ਜਲੰਧਰ— ਪੰਜਾਬੀ ਗਾਇਕ ਅਤੇ ਪਾਲੀਵੁੱਡ ਇੰਡਸਟਰੀ 'ਚ ਡੈਬਿਊ ਕਰ ਚੁੱਕੇ ਰਣਜੀਤ ਬਾਵਾ ਕਾਲਜ ਸਮੇਂ ਤੋਂ ਹੀ ਕਾਫੀ ਮਸ਼ਹੂਰ ਸਨ। ਰਣਜੀਤ ਬਾਵਾ ਇਕ ਅਜਿਹਾ ਕਲਾਕਾਰ ਹੈ, ਜਿਨ੍ਹਾਂ ਨੇ ਲਗਾਤਾਰ ਕਾਲਜ ਫੈਸਟੀਵਲ 'ਚ 6 ਬਾਰ ਕੰਪੀਟੀਸ਼ਨ 'ਚ ਆਪਣੀ ਨੰਬਰ ਵਨ ਦੀ ਪੋਜੀਸ਼ਨ ਨੂੰ ਕਾਇਮ ਰੱਖਿਆ।
ਇਕ ਇੰਟਰਵਿਊ ਦੌਰਾਨ ਉਨ੍ਹਾਂ ਨੇ ਕਿਹਾ ਕਿ, ''ਮੇਰੀ ਮਾਂ ਮੇਰੀ ਜਿੰਦਗੀ 'ਚ ਖਾਸ ਥਾਂ ਰੱਖਦੀ ਹੈ, ਜਿਸ ਕਰ ਕੇ ਮੈਂ 'ਡਾਲਰ ਵਰਸਿਜ਼ ਰੋਟੀ' ਗੀਤ ਵੀ ਗਾਇਆ ਸੀ। ਇਸ ਗੀਤ ਬਾਰੇ ਦੱਸਦੇ ਹੋਏ ਕਿਹਾ ਕਿ, ਮੇਰੀ ਮਾਂ ਨੇ ਇਕਲਿਆਂ ਹੀ ਪਰਿਵਾਰ ਨੂੰੰਸੰਭਲਿਆ। ਛੋਟੀ ਉਮਰ ਦੇ ਸੀ ਜਦੋਂ ਮੇਰੇ ਪਿਤਾ ਦੀ ਮੌਤ ਹੋ ਗਈ ਸੀ ਅਤੇ ਮੇਰੀ ਮਾਂ ਦੇ ਮੋਢਿਆਂ 'ਤੇ ਪੂਰੇ ਪਰਿਵਾਰ ਦੀ ਜਿੰਮੇਵਾਰੀ ਆ ਗਈ ਸੀ। ਉਨ੍ਹਾਂ ਅੱਗੇ ਦੱਸਿਆ ਕਿ ਸਾਲ 2014 'ਚ ਮੈਂ ਪਹਿਲੀ ਵਾਰ ਕੈਨੇਡਾ ਗਿਆ ਸੀ ਤੇ ਫਲਾਈਟ ਕਾਰਨ ਮੈਨੂੰ ਨੀਂਦ ਨਹੀਂ ਆਈ ਅਤੇ ਨਾਲ ਹੀ ਮੈਨੂੰ ਕਾਫੀ ਜੋਰ ਦੀ ਭੁੱਖ ਵੀ ਲੱਗੀ ਸੀ ਪਰ ਰਾਤ ਦੇ ਤਿੰਨ ਵਜੇ ਕੋਈ ਰੋਟੀ ਖਵਾਉਣ ਵਾਲਾ ਨਹੀਂ ਸੀ।
ਜਦੋਂ ਮੈਂ ਹੋਟਲ ਦਾ ਪਰਦਾ ਹਟਾਇਆ ਤਾਂ ਵੇਖਿਆ ਕਿ ਸਾਹਮਣੇ ਹੋਟਲ ਹੈ, ਜਿਥੋਂ ਖਾਣ ਲਈ ਬਰਗਰ ਤੇ ਕਾਫੀ ਲਈ ਪਰ ਮੇਰੇ ਦਿਲ 'ਚ ਖਿਆਲ ਆਇਆ ਕਿ ਘਰੇ ਹੁੰਦਿਆਂ ਮਾਂ ਨੂੰ ਜਦੋਂ ਮਰਜ਼ੀ ਉਠਾ ਲਓ ਕੁਝ ਬਣਾਉਣ ਲਈ ਪਰ ਦੂਰ ਪਰਦੇਸ 'ਚ ਕੋਈ ਨਹੀਂ, ਜੋ ਮਾਂ ਵਾਂਗ ਖਿਆਲ ਰੱਖੇ ਤੇ ਪਿਆਰ ਕਰੇ।'' ਇਹੀ ਸੋਚ ਉਨ੍ਹਾਂ ਨੇ ਇਸ ਗੀਤ ਬਣਾਇਆ, ਜੋ ਲੋਕਾਂ ਦੀ ਅਸਲ 'ਚ ਪਰਦੇਸ 'ਚ ਰਹਿਣ ਵਾਲੇ ਲੋਕਾਂ 'ਤੇ ਅਧਾਰਿਤ ਹੈ ਤੇ ਜਿਸ ਨੂੰ ਕਾਫੀ ਸਰਾਹਿਆ ਵੀ ਗਿਆ।
