ਮੁੰਬਈ(ਬਿਊਰੋ)— ਬੀਤੀ 12 ਮਾਰਚ 1993 ਨੂੰ ਮੁੰਬਈ 'ਚ ਹੋਏ ਲੜੀਵਾਰ ਬੰਬ ਧਮਾਕਿਆਂ ਨੂੰ 25 ਸਾਲ ਹੋ ਚੁੱਕੇ ਹਨ। ਇਸ ਮਾਮਲੇ 'ਚ ਸੰਜੇ ਦੱਤ ਦਾ ਨਾਂ ਵੀ ਸਾਹਮਣੇ ਆਇਆ ਸੀ। ਸੰਜੇ ਦੱਤ 'ਤੇ ਅਬੂ ਸਲੇਮ ਤੋਂ ਗੈਰ-ਕਾਨੂੰਨੀ ਬੰਦੂਕਾਂ ਦੀ ਡਿਲੀਵਰੀ ਲੈਣ ਤੇ ਉਨ੍ਹਾਂ ਨੂੰ ਆਪਣੇ ਕੋਲ੍ਹ ਰੱਖਣ ਦਾ ਦੋਸ਼ ਲੱਗਾ ਸੀ।
ਆਰਮਸ ਐਕਟ ਦੇ ਤਹਿਤ ਦੋਸ਼ੀ ਠਹਿਰਾਏ ਗਏ ਸੰਜੇ ਦੱਤ ਦੀ ਗ੍ਰਿਫਤਾਰੀ ਤੋਂ ਲੈ ਕੇ ਉਨ੍ਹਾਂ ਨੂੰ ਸਲਾਖਾਂ ਪਿੱਛੇ ਭੇਜਣ 'ਚ ਸਭ ਤੋਂ ਅਹਿਮ ਰੋਲ ਆਈ. ਪੀ. ਐੱਸ. ਰਾਕੇਸ਼ ਮਾਰੀਆ ਨੇ ਨਿਭਾਇਆ ਸੀ।
ਅਸਲ 'ਚ ਮੁੰਬਈ ਪੁਲਸ ਨੇ ਸੰਜੇ ਨੂੰ ਏ. ਕੇ-47 ਤੇ ਦੂਜੇ ਹਥਿਆਰ ਰੱਖਣ ਦੇ ਕੇਸ 'ਚ ਗ੍ਰਿਫਤਾਰ ਕੀਤਾ ਸੀ। ਦੱਸਿਆ ਜਾਂਦਾ ਹੈ ਕਿ ਜਦੋਂ ਸੰਜੇ ਦਾ ਇੰਟੈਰੌਗੇਸ਼ਨ ਸ਼ੁਰੂ ਹੋਇਆ ਤਾਂ ਉਹ ਪੁਲਸ ਨੂੰ ਗੁਮਰਾਹ ਕਰਨ ਲੱਗੇ।
ਇਸ ਵਿਚਕਾਰ ਕੇਸ ਦੀ ਕਮਾਨ ਸੰਭਾਲ ਰਹੇ ਆਈ. ਪੀ. ਐੱਸ. ਮਾਰੀਆ ਜਦੋਂ ਇੰਟੈਰੌਗੇਸ਼ਨ ਰੂਮ 'ਚ ਪਹੁੰਚੇ ਤਾਂ ਸੰਜੇ ਉਨ੍ਹਾਂ ਨੂੰ ਦੇਖ ਕੇ ਡਰ ਗਏ। ਜਿਵੇਂ ਹੀ ਮਾਰੀਆ ਨੇ ਪੁੱਛਗਿਛ ਸ਼ੁਰੂ ਕੀਤੀ ਤਾਂ ਸੰਜੇ ਦੇ ਪਸੀਨੇ ਛੁੱਟ ਗਏ ਤੇ ਉਹ ਫੁੱਟ-ਫੁੱਟ ਕੇ ਰੋਣ ਲੱਗੇ ਤੇ ਹਥਿਆਰਾਂ ਨਾਲ ਜੁੜੇ ਸਾਰੇ ਰਾਜ਼ ਖੋਲ੍ਹ ਦਿੱਤੇ।
ਜ਼ਿਕਰਯੋਗ ਹੈ ਕਿ ਬੰਬ ਧਮਾਕਿਆ ਤੋਂ ਬਾਅਦ ਮਾਰੀਆ ਨੂੰ ਇਸ ਕੇਸ ਦੀ ਜਾਂਚ-ਪੜਤਾਲ ਦੀ ਜ਼ਿੰਮੇਦਾਰੀ ਮਿਲੀ ਸੀ। ਮੁੰਬਈ ਪੁਲਸ ਨੇ ਸੰਜੇ ਨੂੰ ਏ. ਕੇ-47 ਤੇ ਹਥਿਆਰ ਰੱਖਣ ਦੇ ਕੇਸ 'ਚ ਗ੍ਰਿਫਤਾਰ ਕੀਤਾ ਸੀ।
