ਜਲੰਧਰ(ਬਿਊਰੋ)— ਇਨ੍ਹੀਂ ਦਿਨੀਂ ਮਿਊਜ਼ਿਕ ਇੰਡਸਟਰੀ 'ਚ ਪੰਜਾਬੀ ਸਿੰਗਰਾਂ ਦਾ ਕਾਫੀ ਬੋਲ-ਬਾਲਾ ਹੈ। ਅਜਿਹਾ ਹੀ ਇਕ ਗਾਇਕ ਹੈ ਨਛੱਤਰ ਗਿੱਲ, ਜਿਨ੍ਹਾਂ ਨੇ ਆਪਣੀ ਸੁਰੀਲੀ ਤੇ ਮਿੱਠ ਬੋਲੜੀ ਆਵਾਜ਼ ਦੇ ਸਦਕਾ ਲੋਕਾਂ 'ਚ ਖਾਸ ਪਛਾਣ ਬਣਾਉਣ 'ਚ ਸਫਲਤਾ ਹਾਸਲ ਕੀਤੀ।
ਦੱਸ ਦੇਈਏ ਕਿ ਅੱਜ ਨਛੱਤਰ ਗਿੱਲ ਆਪਣਾ 49ਵਾਂ ਜਨਮਦਿਨ ਸੈਲੀਬ੍ਰੇਟ ਕਰ ਰਹੇ ਹਨ। ਉਨ੍ਹਾਂ ਦਾ ਜਨਮ 15 ਨਵੰਬਰ 1968 ਨੂੰ ਹੋਇਆ ਸੀ। ਨਛੱਤਰ ਗਿੱਲ ਆਪਣੇ ਪਿਤਾ ਨਾਲ ਅੇਨੂਅਲ ਪ੍ਰੋਗਰਾਮਾਂ 'ਚ ਗਾਉਣ ਜਾਂਦੇ ਸਨ।
ਨਛੱਤਰ ਗਿੱਲ ਦਾ ਪਹਿਲਾ ਸੋਲੋ ਗੀਤ 'ਦਿਲ ਦਿੱਤਾ ਨਈਂ ਸੀ' ਰਿਲੀਜ਼ ਹੋਇਆ ਸੀ, ਜਿਸ ਨੇ ਉਨ੍ਹਾਂ ਨੂੰ ਨਾਮੀ ਸਿੰਗਰਾਂ ਦੀ ਕਤਾਰ 'ਚ ਖੜ੍ਹਾ ਕਰ ਦਿੱਤਾ। ਉਨ੍ਹਾਂ ਦੇ ਇਸ ਸੋਲੋ ਗੀਤ ਨੂੰ ਲੋਕਾਂ ਵਲੋਂ ਕਾਫੀ ਪਸੰਦ ਕੀਤਾ ਗਿਆ ਹੈ। ਇਸ ਤੋਂ ਬਾਅਦ ਸਾਲ 2006 'ਚ ਧਾਰਮਿਕ ਐਲਬਮ 'ਸਾਹਿਬ ਜਿੰਨੇ ਦੀਆਂ ਮੰਨੇ' ਰਿਲੀਜ਼ ਹੋਈ।
ਇਸ ਤੋਂ 'ਅਰਦਾਸ ਕਰਾਂ' 2010 'ਚ ਰਿਲੀਜ਼ ਹੋਈ। ਇਨ੍ਹਾਂ ਧਰਮਿਕ ਐਲਬਮ ਨੂੰ ਲੋਕਾਂ ਵਲੋਂ ਭਰਵਾਂ ਹੁੰਗਾਰਾ ਮਿਲਿਆ। ਇਸ ਤੋਂ ਬਾਅਦ ਹੋਲੀ-ਹੋਲੀ ਨਛੱਤਰ ਗਿੱਲ ਦਾ ਪੰਜਾਬੀ ਸੰਗੀਤ ਇੰਡਸਟਰੀ 'ਚ ਬੋਲ-ਬਾਲਾ ਵਧਣ ਲੱਗਾ।
