ਜਲੰਧਰ (ਬਿਊਰੋ)— ਪਹਿਲੀ ਹੀ ਫਿਲਮ 'ਚੰਨਾ ਮੇਰਿਆ' ਨਾਲ ਲੋਕਾਂ ਦੇ ਦਿਲਾਂ 'ਚ ਖਾਸ ਥਾਂ ਬਣਾਉਣ ਵਾਲੇ ਗਾਇਕ ਤੇ ਅਭਿਨੇਤਾ ਨਿੰਜਾ ਨੇ ਆਪਣੀ ਦੂਜੀ ਫਿਲਮ 'ਆਲ੍ਹਣਾ' ਦੀ ਸ਼ੂਟਿੰਗ ਸ਼ੁਰੂ ਕਰ ਲਈ ਹੈ। ਚੰਡੀਗੜ੍ਹ ਦੇ ਨੇੜਲੇ ਇਲਾਕੇ 'ਚ ਅੱਜ ਤੋਂ ਫਿਲਮ ਦੀ ਸ਼ੂਟਿੰਗ ਸ਼ੁਰੂ ਹੋਈ ਹੈ। ਇਸ ਖਾਸ ਮੌਕੇ 'ਤੇ ਟੀਮ ਦੀ ਸਾਰੀ ਟੀਮ, ਜਿਨ੍ਹਾਂ 'ਚ ਡਾਇਰੈਕਟਰ ਜਨਜੋਤ ਸਿੰਘ, ਪ੍ਰੋਡਿਊਸਰ ਤਲਵਿੰਦਰ ਹੇਅਰ, ਸਗੂਨ ਵਘ, ਡੀ. ਓ. ਪੀ. ਪ੍ਰਦੀਪ ਖਾਨਵਿਕਰ, ਲਾਈਨ ਪ੍ਰੋਡਿਊਸਰ ਵਿਰਾਸਤ ਫਿਲਮਸ ਹਾਜ਼ਰ ਸਨ। ਟੀਮ ਨੂੰ ਵਧਾਈ ਦੇਣ ਲਈ ਗਾਇਕ ਤੇ ਅਭਿਨੇਤਾ ਰਣਜੀਤ ਬਾਵਾ ਵੀ ਖਾਸ ਤੌਰ 'ਤੇ ਪੁੱਜੇ ਹੋਏ ਸਨ। ਫਿਲਮ 'ਚ ਨਿੰਜਾ ਨਾਲ ਮਾਡਲ ਤੇ ਅਭਿਨੇਤਰੀ ਸਿਮਰਨ ਹੁੰਦਲ ਮੁੱਖ ਭੂਮਿਕਾ ਨਿਭਾਉਂਦੀ ਨਜ਼ਰ ਆਵੇਗੀ, ਜਿਹੜੀ ਦਿਲਜੀਤ ਦੁਸਾਂਝ ਦੇ 'ਲੈਂਬੜਗਿਨੀ' ਗੀਤ 'ਚ ਵੀ ਨਜ਼ਰ ਆ ਚੁੱਕੀ ਹੈ। ਪੰਜਾਬੀ ਗੀਤਾਂ ਤੋਂ ਇਲਾਵਾ ਸਿਮਰਨ ਹੁੰਦਲ 'ਲਵ ਨੇ ਮਿਲਾ ਦੀ ਜੋੜੀ', 'ਨਾ ਆਨਾ ਇਸ ਦੇਸ ਲਾਡੋ' ਵਰਗੇ ਟੀ. ਵੀ. ਸੀਰੀਅਲਸ 'ਚ ਵੀ ਨਜ਼ਰ ਆ ਚੁੱਕੀ ਹੈ। 'ਆਲ੍ਹਣਾ' ਫਿਲਮ ਅਪ੍ਰੈਲ 2018 'ਚ ਰਿਲੀਜ਼ ਹੋਵੇਗੀ।