ਮੁੰਬਈ (ਬਿਊਰੋ)— ਅਭਿਨੇਤਾ ਇਰਫਾਨ ਖਾਨ ਨਾਲ ਫਿਲਮ 'ਲੰਚ ਬਾਕਸ', ਅਕਸ਼ੇ ਕੁਮਾਰ ਨਾਲ 'ਏਅਰਲਿਫਟ' ਵਰਗੀਆਂ ਫਿਲਮਾਂ 'ਚ ਕੰਮ ਕਰ ਚੁੱਕੀ ਨਿਮਰਤ ਕੌਰ 13 ਮਾਰਚ ਨੂੰ 36 ਸਾਲ ਦੀ ਹੋ ਗਈ ਹੈ। 1982 ਨੂੰ ਰਾਜਸਥਾਨ ਦੇ ਪਿਲਾਨੀ 'ਚ ਜਨਮੀ ਨਿਮਰਤ ਦੇ ਪਿਤਾ ਇੰਡੀਅਨ ਆਰਮੀ 'ਚ ਅਫਸਰ ਸਨ। 1994 'ਚ ਉਹ ਕਸ਼ਮੀਰ 'ਚ ਅੱਤਵਾਦੀਆਂ ਨਾਲ ਹੋਈ ਲੜਾਈ 'ਚ ਸ਼ਹੀਦ ਹੋ ਗਏ ਸਨ।
ਨਿਮਰਤ ਨੇ ਦਿੱਲੀ ਦੇ ਲੇਡੀ ਸ਼੍ਰੀਰਾਮ ਕਾਲਜ ਆਫ ਕਾਮਰਸ ਤੋਂ ਪੜ੍ਹਾਈ ਕੀਤੀ ਹੈ। ਉੱਥੇ ਹੀ ਕਾਲਜ 'ਚ ਥੀਏਟਰ 'ਚ ਹਿੱਸਾ ਲੈਂਦੀ ਸੀ। ਬਹੁਤ ਘੱਟ ਲੋਕ ਜਾਣਦੇ ਹਨ ਕਿ ਨਿਮਰਤ ਨੇ 'ਵਨ ਨਾਈਟ ਵਿਦ ਦਿ ਕਿੰਗ' ਨਾਂ ਦੀ ਇੰਗਲਿਸ਼ ਫਿਲਮ ਨਾਲ ਆਪਣੇ ਕਰੀਅਰ ਦੀ ਸ਼ੁਰੂਆਤ ਕੀਤੀ।
ਫਿਲਮ ਲੰਚ ਬਾਕਸ ਦੀ ਸਫਲਤਾ ਤੋਂ ਬਾਅਦ ਨਿਮਰਤ ਨੇ ਕਰੀਬ 27 ਫਿਲਮਾਂ ਦੇ ਆਫਰ ਠੁਕਰਾ ਦਿੱਤੇ ਸਨ। ਬਾਅਦ 'ਚ ਉਨ੍ਹਾਂ ਅਕਸ਼ੇ ਕੁਮਾਰ ਦੀ ਫਿਲਮ 'ਏਅਰਲਿਫਟ' 'ਚ ਕੰਮ ਕੀਤਾ। ਫਿਲਮ 'ਲੰਚਬਾਕਸ 'ਚ ਉਨ੍ਹਾਂ ਦੀ ਅਦਾਕਾਰੀ ਦੀ ਕਾਫੀ ਤਾਰੀਫ ਕੀਤੀ ਗਈ ਸੀ। ਇਸ ਫਿਲਮ 'ਚ ਨਵਾਜ਼ੂਦੀਨ ਸਿੱਦਿਕੀ ਅਤੇ ਇਰਫਾਨ ਖਾਨ ਉਨ੍ਹਾਂ ਦੇ ਸਹਿ-ਅਭਿਨੇਤਾ ਸਨ।
ਨਿਮਰਤ ਸਭ ਤੋਂ ਪਹਿਲਾਂ ਮਿਊਜ਼ਿਕ ਵੀਡੀਓ ਕਰਕੇ ਲਾਈਮਲਾਈਟ 'ਚ ਆਈ। ਇਸ ਤੋਂ ਬਾਅਦ ਉਹ 'ਕੈਡਬਰੀ ਡੇਰੀ ਮਿਲਕ' ਦੀ ਐਡ 'ਚ ਦਿਖਾਈ ਦਿੱਤੀ। ਨਿਮਰਤ ਨੂੰ 2013 'ਚ ਅਮਜੋਨਾਸ ਫਿਲਮ ਫੈਸਟੀਵਲ ਐਵਾਰਡ ਨਾਲ ਨਵਾਜਿਆ ਗਿਆ। ਇਸ ਤੋਂ ਇਲਾਵਾ 2014 'ਚ ਫਰੈਸ ਫੇਸ ਲਈ ਵਾਗ ਬਿਊਟੀ ਐਵਾਰਡ ਅਤੇ 2015 'ਚ ਸਿਨੇਮਾ 'ਚ ਆਪਣੇ ਸਹਿਯੋਗ ਲਈ ਗਰੇਟ ਵੁਮਨ ਐਵਾਰਡ ਨਾਲ ਸਨਮਾਨਿਤ ਕੀਤਾ ਗਿਆ।