹਨ।