ਮੁੰਬਈ (ਬਿਊਰੋ) : 'ਸਿੰਬਾ' ਵਰਗੀ ਹਿੱਟ ਫਿਲਮ ਦੇਣ ਤੋਂ ਬਾਅਦ ਰਣਵੀਰ ਸਿੰਘ ਆਪਣੀ ਨਵੀਂ ਫਿਲਮ 'ਗਲੀ ਬੁਆਏ' ਨੂੰ ਲੈ ਕੇ ਸੁਰਖੀਆਂ 'ਚ ਹਨ। ਉਨ੍ਹਾਂ ਦੀ ਫਿਲਮ 'ਸਿੰਬਾ' ਨੇ ਬਾਕਸ ਆਫਿਸ 'ਤੇ ਕਮਾਈ ਦੇ ਨਵੇਂ ਰਿਕਾਰਡ ਬਣਾਏ ਹਨ। ਹੁਣ 'ਗਲੀ ਬੁਆਏ' ਫਿਲਮ 'ਚ ਰਣਵੀਰ ਸਿੰਘ ਇਕ ਰੈਪਰ ਦਾ ਕਿਰਦਾਰ ਨਿਭਾ ਰਿਹਾ ਹੈ। ਹੁਣ ਤੱਕ ਰਣਵੀਰ ਸਿੰਘ ਦੀ ਆਵਾਜ਼ 'ਚ ਫਿਲਮ ਦੇ 2 ਗੀਤ ਰਿਲੀਜ਼ ਹੋ ਚੁੱਕੇ ਹਨ, ਜਿੰਨ੍ਹਾਂ ਨੇ ਸ਼ੋਸ਼ਲ ਮੀਡੀਆ 'ਤੇ ਖੂਬ ਧਮਾਲ ਮਚਾਈ ਹੋਈ ਹੈ ਪਰ ਹੁਣ ਰਣਵੀਰ ਸਿੰਘ ਦਾ ਸ਼ੋਸ਼ਲ ਮੀਡੀਆ 'ਤੇ ਇਕ ਹੋਰ ਵੀਡੀਓ ਵਾਇਰਲ ਹੋ ਰਿਹਾ ਹੈ, ਜਿਸ 'ਚ ਉਨ੍ਹਾਂ ਨੇ ਦੱਸ ਦਿੱਤਾ ਹੈ ਕਿ ਉਨ੍ਹਾਂ ਦੇ ਅਨਮੋਲ ਰਤਨ ਕੌਣ ਹਨ। ਜੀ ਹਾਂ ਉਹ ਇਸ ਵੀਡੀਓ 'ਚ ਰੈਪਰ ਡਿਵਾਈਨ ਅਤੇ ਨੇਜੀ ਨਾਲ 'ਕਰਨ ਅਰਜੁਨ' ਫਿਲਮ ਦਾ ਸੁਪਰਹਿੱਟ ਗੀਤ 'ਰਾਮ ਲੱਖਣ' ਗਾਉਂਦੇ ਨਜ਼ਰ ਆ ਰਹੇ ਹਨ। ਡਿਵਾਈਨ ਅਤੇ ਨੇਜੀ ਰਣਵੀਰ ਸਿੰਘ ਦੀ ਫਿਲਮ 'ਗਲੀ ਬੁਆਏ' ਦੇ ਅਹਿਮ ਪਹਿਲੂ ਹਨ। ਇਹ ਹੀ ਉਹ ਦੋ ਰੈਪਰ ਹਨ, ਜਿੰਨ੍ਹਾਂ ਦੀ ਜ਼ਿੰਦਗੀ ਤੋਂ ਪ੍ਰੇਰਿਤ ਹੋ ਕੇ ਰਣਵੀਰ ਸਿੰਘ ਵੱਲੋਂ 'ਗਲੀ ਬੁਆਏ' ਫਿਲਮਾਈ ਜਾ ਰਹੀ ਹੈ।
ਦੱਸ ਦਈਏ ਰਣਵੀਰ ਸਿੰਘ ਨੇ ਕਰੀਬ 10 ਮਹੀਨੇ ਤੱਕ ਡਿਵਾਈਨ ਤੇ ਨੇਜੀ ਤੋਂ ਰੈਪ ਗਾਉਣ ਦੀ ਟਰੇਨਿੰਗ ਲਈ ਹੈ, ਜਿਸ ਤੋਂ ਬਾਅਦ ਹੀ ਉਨ੍ਹਾਂ ਨੇ ਫਿਲਮ 'ਚ ਰੈਪ ਗੀਤਾਂ ਨੂੰ ਆਪਣੀ ਆਵਾਜ਼ ਦਿੱਤੀ ਹੈ। 'ਗਲੀ ਬੁਆਏ' ਦਾ ਨਿਰਦੇਸ਼ਨ ਜ਼ੋਯਾ ਅਖਤਰ ਕਰ ਰਹੇ ਹਨ। ਇਹ ਫਿਲਮ 14 ਫਰਵਰੀ ਨੂੰ ਵੱਡੇ ਪਰਦੇ 'ਤੇ ਰਿਲੀਜ਼ ਹੋਣ ਜਾ ਰਹੀ ਹੈ।