ਮੁੰਬਈ(ਬਿਊਰੋ)— ਜੋਧਪੁਰ ਦੀ ਅਦਾਲਤ ਨੇ ਕਾਲੇ ਹਿਰਨ ਦੇ ਸ਼ਿਕਾਰ ਮਾਮਲੇ 'ਚ ਦੋ ਦਹਾਕਿਆਂ ਬਾਅਦ ਸਲਮਾਨ ਖਾਨ ਨੂੰ 5 ਸਾਲ ਦੀ ਸਜ਼ਾ ਅਤੇ 10 ਹਜ਼ਾਰ ਦਾ ਜੁਰਮਾਨਾ ਲਗਾਇਆ ਹੈ। ਬਾਕੀ ਦੋਸ਼ੀ ਸੈਫ ਅਲੀ ਖਾਨ, ਨੀਲਮ, ਤੱਬੂ ਅਤੇ ਸੋਨਾਲੀ ਬੇਂਦਰੇ ਨੂੰ ਬਰੀ ਕਰ ਦਿੱਤਾ ਗਿਆ ਹੈ। ਇਸ ਵਿਚਕਾਰ ਸਲਮਾਨ ਖਾਨ ਦਾ 1998 ਦੀ ਇਕ ਵੀਡੀਓ ਕਾਫੀ ਵਾਇਰਲ ਹੋ ਰਹੀ ਹੈ। ਇਸ ਵੀਡੀਓ 'ਚ ਸਲਮਾਨ ਖਾਨ ਜੰਗਲਾਤ ਵਿਭਾਗ ਦੇ ਦਫਤਰ 'ਚ ਬੈਠੇ ਹੋਏ ਦਿਖ ਰਹੇ ਹਨ।
ਵੀਡੀਓ 'ਚ ਦਿਖ ਰਿਹਾ ਹੈ ਕਿ ਜੰਗਲਾਤ ਕਰਮਚਾਰੀ ਸਲਮਾਨ ਖਾਨ ਦੇ ਬਿਆਨ ਰਿਕਾਰਡ ਕਰਨ ਤੋਂ ਬਾਅਦ ਮਾਮਲੇ ਦੇ ਕਾਗਜ਼ ਤਿਆਰ ਕਰ ਰਹੇ ਹਨ। ਵਾਇਰਲ ਹੋ ਰਹੀ ਇਸ ਵੀਡੀਓ 'ਚ ਸਲਮਾਨ ਖਾਨ ਪੂਰੇ ਟਸ਼ਨ 'ਚ ਦਿਖ ਰਹੇ ਹਨ, ਜਦਕਿ ਜੰਗਲਾਤ ਵਿਭਾਗ ਕਰਮਚਾਰੀ ਕਾਰਵਾਈ ਕਰਦੇ ਹੋਏ ਦਿਖ ਰਹੇ ਹਨ।
ਵੀਡੀਓ 'ਚ ਦਿਖ ਰਿਹਾ ਹੈ ਕਿ ਜਦੋਂ ਕਰਮਚਾਰੀ ਆਪਣੀ ਰਿਪੋਰਟ ਤਿਆਰ ਕਰ ਰਹੇ ਸਨ, ਉਸ ਦੌਰਾਨ ਸਲਮਾਨ ਖਾਨ ਕੁਰਸੀ 'ਤੇ ਪੈਰ ਰੱਖੀ ਨਜ਼ਰ ਆ ਰਹੇ ਹਨ।
ਜ਼ਿਕਰਯੋਗ ਹੈ ਕਿ ਇਹ ਮਾਮਲਾ ਸਾਲ 1998 ਦਾ ਹੈ, ਜਿਸ ਦੌਰਾਨ ਫਿਲਮ 'ਹਮ ਸਾਥ-ਸਾਥ ਹੈਂ' ਦੀ ਪੂਰੀ ਟੀਮ ਸ਼ੂਟਿੰਗ ਦੇ ਸਿਲਸਿਲੇ 'ਚ ਜੋਧਪੁਰ 'ਚ ਸੀ।
ਸਲਮਾਨ ਖਾਨ ਅਤੇ ਉਨ੍ਹਾਂ ਦੇ ਸਾਥੀਆਂ 'ਤੇ 2 ਚਿੰਕਾਰਾ ਅਤੇ 3 ਕਾਲੇ ਹਿਰਨਾਂ ਦੇ ਸ਼ਿਕਾਰ ਦਾ ਦੋਸ਼ ਲੱਗਾ ਸੀ। ਸਲਮਾਨ 'ਤੇ ਆਰਮਸ ਐਕਟ ਦੇ ਤਹਿਤ ਵੀ ਕੇਸ ਦਰਜ ਹੋਇਆ ਸੀ।