ਮੁੰਬਈ(ਬਿਊਰੋ) : ਬਾਲੀਵੁੱਡ ਦੇ ਬਾਦਸ਼ਾਹ ਸ਼ਾਹਰੁਖ ਖਾਨ ਅਤੇ ਆਮਿਰ ਖਾਨ ਨੂੰ ਕਦੇ ਵੱਡੇ ਪਰਦੇ ਤਾਂ ਇਕੱਠੇ ਨਹੀਂ ਦੇਖਿਆ ਪਰ ਰਾਜਸਥਾਨ 'ਚ ਮੁਕੇਸ਼ ਅੰਬਾਨੀ ਦੀ ਧੀ ਈਸ਼ਾ ਅੰਬਾਨੀ ਦੇ ਵਿਆਹ 'ਚ ਦੋਵਾਂ ਨੂੰ ਇਕੱਠੇ ਸਟੇਜ 'ਤੇ ਦੇਖਿਆ ਗਿਆ। ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਹੀ ਵੀਡੀਓ 'ਚ ਦੋਵੇਂ ਇਕ ਗੀਤ 'ਤੇ ਝੂਮਦੇ ਨਜ਼ਰ ਆ ਰਹੇ ਹਨ। ਦਰਸ਼ਕਾਂ ਨੂੰ ਇਸ ਜੋੜੀ ਦਾ ਇੰਤਜ਼ਾਰ ਪਿਛਲੇ ਕਾਫੀ ਲੰਬੇ ਸਮੇਂ ਤੋਂ ਸੀ। ਈਸ਼ਾ ਅੰਬਾਨੀ ਦੀ ਸੰਗੀਤ ਸੈਰੇਮਨੀ 'ਚ ਇਨ੍ਹਾਂ ਦੋਵੇਂ ਹਸਤੀਆਂ ਨੇ ਰੰਗ ਮੰਚ 'ਤੇ ਇਕੱਠੇ ਤਹਿਲਕਾ ਮਚਾ ਦਿੱਤਾ।
ਦੱਸ ਦੇਈਏ ਕਿ ਇਸ ਵੱਡੇ ਵਿਆਹ 'ਚ ਦੋਵੇਂ ਬਤੌਰ ਮਹਿਮਾਨ ਪੁੱਜੇ ਸਨ। ਆਮੀਰ ਖਾਨ ਨੇ ਸ਼ਾਹਰੁਖ ਖਾਨ ਨਾਲ ਡਾਂਸ ਪਰਫਾਰਮੈਂਸ ਦੇ ਕੇ ਸਰੋਤਿਆਂ ਦਾ ਦਿਲ ਜਿੱਤਿਆ। ਦੋਵਾਂ ਨੇ 'ਕਪੂਰ ਐਂਡ ਸੰਨ' ਨਾਮ ਦੀ ਆਈ ਫਿਲਮ ਦੇ ਗੀਤ 'ਚਲੋ ਨੱਚੋ' 'ਤੇ ਪਰਫਾਰਮ ਕੀਤਾ।
ਇਨ੍ਹਾਂ ਦੀ ਪਰਫਾਰਮੈਂਸ ਦੌਰਾਨ ਪੂਰਾ ਸਟੇਜ ਭਰਿਆ ਹੋਇਆ ਸੀ ਅਤੇ ਸਾਰੇ ਮਸਤੀ 'ਚ ਡਾਂਸ ਕਰ ਰਹੇ ਸਨ। ਆਮਿਰ ਖਾਨ ਦੇ ਨਾਲ ਡਾਂਸ ਕਰਨ ਤੋਂ ਇਲਾਵਾ ਸ਼ਾਹਰੁਖ ਨੇ ਗੌਰੀ ਖਾਨ ਨਾਲ ਵੀ ਡਾਂਸ ਕੀਤਾ।
ਦੱਸ ਦਈਏ ਕਿ ਅਜਿਹਾ ਘੱਟ ਹੀ ਦੇਖਣ ਨੂੰ ਮਿਲਦਾ ਹੈ ਜਦੋਂ ਕਿੰਗ ਖਾਨ ਆਪਣੀ ਕੁਈਨ ਨਾਲ ਪਰਫਾਰਮ ਕਰਦੇ ਦਿਖਦੇ ਹਨ। ਅਜਿਹੇ 'ਚ ਇਹ ਮੌਕਾ ਸਾਰਿਆਂ ਲਈ ਕਾਫੀ ਖਾਸ ਸੀ। ਸ਼ਾਹਰੁਖ ਨੇ ਗੌਰੀ ਨਾਲ 'ਦਿੱਲੀ ਵਾਲੀ ਗਰਲਫ੍ਰੈਂਡ' ਗੀਤ 'ਤੇ ਡਾਂਸ ਕੀਤਾ। ਇਸ ਵਿਆਹ 'ਚ ਪੂਰੀ ਬਾਲੀਵੁੱਡ ਇੰਡਸਟਰੀ ਦਾ ਜਮਾਵੜਾ ਲੱਗਿਆ ਹੋਇਆ ਸੀ, ਜਿੰਨ੍ਹਾਂ 'ਚ ਰਣਵੀਰ-ਦੀਪਿਕਾ, ਐਸ਼ਵਰੀਆ-ਅਭਿਸ਼ੇਕ ਬੱਚਨ, ਅਮਿਤਾਬ ਬੱਚਨ, ਪ੍ਰਿਯੰਕਾ-ਨਿੱਕ ਸਮੇਤ ਹੋਰ ਸਿਤਾਰੇ ਵੀ ਨਜ਼ਰ ਆਏ।