ਮਜਦੂਰ ਦੀ ਗਾਇਕੀ ਤੋਂ ਸ਼ੰਕਰ ਮਹਾਦੇਵਨ ਹੋਏ ਪ੍ਰਭਾਵਿਤ, ਨਾਲ ਗਾਉਣ ਦੀ ਜਤਾਈ ਇੱਛਾ

ਮੁੰਬਈ (ਬਿਊਰੋ)— ਸ਼ੰਕਰ ਮਹਾਦੇਵਨ ਅੱਜ ਦੇਸ਼ ਦੇ ਸਭ ਤੋਂ ਸਫਲ ਮਿਊਜ਼ਿਕ ਕੰਪੋਜ਼ਰਾਂ 'ਚ ਗਿਣੇ ਜਾਂਦੇ ਹਨ। ਜਗ੍ਹਾ-ਜਗ੍ਹਾ ਉਹ ਲਾਈਵ ਕੰਸਰਟ ਕਰਦੇ ਰਹਿੰਦੇ ਹਨ। ਉਨ੍ਹਾਂ ਨੂੰ ਸੁਣਨ ਲਈ ਲੋਕ ਵੱਡੀ ਗਿਣਤੀ 'ਚ ਆਉਂਦੇ ਹਨ ਪਰ ਇਕ ਸ਼ਖਸ ਅਜਿਹਾ ਵੀ ਹੈ, ਜਿਸ ਦੀ ਗਾਇਕੀ ਦੇ ਸ਼ੰਕਰ ਮੁਰੀਦ ਹੋ ਗਏ ਹਨ। ਉਨ੍ਹਾਂ ਨੇ ਸੋਸ਼ਲ ਮੀਡੀਆ 'ਤੇ ਇਸ ਗੱਲ ਦੀ ਜਾਣਕਾਰੀ ਦਿੱਤੀ ਹੈ ਤੇ ਉਕਤ ਸ਼ਖਸ ਨਾਲ ਗੀਤ ਗਾਉਣ ਦੀ ਇੱਛਾ ਵੀ ਜ਼ਾਹਿਰ ਕੀਤੀ ਹੈ।
ਕੇਰਲ ਦੇ ਰਹਿਣ ਵਾਲੇ ਰਾਕੇਸ਼ ