ਮੁੰਬਈ (ਬਿਊਰੋ)— ਬਾਲੀਵੁੱਡ ਦੀ ਮਸ਼ਹੂਰ ਅਭਿਨੇਤਰੀ ਨਿੰਮੀ ਨੂੰ ਕੌਣ ਨਹੀਂ ਜਾਣਦਾ। 60 ਦੇ ਦਹਾਕੇ ਦੀ ਮਸ਼ਹੂਰ ਅਭਿਨੇਤਰੀ ਨਿੰਮੀ ਬਾਲੀਵੁੱਡ ਦੀ ਸੁਪਰਸਟਾਰ ਰਹੀ ਹੈ। ਉਸ ਸਮੇਂ ਫਿਲਮਾਂ ’ਚ ਰਾਜ ਕਪੂਰ ਰਾਹੀਂ ਨਿੰਮੀ ਨੂੰ ਵਧੀਆ ਡੈਬਿਊ ਮਿਲ ਗਿਆ ਸੀ। ਜਿਸ ਤੋਂ ਬਾਅਦ ਉਹ ਰਾਤੋਂ-ਰਾਤ ਸਟਾਰ ਬਣ ਗਈ। ਦੇਖਦੇ ਹੀ ਦੇਖਦੇ ਨਿੰਮੀ ਦੀ ਡਿਮਾਂਡ ਵਧਦੀ ਗਈ। ਨਿੰਮੀ ਨੇ ਦਿਲੀਪ ਕੁਮਾਰ ਤੋਂ ਲੈ ਕੇ ਰਾਜ ਕਪੂਰ, ਅਸ਼ੋਕ ਕੁਮਾਰ, ਧਰਮਿੰਦਰ ਵਰਗੇ ਕਈ ਵੱਡੇ ਸਿਤਾਰਿਆਂ ਨਾਲ ਕੰਮ ਕੀਤਾ। ਫਿਲਮਾਂ ਲਈ ਇਸ ਅਦਾਕਾਰਾ ਨੇ ਆਪਣਾ ਨਾਮ ਬਾਨੂ ਤੋਂ ਨਿੰਮੀ ਰੱਖਿਆ। ਨਿੰਮੀ ਨੇ ਉਂਝ ਤਾਂ ਕਈ ਹਿੱਟ ਫਿਲਮਾਂ 'ਚ ਕੰਮ ਕੀਤਾ ਪਰ ਉਨ੍ਹਾਂ ਦੀ ਇਕ ਗਲਤੀ ਨੇ ਉਨ੍ਹਾਂ ਦਾ ਪੂਰਾ ਕਰੀਅਰ ਬਰਬਾਦ ਕਰਕੇ ਰੱਖ ਦਿੱਤਾ ਸੀ। 1963 'ਚ ਆਈ ਫਿਲਮ 'ਮੇਰੇ ਮਹਿਬੂਬ' ਦੇ ਡਾਇਰੈਕਟਰ ਹਰਮਨ ਸਿੰਘ ਰਵੈਲ ਨੇ ਨਿੰਮੀ ਨੂੰ ਫਿਲਮ 'ਚ ਲੀਡ ਅਭਿਨੇਤਰੀ ਦਾ ਰੋਲ ਦਿੱਤਾ ਪਰ ਨਿੰਮੀ ਲੀਡ ਰੋਲ ਦੀ ਜਗ੍ਹਾ ਸੈਕਿੰਡ ਲੀਡ ਰੋਲ, ਜੋ ਕਿ ਐਕਟਰ ਰਜਿੰਦਰ ਕੁਮਾਰ ਦੀ ਭੈਣ ਦਾ ਸੀ, ਕਰਨਾ ਚਾਹੁੰਦੀ ਸੀ। ਡਾਇਰੈਕਟਰ ਦੇ ਕਈ ਵਾਰ ਮਨਾਉਣ ਤੋਂ ਬਾਅਦ ਵੀ ਉਹ ਨਹੀਂ ਮੰਨੀ ਤੇ ਫਿਲਮ 'ਚ ਉਸ ਦੀ ਜਗ੍ਹਾ ਸਾਧਨਾ ਨੂੰ ਲੀਡ ਰੋਲ ਵਜੋਂ ਲਿਆ ਗਿਆ ਤੇ ਉਸ ਨੂੰ ਸੈਕਿੰਡ ਲੀਡ 'ਚ। ਫਿਲਮ ਸੁਪਰਹਿੱਟ ਰਹੀ ਤੇ ਸਾਧਨਾ ਦਾ ਕਰੀਅਰ ਚੱਲ ਪਿਆ, ਉਥੇ ਇਸ ਫਿਲਮ ਤੋਂ ਬਾਅਦ ਨਿੰਮੀ ਨੂੰ ਲੀਡ ਰੋਲ ਮਿਲਣੇ ਘੱਟ ਹੋ ਗਏ ਤੇ ਹੌਲੀ-ਹੌਲੀ ਉਸ ਦਾ ਕਰੀਅਰ ਖਤਮ ਹੋ ਗਿਆ।