ਜਲੰਧਰ (ਵੈੱਬ ਡੈਸਕ) - ਬੀਤੇ ਦਿਨ ਮਹਾਰਾਸ਼ਟਰ ਵਿਚ ਭੀੜ ਵਲੋਂ ਕੀਤੀ ਹਿੰਸਾ ਨੇ ਸਭ ਨੂੰ ਝੰਜੋੜ ਕੇ ਰੱਖ ਦਿੱਤਾ ਹੈ। ਕਈ ਫ਼ਿਲਮੀ ਸਿਤਾਰਿਆਂ ਨੇ ਇਸ ਘਟਨਾ ਦੀ ਨਿੰਦਾ ਵੀ ਕੀਤੀ। ਇਸ ਸਭ ਦੇ ਚਲਦਿਆਂ ਬੀਆਰ ਚੋਪੜਾ ਵਲੋਂ ਬਣਾਏ ਸੀਰੀਅਲ 'ਮਹਾਭਾਰਤ' ਵਿਚ ਦਰੋਪਦੀ ਦਾ ਕਿਰਦਾਰ ਨਿਭਾਉਣ ਵਾਲੀ ਅਦਾਕਾਰਾ ਰੂਪਾ ਗਾਂਗੁਲੀ ਨੇ ਇਕ ਪੁਰਾਣਾ ਕਿੱਸਾ ਸ਼ੇਅਰ ਕੀਤਾ ਹੈ। ਉਨ੍ਹਾਂ ਨੇ ਦੱਸਿਆ ਹੈ ਕਿ ਉਹ ਵੀ ਇਸ ਤਰ੍ਹਾਂ ਦੀ ਘਟਨਾ ਦਾ ਸ਼ਿਕਾਰ ਹੋਈ ਸੀ। ਰੂਪਾ ਗਾਂਗੁਲੀ ਨੇ ਦੱਸਿਆ ਕਿ 4 ਸਾਲ ਪਹਿਲਾਂ ਮੈਨੂੰ ਵੀ ਇਸ ਤਰ੍ਹਾਂ ਦੀ ਭੀੜ ਦੌਰਾਨ ਹਿੰਸਾ ਦਾ ਸ਼ਿਕਾਰ ਹੋਣਾ ਪਿਆ ਸੀ, ਉਸ ਸਮੇਂ ਮੈਂ ਬਹੁਤ ਮੁਸ਼ਿਕਲ ਨਾਲ ਜਾਨ ਬਚਾਈ ਸੀ।
ਰੂਪਾ ਨੇ ਦੱਸਿਆ ਕਿ ਮੈਨੂੰ 15-20 ਬੰਦਿਆਂ ਨੇ ਕਾਰ ਵਿੱਚੋ ਬਾਹਰ ਕੱਢ ਕੇ ਕੁੱਟਿਆ ਸੀ। ਹਿੰਸਕ ਲੋਕਾਂ ਨੇ ਮੇਰੀ ਕਾਰ ਵੀ ਪੂਰੀ ਤਰ੍ਹਾਂ ਬੰਨ੍ਹ ਦਿੱਤੀ ਸੀ। ਇਸ ਦਾ ਖੁਲਾਸਾ ਰੂਪਾ ਗਾਂਗੁਲੀ ਨੇ ਆਪਣੇ ਟਵਿਟਰ ਅਕਾਊਂਟ 'ਤੇ ਕੀਤਾ ਹੈ। ਇਸ ਟਵੀਟ ਨਾਲ ਰੂਪਾ ਗਾਂਗੁਲੀ ਨੇ ਆਪਣੀ ਚਰਚਿਤ ਸੀਰੀਅਲ 'ਮਹਾਭਾਰਤ' ਦੀ ਇਕ ਵੀਡੀਓ ਵੀ ਪੋਸਟ ਕੀਤੀ ਹੈ। ਰੂਪਾ ਗਾਂਗੁਲੀ ਦੇ ਇਸ ਟਵੀਟ 'ਤੇ ਉਨ੍ਹਾਂ ਦੇ ਪ੍ਰਸ਼ੰਸ਼ਕ ਲਗਾਤਾਰ ਕੁਮੈਂਟ ਕਰ ਰਹੇ ਹਨ।
ਦੱਸਣਯੋਗ ਹੈ ਕਿ 3 ਮਈ ਤਕ ਪੂਰੇ ਭਾਰਤ ਵਿਚ 'ਲੌਕ ਡਾਊਨ' ਕੀਤਾ ਗਿਆ ਹੈ, ਜਿਸ ਦੇ ਚਲਦਿਆਂ ਟੀ.ਵੀ. ਸੀਰੀਅਲ ਅਤੇ ਫ਼ਿਲਮਾਂ ਦੀ ਸ਼ੂਟਿੰਗ ਦਾ ਕੰਮ ਠੱਪ ਹੋ ਗਿਆ ਹੈ। ਇਸੇ ਕਰਕੇ ਅੱਜ ਕਲ ਟੀ.ਵੀ. ਤੇ ਪੁਰਾਣੇ ਸੀਰੀਅਲ ਦੇਖਣ ਨੂੰ ਮਿਲ ਰਹੇ ਹਨ। ਦੂਰਦਰਸ਼ਨ 'ਤੇ 'ਮਹਾਭਾਰਤ' ਅਤੇ 'ਰਾਮਾਇਣ' ਵਰਗੇ ਸੀਰੀਅਲ ਦਿਖਾਏ ਜਾ ਰਹੇ ਹਨ। ਇਨ੍ਹਾਂ ਸ਼ੋਅਜ਼ ਨੂੰ ਦਰਸ਼ਕਾਂ ਵਲੋਂ ਵੀ ਕਾਫੀ ਪਸੰਦ ਕੀਤਾ ਜਾ ਰਿਹਾ ਹੈ।