ਮੁੰਬਈ (ਬਿਊਰੋ)— ਬਾਲੀਵੁੱਡ ਦੀ ਦੇਸੀ ਗਰਲ ਪ੍ਰਿਯੰਕਾ ਚੋਪੜਾ ਨੇ ਆਪਣੇ ਅਮਰੀਕੀ ਬੁਆਏਫ੍ਰੈਂਡ ਨਿਕ ਜੋਨਸ ਨਾਲ ਮੰਗਣੀ ਕਰ ਲਈ ਹੈ। ਖਬਰਾਂ ਤਾਂ ਇੱਥੋਂ ਤੱਕ ਆ ਰਹੀਆਂ ਹਨ ਕਿ ਆਪਣੇ 36ਵੇਂ ਜਨਮਦਿਨ 'ਤੇ ਹੀ ਪ੍ਰਿਯੰਕਾ ਨੇ ਨਿਕ ਨਾਲ ਮੰਗਣੀ ਕਰ ਲਈ ਸੀ। ਪ੍ਰਿਯੰਕਾ ਹੁਣ ਜਲਦ ਹੀ ਨਿਕ ਨਾਲ ਵਿਆਹ ਕਰਨ ਵਾਲੀ ਹੈ ਅਤੇ ਇਸ ਲਈ ਉਨ੍ਹਾਂ ਨੇ ਸਲਮਾਨ ਖਾਨ ਨਾਲ 'ਭਾਰਤ' 'ਚ ਕੰਮ ਕਰਨ ਤੋਂ ਵੀ ਇਨਕਾਰ ਕਰ ਦਿੱਤਾ ਹੈ।
ਨਿਕ ਜੋਨਸ ਅਤੇ ਪ੍ਰਿਯੰਕਾ ਚੋਪੜਾ ਦੇ ਅਫੇਅਰ ਦੀਆਂ ਖਬਰਾਂ ਉਸ ਸਮੇਂ ਚਰਚਾ 'ਚ ਆਈਆਂ ਜਦੋਂ ਪ੍ਰਿਯੰਕਾ, ਨਿਕ ਨਾਲ ਇਕ ਮੈਚ ਦੌਰਾਨ ਸਪਾਟ ਹੋਈ ਸੀ। ਇਸ ਦੇ ਨਾਲ ਹੀ ਹੁਣ ਸਵਾਲ ਇਹ ਉੱਠਦਾ ਹੈ ਕਿ ਨਿਕ ਜੋਨਸ ਆਖਿਰ ਹੈ ਕੌਣ?
ਦਰਅਸਲ ਨਿਕ ਜੋਨਸ ਦਾ ਅਸਲੀ ਨਾਂ ਨਿਕੋਲਸ ਜੇਰੀ ਜੋਨਸ ਹੈ।
ਨਿਕ ਸਿੰਗਰ ਹੋਣ ਦੇ ਨਾਲ-ਨਾਲ ਇਕ ਐਕਟਰ ਵੀ ਹਨ। ਅਮਰੀਕਾ ਦੇ ਰਹਿਣ ਵਾਲੇ ਨਿਕ ਦੇ ਪਿਤਾ ਵੀ ਇਕ ਸੰਗੀਤਕਾਰ ਹਨ। ਨਿਕ ਨੇ ਸਾਲ 2002 'ਚ ਆਪਣਾ ਪਹਿਲਾ ਗੀਤ ਗਾਇਆ ਸੀ। ਨਿਕ ਦਾ ਪਹਿਲਾ ਗੀਤ 'ਜੌਏ ਟੂ ਦਿ ਵਰਲਡ' ਸੀ, ਜਿਸ ਨੂੰ ਉਨ੍ਹਾਂ ਨੇ ਖੁਦ ਲਿਖਿਆ ਸੀ। ਨਿਕ ਨੇ ਆਪਣੇ ਭਰਾਵਾਂ ਨਾਲ ਮਿਲ ਕੇ ਜੋਨਸ ਬ੍ਰਦਰਜ਼ ਨਾਂ ਦਾ ਇਕ ਬੈਂਡ ਬਣਾਇਆ, ਜਿਸ ਦੇ 4 ਐਲਬਮ ਮਾਰਕਿਟ 'ਚ ਆ ਚੁੱਕੇ ਹਨ ਅਤੇ ਕਾਫੀ ਸਫਲ ਰਹੇ ਹਨ।
ਜੋਨਸ ਬ੍ਰਦਰਜ਼ ਨੇ ਅਮਰੀਕੀ ਮਿਊਜ਼ਿਕ ਐਵਾਰਡਜ਼ 'ਚ 'ਐਵਾਰਡ ਫਾਰ ਬ੍ਰੇਕਥਰੂ ਆਰਟਿਸਟ' ਦੇ ਟਾਈਟਲ ਤੋਂ ਇਲਾਵਾ ਸਾਲ 2010 'ਚ 'ਯੰਗ ਹਾਲੀਵੁੱਡ ਆਰਟਿਸਟ ਆਫ ਦਿ ਈਅਰ' ਦਾ ਖਿਤਾਬ ਵੀ ਜਿੱਤਿਆ ਹੈ। ਨਿਕ, ਪ੍ਰਿਯੰਕਾ ਤੋਂ 10 ਸਾਲ ਛੋਟੇ ਹਨ। ਜਿੱਥੇ ਨਿਕ ਇਸ ਸਾਲ 16 ਸਤੰਬਰ ਨੂੰ 26 ਸਾਲ ਹੋਣ ਵਾਲੇ ਹਨ ਉੱਥੇ ਪ੍ਰਿਯੰਕਾ ਇਸ ਸਾਲ 18 ਜੁਲਾਈ ਨੂੰ 36 ਸਾਲ ਦੀ ਹੋ ਚੁੱਕੀ ਹੈ।
ਨਿਕ ਦਾ ਜਨਮ 1992 'ਚ ਹੋਇਆ ਸੀ। ਉੱਥੇ ਪ੍ਰਿਯੰਕਾ ਦੀ ਡੇਟ ਆਫ ਬਰਥ 1982 ਹੈ। ਨਿਕ ਜੋਨਸ ਅਮਰੀਕੀ ਪੌਪ ਮਿਊਜ਼ਿਕ ਦੀ ਦੁਨੀਆ 'ਚ ਮਸ਼ਹੂਰ ਨਾਂ ਹੈ। ਪ੍ਰਿਯੰਕਾ ਨਾਲ ਨਿਕ ਜੋਨਸ ਦੀ ਮੁਲਾਕਾਤ 'ਕਵਾਂਟਿਕੋ' ਦੇ ਸੈੱਟ 'ਤੇ ਇਕ ਕਾਮਨ ਫ੍ਰੈਂਡ ਰਾਹੀਂ ਹੋਈ ਸੀ।
ਇਸ ਤੋਂ ਬਾਅਦ ਦੋਵੇਂ ਸਾਲ 2017 'ਚ 'ਮੈੱਟ ਗਾਲਾ' ਈਵੈਂਟ 'ਤੇ ਹੱਥਾਂ 'ਚ ਹੱਥ ਪਾਏ ਨਜ਼ਰ ਆਏ। ਦੋਹਾਂ ਨੂੰ ਬੇਸਬਾਲ ਮੈਚ ਦੌਰਾਨ ਵੀ ਇਕੱਠੇ ਦੇਖਿਆ ਗਿਆ, ਇਹ ਹੁਣ ਜਲਦ ਵਿਆਹ ਦੇ ਬੰਧਨ 'ਚ ਬੱਝਣ ਵਾਲੇ ਹਨ।
