ਜਲੰਧਰ (ਬਿਊਰੋ)— ਮਸ਼ਹੂਰ ਪੰਜਾਬੀ ਗਾਇਕ ਤੇ ਰੈਪਰ ਬੋਹੇਮੀਆ ਦੇ ਪਿਤਾ ਦੇ ਬੀਤੇ ਦਿਨ ਦਿਹਾਂਤ ਹੋਣ ਦੀ ਖਬਰ ਸਾਹਮਣੇ ਆਈ ਹੈ। ਪਾਲੀਵੁੱਡ ਗਾਇਕ ਤੇ ਅਦਾਕਾਰ ਗਿੱਪੀ ਗਰੇਵਾਲ ਨੇ ਇਸ ਸੰਬੰਧੀ ਪ੍ਰਸ਼ੰਸਕਾਂ ਨੂੰ ਜਾਣਕਾਰੀ ਦਿੰਦਿਆਂ ਟਵੀਟ ਕੀਤਾ। ਉਨ੍ਹਾਂ ਨੇ ਲਿਖਿਆ, ''ਅੰਕਲ ਜੀ ਦੀ ਆਤਮਾ ਨੂੰ ਸ਼ਾਂਤੀ ਮਿਲੇ। ਵਾਹਿਗੁਰੂ ਉਨ੍ਹਾਂ ਨੂੰ ਆਪਣੇ ਚਰਨਾਂ 'ਚ ਨਿਵਾਸ ਬਖਸ਼ੇ।''
ਆਪਣੇ ਆਪ ਨੂੰ 'ਦਿ ਪੰਜਾਬੀ ਰੈਪਰ' ਤੇ 'ਕ੍ਰੀਏਟਰ ਆਫ ਪੰਜਾਬੀ ਰੈਪ' ਅਖਵਾਉਣ ਵਾਲੇ ਬੋਹੇਮੀਆ ਦਾ ਜਨਮ 15 ਅਕਤੂਬਰ 1979 ਨੂੰ ਕਰਾਚੀ (ਪਾਕਿਸਤਾਨ) 'ਚ ਇਕ ਪੰਜਾਬੀ-ਮਸੀਹੀ ਪਰਿਵਾਰ 'ਚ ਹੋਇਆ ਸੀ। ਬੋਹੇਮੀਆ ਦਾ ਅਸਲੀ ਨਾਂ ਰੋਜਰ ਡੇਵਿਡ ਹੈ। 14 ਸਾਲ ਦੀ ਉਮਰ 'ਚ ਬੋਹੇਮੀਆ ਆਪਣੇ ਪਰਿਵਾਰ ਨਾਲ ਅਮਰੀਕਾ ਚਲੇ ਗਏ ਸਨ। ਪੰਜਾਬੀ ਗੀਤਾਂ 'ਚ ਰੈਪ ਕਰਨ ਤੋਂ ਇਲਾਵਾ ਬੋਹੇਮੀਆ ਨੇ ਬਾਲੀਵੁੱਡ ਫਿਲਮਾਂ 'ਚ ਵੀ ਹਿੱਟ ਗੀਤ ਦਿੱਤੇ ਹਨ, ਜਿਨ੍ਹਾਂ 'ਚ ਅਕਸ਼ੇ ਕੁਮਾਰ ਦੀ ਫਿਲਮ 'ਚਾਂਦਨੀ ਚੌਕ ਟੂ ਚਾਈਨਾ' ਤੇ 'ਦੇਸੀ ਬੁਆਏਜ਼' ਸ਼ਾਮਲ ਹਨ।