ਪਾਲੀਵੁੱਡ ਐਕਟਰ ਗਿੱਪੀ ਗਰੇਵਾਲ ਦੀ ਫਿਲਮ 'ਮੰਜੇ ਬਿਸਤਰੇ' ਦੇ ਟਾਈਟਲ ਟਰੈਕ ਨੂੰ ਨਛੱਤਰ ਗਿੱਲ ਨੇ ਆਪਣੀ ਸੁਰੀਲੀ ਆਵਾਜ਼ 'ਚ ਗਾਇਆ।
ਇਸ ਤੋਂ ਇਲਾਵਾ ਹਾਲ ਹੀ 'ਚ ਰਿਲੀਜ਼ ਹੋਈ ਰੌਸ਼ਨ ਪ੍ਰਿੰਸ ਦੀ ਫਿਲਮ 'ਰਾਂਝਾ ਰਫਿਊਜੀ' ਦੇ ਗੀਤ 'ਜੋੜੀ' ਨੂੰ ਨਛੱਤਰ ਗਿੱਲ ਨੇ ਆਪਣੀ ਮਿੱਠੜੀ ਆਵਾਜ਼ 'ਚ ਗਾਇਆ ਸੀ।
ਦੱਸ ਦੇਈਏ ਕਿ ਨਛੱਤਰ ਗਿੱਲ ਨੇ ਹਮੇਸ਼ਾ ਹੀ ਸਰੋਤਿਆਂ ਦੀ ਝੋਲੀ 'ਚ ਸੱਭਿਆਚਾਰ ਨਾਲ ਜੁੜੇ ਗੀਤਾਂ ਨੂੰ ਪਾਇਆ ਹੈ। ਉਨ੍ਹਾਂ ਦੇ ਗੀਤਾਂ 'ਚ ਹਮੇਸ਼ਾ ਸੱਭਿਆਚਾਰ ਨੂੰ ਪਹਿਲ ਦਿੱਤੀ ਗਈ ਹੈ। ਨਛੱਤਰ ਗਿੱਲ ਦੇ ਪ੍ਰਸ਼ੰਸਕ ਨਾ ਸਿਰਫ ਪੰਜਾਬ ਹਨ ਸਗੋਂ ਦੇਸ਼ਾ-ਵਿਦੇਸ਼ਾਂ 'ਚ ਵੀ ਵਸਦੇ ਹਨ। ਦੇਸ਼ਾਂ-ਵਿਦੇਸ਼ਾਂ 'ਚ ਵਸਦੇ ਪੰਜਾਬੀ ਉਨ੍ਹਾਂ ਨੂੰ ਸੱਭਿਆਚਾਰਕ ਪ੍ਰੋਗਰਾਮਾਂ ਲਈ ਵਿਦੇਸ਼ਾਂ 'ਚ ਅਕਸਰ ਬੁਲਾਉਂਦੇ ਰਹਿੰਦੇ ਹਨ।
ਇਸ ਤੋਂ ਇਲਾਵਾ ਨਛੱਤਰ ਗਿੱਲ ਨੇ 'ਬਰੈਂਡਿਡ ਹੀਰਾ', 'ਅੱਖੀਆਂ 'ਚ ਪਾਣੀ', 'ਛੱਕ ਕੇ ਨਾ ਜਾ', 'ਨਾਮ', 'ਸਾਡੀ ਗੱਲ', 'ਠੱਗੀਆਂ', 'ਇਸ਼ਕ ਜਗਾਵੇ', 'ਦੱਸ ਤੇਰੇ ਪਿੱਛੇ ਕਿਉਂ ਮਰੀਏ' ਵਰਗੀਆਂ ਐਲਬਮ ਨੂੰ ਰਿਲੀਜ਼ ਕੀਤਾ। ਐਲਬਮਸ ਦੇ ਇਨ੍ਹਾਂ ਗੀਤਾਂ ਨੂੰ ਲੋਕਾਂ ਵਲੋਂ ਭਰਵਾਂ ਹੁੰਗਾਰਾ ਮਿਲਿਆ।
