ਜਲੰਧਰ (ਬਿਊਰੋ) - ਪੱਛਮੀ ਬੰਗਾਲ ਦੇ ਬਸ਼ੀਰਹਾਟ ਲੋਕਸਭਾ ਸੀਟ ਤੋਂ ਕਾਂਗਰਸੀ ਸੰਸਦ ਮੈਂਬਰ ਤੇ ਮਸ਼ਹੂਰ ਬੰਗਾਲੀ ਅਦਾਕਾਰਾ ਨੁਸਰਤ ਜਹਾਂ 19 ਤੋਂ 21 ਜੂਨ ਦੇ ਵਿਚ ਵਿਆਹ ਕਰਨ ਵਾਲੀ ਹੈ। ਉਨ੍ਹਾਂ ਦਾ ਵਿਆਹ ਕਲਕੱਤਾ ਦੇ ਬਿਜ਼ਨਸਮੈਨ ਨਿਖਿਲ ਜੈਨ ਨਾਲ ਹੋਣ ਜਾ ਰਿਹਾ ਹੈ। ਸੋਸ਼ਲ ਮੀਡੀਆ 'ਤੇ ਨੁਸਰਤ ਨੂੰ ਸਭ ਤੋਂ ਸੋਹਣੀ ਸੰਸਦ ਮੈਂਬਰ ਮੰਨਿਆ ਜਾਂਦਾ ਹੈ। 29 ਸਾਲਾਂ ਦੀ ਨੁਸਰਤ ਤੇ ਨਿਖਿਲ ਦਾ ਵਿਆਹ ਤੁਰਕੀ ਦੇ ਬੋਡਰਮ 'ਚ ਹੋਵੇਗਾ।
ਮੀਡੀਆ ਰਿਪੋਰਟਸ ਮੁਤਾਬਕ ਵਿਆਹ 19 ਤੋਂ 21 ਜੂਨ ਦੌਰਾਨ ਹੋਵੇਗਾ। 16 ਜੂਨ ਨੂੰ ਨੁਸਰਤ ਆਪਣੇ ਪਰਿਵਾਰ ਤੇ ਦੋਸਤਾਂ-ਮਿਤਰਾਂ ਨਾਲ ਤੁਰਕੀ ਲਈ ਰਵਾਨਾ ਹੋਵੇਗੀ। 17 ਜੂਨ ਨੂੰ ਪ੍ਰੀ-ਵੈਡਿੰਗ ਸੈਰਾਮੈਨੀ ਤੇ 18 ਜੂਨ ਨੂੰ ਮਹਿੰਦੀ ਤੇ ਸੰਗੀਤ ਦੀ ਰਮਮ ਕੀਤੀ ਜਾਵੇਗੀ। ਨੁਸਰਤ ਦੇ ਵਿਆਹ 'ਚ ਟਾਲੀਵੁੱਡ ਦੇ ਕਈ ਕਲਾਕਾਰ ਸ਼ਿਰਕਤ ਕਰਨਗੇ। ਤੁਰਕੀ 'ਚ ਵਿਆਹ ਤੋਂ ਬਾਅਦ ਇਹ ਜੋੜੀ ਆਪਣੀ ਰਿਸੈਪਸ਼ਨ ਪਾਰਟੀ ਇੰਡੀਆ 'ਚ ਵੀ ਕਰਨਗੇ।
ਨੁਸਰਤ ਦੀ ਲਵ ਸਟੋਰੀ ਬਾਰੇ ਕਿਹਾ ਜਾਂਦਾ ਹੈ ਕਿ ਦੋਵਾਂ ਦੀ ਮੁਲਾਕਾਤ ਪਿਛਲੇ ਸਾਲ ਦੁਰਗਾ ਪੂਜਾ ਦੌਰਾਨ ਹੋਈ ਸੀ। ਉਸ ਤੋਂ ਬਾਅਦ ਹੀ ਦੋਵੇ ਕਾਫੀ ਮਹੀਨੇ ਰਿਲੇਸ਼ਨ 'ਚ ਰਹੇ ਤੇ ਹੁਣ ਵਿਆਹ ਦੇ ਬੰਧਨ 'ਚ ਬੱਝ ਰਹੇ ਹਨ। ਨੁਸਰਤ ਬੰਗਾਲੀ ਸਿਨੇਮਾ ਦੀ ਮਸ਼ਹੂਰ ਅਦਾਕਾਰਾ ਹੈ। ਉਨ੍ਹਾਂ ਨੇ ਸਾਲ 2011 'ਚ ਫਿਲਮ 'ਸ਼ੋਤਰੂ' ਨਾਲ ਡੈਬਿਊ ਕੀਤਾ ਸੀ। ਇਸ ਤੋਂ ਬਾਅਦ 'ਖੋਕਾ 420', 'ਖਿਲਾੜੀ', 'ਜਮਾਈ 420', 'ਲਵ ਐਕਸਪ੍ਰੈਸ','ਕ੍ਰਿਸਕ੍ਰਾਸ' ਤੇ 'ਨਕਾਬ' ਫਿਲਮਾਂ 'ਚ ਕੰਮ ਕੀਤਾ।