ਮੁੰਬਈ(ਬਿਊਰੋ)— ਬਾਲੀਵੁੱਡ ਸੁਪਰਸਟਾਰ ਸਲਮਾਨ ਖਾਨ ਦੇ ਰਿਐਲਿਟੀ ਸ਼ੋਅ 'ਬਿੱਗ ਬੌਸ 12' ਦੇ ਟੇਲੀਕਾਸਟ ਡੇਟ ਦੇ ਸਾਹਮਣੇ ਆਉਣ ਤੋਂ ਬਾਅਦ ਹੀ ਇਸ ਸ਼ੋਅ 'ਚ ਮੁਕਾਬਲੇਬਾਜ਼ ਦੇ ਤੌਰ 'ਤੇ ਐਂਟਰੀ ਲੈਣ ਵਾਲੇ ਸਿਤਾਰਿਆਂ ਦੇ ਨਾਂ ਬਾਹਰ ਆਉਣੇ ਸ਼ੁਰੂ ਹੋ ਗਏ ਹਨ। ਸੂਤਰਾਂ ਮੁਤਾਬਕ, ਟੀ. ਵੀ. ਅਦਾਕਾਰਾ ਸ਼ਫਕ ਨਾਜ਼, 'ਬਿੱਗ ਬੌਸ 12' ਦਾ ਹਿੱਸਾ ਬਣਨ ਵਾਲੀ ਹੈ ਪਰ ਹੁਣ ਸਪਾਟਬੁਆਏ ਦੀ ਖਬਰ ਮੁਤਾਬਕ ਸ਼ਫਕ ਇਸ ਵਿਵਾਦਿਤ ਸ਼ੋਅ ਦਾ ਹਿੱਸਾ ਨਹੀਂ ਬਣ ਰਹੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਸ਼ਫਕ ਸਟਾਰ ਪਲੱਸ ਦੇ ਸ਼ੋਅ 'ਕੁਲਫੀ ਕੁਮਾਰ ਬਾਜੇਵਾਲਾ' 'ਚ ਐਂਟਰੀ ਕਰਨ ਕਰਨ ਵਾਲੀ ਹੈ ਅਤੇ ਇਸ ਵਾਰ ਉਹ ਇਕ ਡਾਕਟਰ ਦਾ ਕਿਰਦਾਰ ਨਿਭਾਉਂਦੀ ਨਜ਼ਰ ਆਵੇਗੀ। ਸ਼ਫਕ ਫਿਲਹਾਲ ਸੈੱਟ 'ਤੇ ਹੈ ਅਤੇ ਆਪਣਾ ਪਹਿਲਾ ਸੀਕਵੈਸ ਮੁੰਬਈ ਦੇ ਫਿਲਮ ਸਿਟੀ 'ਚ ਸ਼ੂਟ ਕਰ ਰਹੀ ਹੈ। ਦੱਸ ਦੇਈਏ ਕਿ ਸ਼ੋਅ ਨਾਲ ਜੁੜਨ ਦੀ ਖਬਰ ਦੀ ਪੁਸ਼ਟੀ ਖੁਦ ਸ਼ਫਕ ਨੇ ਨਹੀਂ ਦਿੱਤੀ। ਉਸ ਨੇ ਕਿਹਾ, ''ਹਾਂ, ਮੈਂ ਆਪਣੇ ਨਵੇਂ ਪ੍ਰੋਜੈਕਟ ਨੂੰ ਲੈ ਕੇ ਕਾਫੀ ਉਤਸ਼ਾਹਿਤ ਹਾਂ ਪਰ ਅਜੇ ਮੈਂ ਆਪਣੇ ਨਵੇਂ ਕਿਰਦਾਰ ਬਾਰੇ ਜ਼ਿਆਦਾ ਕੁਝ ਨਹੀਂ ਆਖ ਸਕਦੀ। ਮੈਂ ਸਿਰਫ ਇੰਨਾਂ ਹੀ ਕਹਾਂਗੀ ਕਿ ਮੈਂ ਇਸ ਸ਼ੋਅ 'ਚ ਇਕ ਡਾਕਟਰ ਦਾ ਕਿਰਦਾਰ ਨਿਭਾ ਰਹੀ ਹਾਂ, ਜੋ ਕਿ ਸੀਰੀਅਲ 'ਚ ਨਵਾਂ ਮੋੜ ਲੈ ਕੇ ਆਵੇਗਾ। ਫਿਲਹਾਲ ਤਾਂ ਇਹ ਇਕ ਕੈਮਿਓ ਹੈ ਪਰ ਜਿਵੇਂ-ਜਿਵੇਂ ਕਹਾਣੀ ਅੱਗੇ ਵਧੇਗੀ ਸਭ ਦਾ ਖੁਲਾਸਾ ਆਪਣੇ ਆਪ ਹੀ ਹੋ ਜਾਵੇਗਾ।'' ਹਾਲ ਹੀ 'ਚ ਸ਼ਫਕ ਆਪਣੀ ਭੈਣ ਦੀ ਵਜ੍ਹਾ ਨਾਲ ਸੁਰਖੀਆਂ 'ਚ ਆਈ ਸੀ ਜਦੋਂ ਉਸ ਦੀ ਭੈਣ ਫਲਕ ਨੇ ਇਹ ਕਹਿ ਕੇ ਸਾਰਿਆਂ ਨੂੰ ਹੈਰਾਨ ਕਰ ਦਿੱਤਾ ਸੀ ਕਿ ਦੋਵਾਂ ਭੈਣਾਂ 'ਚ ਪਿਛਲੇ ਦੋ ਸਾਲਾਂ ਤੋਂ ਕੋਈ ਗੱਲਬਾਤ ਨਹੀਂ ਹੈ। ਇਸ ਤੋਂ ਪਹਿਲਾਂ ਵੀ ਪੈਸਿਆਂ ਨੂੰ ਲੈ ਕੇ ਆਪਣੀ ਮਾਂ ਨਾਲ ਅਣਬਨ ਦੀ ਵਜ੍ਹਾ ਨਾਲ ਉਹ ਕਾਫੀ ਸੁਰਖੀਆਂ 'ਚ ਰਹਿ ਚੁੱਕੀ ਸੀ।