ਮੁੰਬਈ (ਬਿਊਰੋ) — ਨੇਹਾ ਧੂਪੀਆ ਦੀ ਧੀ ਮਿਹਰ 19 ਮਹੀਨਿਆਂ ਦੀ ਹੋ ਚੁੱਕੀ ਹੈ। ਉਨ੍ਹਾਂ ਨੇ ਇੱਕ ਪੋਸਟ ਆਪਣੇ ਇੰਸਟਾਗ੍ਰਾਮ 'ਤੇ ਸਾਂਝੀ ਕਰਕੇ ਇਸ ਦੀ ਜਾਣਕਾਰੀ ਦਿੱਤੀ ਹੈ। ਦੱਸ ਦਈਏ ਕਿ ਨੇਹਾ ਧੂਪੀਆ ਨੇ ਅੰਗਦ ਬੇਦੀ ਨਾਲ ਸਾਲ 2018 'ਚ ਵਿਆਹ ਕਰਵਾਇਆ ਸੀ, ਜਿਸ ਤੋਂ ਬਾਅਦ ਉਨ੍ਹਾਂ ਦੇ ਘਰ ਪਿਆਰੀ ਜਿਹੀ ਬੱਚੀ ਮਿਹਰ ਨੇ ਜਨਮ ਲਿਆ ਸੀ। ਅੰਗਦ ਬੇਦੀ ਸਾਬਕਾ ਕ੍ਰਿਕੇਟਰ ਬਿਸ਼ਨ ਸਿੰਘ ਬੇਦੀ ਦੇ ਬੇਟੇ ਹਨ। ਸਾਲ 2004 'ਚ ਅੰਗਦ ਬੇਦੀ ਨੇ ਛੋਟੇ ਪਰਦੇ 'ਤੇ ਡੈਬਿਊ ਕੀਤਾ ਸੀ।
ਇਸ ਤੋਂ ਸੱਤ ਸਾਲ ਬਾਅਦ ਉਨ੍ਹਾਂ ਨੇ ਬਾਲੀਵੁੱਡ ਫ਼ਿਲਮ 'ਫਾਲਤੂ' 'ਚ ਨਜ਼ਰ ਆਏ ਸਨ। ਅੰਗਦ ਬੇਦੀ ਸਾਲ 2018 'ਚ ਉਸ ਸਮੇਂ ਸੁਰਖੀਆਂ 'ਚ ਆਏ ਜਦੋਂ ਉਨ੍ਹਾਂ ਨੇ ਨੇਹਾ ਧੂਪੀਆ ਨਾਲ ਗੁੱਪਚੁਪ ਤਰੀਕੇ ਨਾਲ ਵਿਆਹ ਕਰਵਾ ਲਿਆ ਸੀ। ਅੰਗਦ ਬੇਦੀ ਨੇ ਨੇਹਾ ਨੂੰ ਪਹਿਲੀ ਵਾਰ ਜਿੰਮ 'ਚ ਦੇਖਿਆ ਸੀ, ਉਸ ਸਮੇਂ ਉਹ ਦਿੱਲੀ 'ਚ ਅੰਡਰ 19 ਕ੍ਰਿਕੇਟ ਖੇਡਦੇ ਸਨ ਅਤੇ ਨੇਹਾ ਮਿਸ ਇੰਡੀਆ ਲਈ ਤਿਆਰੀ ਕਰ ਰਹੀ ਸੀ। ਪਹਿਲੀ ਵਾਰ ਦੇਖ ਕੇ ਹੀ ਅੰਗਦ ਨੂੰ ਨੇਹਾ ਧੂਪੀਆ ਨਾਲ ਪਿਆਰ ਹੋ ਗਿਆ ਸੀ।
ਇੱਕ ਇੰਟਰਵਿਊ 'ਚ ਅੰਗਦ ਨੇ ਦੱਸਿਆ ਕਿ 'ਦਿੱਲੀ ਦੇ ਜਿੰਮ 'ਚ ਨੇਹਾ ਨੂੰ ਦੇਖਣ ਤੋਂ ਕਈ ਸਾਲ ਬਾਅਦ ਸਾਡੀ ਮੁਲਾਕਾਤ ਮੁੰਬਈ 'ਚ ਹੋਈ ਅਤੇ ਅਸੀਂ ਦੋਸਤ ਬਣ ਗਏ। ਮੈਂ ਉਸ ਸਮੇਂ ਰਿਸ਼ਤਾ ਅੱਗੇ ਵਧਾਉਣ ਲਈ ਤਿਆਰ ਸੀ ਪਰ ਨੇਹਾ ਨੇ ਇਹ ਰਿਸ਼ਤਾ ਦੋਸਤੀ ਤੱਕ ਹੀ ਸੀਮਤ ਰੱਖਿਆ। ਇਸ ਤੋਂ ਬਾਅਦ ਦੋਸਤੀ ਪਿਆਰ 'ਚ ਬਦਲ ਗਈ।' ਅੰਗਦ ਤੇ ਨੇਹਾ ਨੇ 10 ਮਈ 2018 ਨੂੰ ਵਿਆਹ ਕਰਵਾਇਆ ਸੀ। ਇਸ ਵਿਆਹ ਨੇ ਦੋਹਾਂ ਦੇ ਪ੍ਰਸ਼ੰਸਕਾਂ ਨੂੰ ਹੈਰਾਨ ਕਰ ਦਿੱਤਾ ਸੀ।