ਮੁੰਬਈ (ਬਿਊਰੋ)— ਬਾਲੀਵੁੱਡ ਦੀ ਦੇਸੀ ਗਰਲ ਪ੍ਰਿਯੰਕਾ ਚੋਪੜਾ ਅਤੇ ਉਨ੍ਹਾਂ ਦੇ ਅਮਰੀਕੀ ਦੋਸਤ (ਗਾਇਕ-ਐਕਟਰ) ਨਿੱਕ ਜੋਨਸ ਅਕਸਰ ਇਕੱਠੇ ਦੇਖੇ ਜਾਂਦੇ ਹਨ। ਪ੍ਰਿਯੰਕਾ ਹਾਲ ਹੀ 'ਚ ਨਿੱਕ ਦੇ ਕਰੀਬੀ ਦੋਸਤ ਦੇ ਵਿਆਹ 'ਚ ਸ਼ਰੀਕ ਹੋਈ ਸੀ। ਇਸ ਤੋਂ ਬਾਅਦ ਬੀਤੇ ਮੰਗਲਵਾਰ ਰਾਤ ਦੋਵੇਂ ਨਿਊਯਾਰਕ 'ਚ ਡਿਨਰ ਡੇਟ 'ਤੇ ਜਾਂਦੇ ਨਜ਼ਰ ਆਏ।
ਡੇਟ ਦੀਆਂ ਤਸਵੀਰਾਂ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਹੀਆਂ ਹਨ। ਤਸਵੀਰਾਂ 'ਚ ਪ੍ਰਿਯੰਕਾ ਬਹੁਤ ਹੀ ਸਾਧਾਰਨ ਆਊਟਫਿੱਟ 'ਚ ਨਜ਼ਰ ਆ ਰਹੀ ਹੈ। ਉਨ੍ਹਾਂ ਨੇ ਨੀਲੀ ਡਰੈੱਸ ਪਹਿਨੀ ਹੋਈ ਹੈ ਅਤੇ ਮੋਢੇ 'ਤੇ ਸਫੈਦ ਰੰਗ ਦੀ ਇਕ ਜੈਕਟ ਵੀ ਪਾਈ ਹੋਈ ਹੈ। ਨਿੱਕ, ਪ੍ਰਿਯੰਕਾ ਤੋਂ 10 ਸਾਲ ਛੋਟੇ ਹਨ। ਉਹ 25 ਸਾਲ ਦੇ ਹਨ।
ਇਸ ਡਿਨਰ ਡੇਟ ਦੌਰਾਨ ਨਿੱਕ ਨੇ ਹਲਕੇ ਰੰਗ ਦੇ ਟ੍ਰਾਊਜ਼ਰ ਨਾਲ ਕਾਲੇ ਰੰਗ ਦੀ ਟੀ-ਸ਼ਰਟ ਪਹਿਨੀ ਸੀ। ਪਿਛਲੇ ਕੁਝ ਸਮੇਂ ਤੋਂ ਦੋਹਾਂ ਨੂੰ ਕਈ ਮੌਕਿਆਂ 'ਤੇ ਇਕੱਠੇ ਦੇਖਿਆ ਜਾ ਰਿਹਾ ਹੈ। ਦੋਵੇਂ ਇਕੱਠੇ ਸਭ ਤੋਂ ਪਹਿਲੀ ਵਾਰ ਬੇਸਬਾਲ ਗੇਮ ਦੌਰਾਨ ਦੇਖਿਆ ਗਿਆ ਸੀ। ਹਾਲ ਹੀ 'ਚ ਦੋਵੇਂ ਏਅਰਪੋਰਟ 'ਚ ਵੀ ਇਕੱਠੇ ਦਿਖੇ ਸਨ।
ਪਿਛਲੇ ਸਾਲ ਪ੍ਰਿਯੰਕਾ ਅਤੇ ਨਿੱਕ 'ਮੈੱਟ ਗਾਲਾ' ਲਈ ਇਕੱਠੇ ਆਏ ਸਨ। ਉਸ ਸਮੇਂ ਵੀ ਉਨ੍ਹਾਂ ਦੇ ਅਫੇਅਰ ਦੀਆਂ ਖਬਰਾਂ ਉੱਡੀਆਂ ਸਨ ਪਰ ਦੋਹਾਂ ਨੇ ਇਹ ਕਹਿ ਕੇ ਇਨ੍ਹਾਂ ਖਬਰਾਂ ਦਾ ਖੰਡਨ ਕੀਤਾ ਸੀ ਕਿ ਉਨ੍ਹਾਂ ਨੇ ਇਕ ਹੀ ਡਿਜ਼ਾਈਨਰ ਦੇ ਕੱਪੜੇ ਪਹਿਨੇ ਸਨ, ਇਸ ਲਈ ਉਹ ਇਕੱਠੇ ਆਏ ਸਨ।
ਹਾਲ ਹੀ 'ਚ ਉਨ੍ਹਾਂ ਨੇ ਇਕ-ਦੂਜੇ ਦੇ ਇੰਸਟਾਗਰਾਮ ਅਕਾਊਂਟ 'ਤੇ ਕੁਮੈਂਟ ਵੀ ਕੀਤਾ ਸੀ। ਪ੍ਰਿਯੰਕਾ ਅਤੇ ਨਿੱਕ ਦੀ ਮੁਲਾਕਾਤ 'ਕਵਾਂਟਿਕੋ' ਦੇ ਇਕ ਕਾਸਟ ਮੈਂਬਰ ਵਲੋਂ ਹੋਈ ਸੀ। ਨਿੱਕ ਪਹਿਲਾਂ ਕਹਿ ਚੁੱਕੇ ਹਨ ਕਿ ਉਹ ਭਾਰਤ ਆਉਣਾ ਚਾਹੁਣਗੇ।
