ਮੁੰਬਈ(ਬਿਊਰੋ)— ਰਣਬੀਰ ਕਪੂਰ ਦੀ ਫਿਲਮ 'ਸੰਜੂ' ਨੇ ਬਾਕਸ ਆਫਿਸ 'ਤੇ 300 ਕਰੋੜ ਰੁਪਏ ਦੀ ਕਮਾਈ ਕਰਨ ਵਾਲੀ ਤੀਜੀ ਫਿਲਮ ਬਣ ਗਈ ਹੈ। ਹੁਣ ਤੱਕ ਸਭ ਤੋਂ ਜ਼ਿਆਦਾ ਕਮਾਈ ਕਰਨ ਵਾਲੀਆਂ ਫਿਲਮਾਂ 'ਚ 'ਬਾਹੂਬਲੀ 2' ਦਾ ਨਾਂ ਸ਼ਾਮਲ ਹੈ, ਜਿਸ ਨੇ 511 ਕਰੋੜ ਰੁਪਏ ਦੀ ਕਮਾਈ ਕੀਤੀ ਸੀ। ਉੱਥੇ ਪਿਛਲੇ ਕੁਝ ਸਾਲਾਂ ਤੋਂ 300 ਕਰੋੜ ਰੁਪਏ ਦੇ ਕਲੱਬ ਦੇ ਦਾਇਰੇ 'ਚ ਤੇਜ਼ੀ ਨਾਲ ਵਾਧਾ ਹੋ ਰਿਹਾ ਹੈ।
ਸਾਲ 2014 'ਚ ਆਮਿਰ ਖਾਨ ਦੀ ਫਿਲਮ 'ਪੀ. ਕੇ.' 300 ਕਰੋੜ ਰੁਪਏ ਦਾ ਅੰਕੜਾ ਪਾਰ ਕਰਨ ਵਾਲੀ ਪਹਿਲੀ ਫਿਲਮ ਬਣੀ। ਉਸ ਤੋਂ ਬਾਅਦ ਬਾਲੀਵੁੱਡ ਨੂੰ ਹਰ ਸਾਲ 300 ਕਰੋੜ ਰੁਪਏ ਦੀ ਕਮਾਈ ਕਰਨ ਵਾਲੀ ਘੱਟੋ-ਘੱਟ ਇਕ ਫਿਲਮ ਮਿਲ ਹੀ ਜਾਂਦੀ ਹੈ।
ਜਿਨ੍ਹਾਂ 7 ਫਿਲਮਾਂ ਨੇ 300 ਕਰੋੜ ਰੁਪਏ ਦੇ ਆਂਕੜੇ ਪਾਰ ਕੀਤੇ ਹਨ, ਉਨ੍ਹਾਂ 'ਚੋਂ ਪੰਜ ਫਿਲਮਾਂ ਤਾਂ ਪਿਛਲੇ ਢਾਈ ਸਾਲਾਂ 'ਚ ਰਿਲੀਜ਼ ਹੋਈਆਂ ਹਨ। ਸ਼ਾਹਰੁਖ ਖਾਨ ਨੇ ਬਾਲੀਵੁੱਡ ਦੇ ਕਿੰਗ ਦਾ ਤਾਜ ਜ਼ਰੂਰ ਬਰਕਰਾਰ ਰੱਖਿਆ ਹੈ ਪਰ ਉਨ੍ਹਾਂ ਵੱਲੋਂ ਇਸ ਕਲੱਬ 'ਚ ਆਪਣੀ ਮੌਜੂਦਗੀ ਦਰਜ ਕਰਾਉਣੀ ਬਾਕੀ ਹੈ।
ਬਾਲੀਵੁੱਡ ਦੇ ਖਿਲਾੜੀ ਅਕਸ਼ੈ ਕੁਮਾਰ ਵੀ ਇਸ ਕਲੱਬ 'ਚ ਹਾਲੇ ਤੱਕ ਸ਼ਾਮਲ ਨਹੀ ਹੋ ਸਕੇ ਹਨ। ਆਮਿਰ ਖਾਨ ਅਤੇ ਸਲਮਾਨ ਖਾਨ ਦੀਆਂ ਫਿਲਮਾਂ ਦਾ ਦਬਦਬਾ 300 ਕਰੋੜੀ ਕਲੱਬ 'ਚ ਬਰਕਰਾਰ ਹੈ।
300 ਕਰੋੜ ਰੁਪਏ ਦੀ ਕਮਾਈ ਕਰਨ ਵਾਲੀਆਂ 7 ਫਿਲਮਾਂ 'ਚੋਂ 5 ਫਿਲਮਾਂ ਇਨ੍ਹਾਂ ਦੋਹਾਂ ਅਭਿਨੇਤਾਵਾਂ ਦੀਆਂ ਹੀ ਹਨ।
ਜਿੱਥੇ ਇਕ ਪਾਸੇ ਆਮਿਰ ਦੇ ਖਾਤੇ 'ਚ 'ਦੰਗਲ' ਅਤੇ 'ਪੀ. ਕੇ.' ਵਰਗੀਆਂ ਫਿਲਮਾਂ ਆਈਆਂ, ਉੱਥੇ ਦੂਜੇ ਪਾਸੇ ਸਲਮਾਨ ਖਾਨ ਦੇ ਖਾਤੇ 'ਚ 'ਬਜਰੰਗੀ ਭਾਈਜਾਨ', 'ਸੁਲਤਾਨ' ਅਤੇ 'ਟਾਈਗਰ ਜ਼ਿੰਦਾ ਹੈ' ਵਰਗੀਆਂ ਫਿਲਮਾਂ ਸ਼ਾਮਲ ਹਨ।
