ਮੁੰਬਈ(ਬਿਊਰੋ)— 'ਬਿੱਗ ਬੌਸ 11' ਖਤਮ ਹੋਣ ਤੋਂ ਬਾਅਦ ਸਾਰੇ ਮੁਕਾਬਲੇਬਾਜ਼ ਆਪਣੀ-ਆਪਣੀ ਜ਼ਿੰਦਗੀ 'ਚ ਵਾਪਸ ਆ ਚੁੱਕੇ ਹਨ। 'ਬਿੱਗ ਬੌਸ' ਸ਼ੋਅ 'ਚ ਕਾਫੀ ਮੁਕਾਬਲੇਬਾਜਾਂ ਨੂੰ ਫੇਮ ਹਾਸਿਲ ਹੋਇਆ। ਅੱਜ ਕੋਈ ਫਿਲਮ ਕਰ ਰਿਹਾ ਹੈ ਤਾਂ ਕੋਈ ਦੂਜੇ ਸ਼ੋਅਜ਼ 'ਚ ਨਜ਼ਰ ਆ ਰਿਹਾ ਹੈ। ਫਿਲਹਾਲ ਅਸੀਂ ਇੱਥੇ ਹਰਿਆਣਾ ਦੀ ਸ਼ਾਨ ਸਪਨਾ ਚੌਧਰੀ ਦੀ ਗੱਲ ਕਰ ਰਹੇ ਹਾਂ। ਬਿੱਗ ਬੌਸ ਦੇ ਘਰੋਂ ਬਾਹਰ ਨਿਕਲਦੇ ਹੀ ਸਪਨਾ ਨੇ ਨਵਾਂ ਧਮਾਕਾ ਕਰ ਦਿੱਤਾ ਹੈ। ਉਂਝ ਤਾਂ ਬਿੱਗ ਬੌਸ ਦੇ ਘਰੋਂ ਬਾਹਰ ਨਿਕਲਦੇ ਹੀ ਸਪਨਾ ਚੌਧਰੀ ਨੂੰ ਬਾਲੀਵੁੱਡ ਤੋਂ ਆਫਰ ਮਿਲ ਚੁੱਕਾ ਸੀ।
ਅਭੈ ਦਿਓਲ ਨਾਲ ਇਕ ਫਿਲਮ 'ਚ ਸਪਨਾ ਤੋਂ ਇਲਾਵਾ ਅਦਾਕਾਰਾ ਪੱਤਰਲੇਖਾ ਵੀ ਨਜ਼ਰ ਆਵੇਗੀ। ਵਾਇਰਲ ਹੋ ਰਹੀ ਇਕ ਤਸਵੀਰ ਨੂੰ ਦੇਖ ਕੇ ਅਜਿਹਾ ਲੱਗ ਰਿਹਾ ਸੀ ਕਿ ਇਹ ਕਿਸੇ ਡਾਂਸ ਸੀਕਵੈਂਸ ਦਾ ਸੈਟਅੱਪ ਹੈ। ਇਸ 'ਚ ਦੋਵੇਂ ਇਕ ਚਾਰਪਾਈ 'ਤੇ ਬੈਠੇ ਦਿਖ ਰਹੇ ਸਨ। ਹੁਣ ਭੋਜਪੁਰੀ ਦੀ ਦੁਨੀਆ 'ਚ ਵੀ ਉਨ੍ਹਾਂ ਨੇ ਕਦਮ ਰੱਖਿਆ ਹੈ। ਹਰਿਆਣਾ ਤੋਂ ਬਾਅਦ ਸਪਨਾ ਦੇ ਠੁਮਕੇ ਯੂਪੀ ਤੇ ਬਿਹਾਰ ਵਾਲਿਆਂ ਦੇ ਹੋਸ਼ ਉਡਾ ਦੇਣ ਵਾਲੇ ਹਨ।
ਜੀ ਹਾਂ, 'ਬੈਰੀ ਕੰਗਨਾ 2' ਨਾ ਦੀ ਭੋਜਪੁਰੀ ਫਿਲਮ 'ਚ ਸਪਨਾ ਚੌਧਰੀ ਨੇ ਇਕ ਆਈਟਮ ਨੰਬਰ ਕੀਤਾ ਹੈ। ਸ਼ੂਟਿੰਗ ਖਤਮ ਹੋ ਚੁੱਕੀ ਹੈ ਤੇ ਫਿਲਮ ਜਲਦ ਹੀ ਰਿਲੀਜ਼ ਹੋਵੇਗੀ। ਇਸ ਆਈਟਮ ਨੰਬਰ ਦੀਆਂ ਤਸਵੀਰਾਂ ਕਾਫੀ ਵਾਇਰਲ ਹੋ ਰਹੀਆਂ ਹਨ। ਫਿਲਮ 'ਚ ਭੋਜਪੁਰੀ ਦੇ ਮਹਾਨਾਇਕ ਰਵੀ ਕਿਸ਼ਨ ਲੀਡ ਰੋਲ 'ਚ ਹਨ ਤੇ ਕਾਜਲ ਰਾਘਵਾਨੀ ਉਨ੍ਹਾਂ ਦੇ ਆਪੋਜ਼ਿਟ ਸਾਈਨ ਕੀਤੀ ਗਈ ਹੈ।
ਰਵੀ ਕਿਸ਼ਨ ਤੋਂ ਇਲਾਵਾ ਸੁਧੀਰ ਸ਼ਰਮਾ, ਆਸ਼ੀਸ਼ ਸਿੰਘ ਤੋ ਸੰਜੇ ਪਾਂਡੇ ਵੀ ਮੁਖ ਕਿਰਦਾਰਾਂ 'ਚ ਨਜ਼ਰ ਆਉਣ ਵਾਲੇ ਹਨ। ਜ਼ਿਕਰਯੋਗ ਹੈ ਕਿ ਸਾਲ 1992 'ਚ ਭੋਜਪੁਰੀ ਫਿਲਮ 'ਬੈਰੀ ਕੰਗਨਾ' ਰਿਲੀਜ਼ ਹੋਈ ਸੀ, ਜੋ ਬਾਕਸ ਆਫਿਸ 'ਤੇ ਸੁਪਰ-ਡੁਪਰ ਹਿੱਟ ਹੋਈ ਸੀ। ਹੁਣ ਇਸ ਫਿਲਮ ਦੀ ਸੀਕਵਲ 'ਬੈਰੀ ਕੰਗਨਾ 2' 'ਤੇ ਵੀ ਜ਼ੋਰਦਾਰ ਕੰਮ ਚੱਲ ਰਿਹਾ ਹੈ। ਫਿਲਮ ਦੇ ਸੈੱਟ ਤੋਂ ਸਪਨਾ ਚੌਧਰੀਆਂ ਦੀਆਂ ਕਾਫੀ ਤਸਵੀਰਾਂ ਵਾਇਰਲ ਹੋ ਰਹੀਆਂ ਹਨ।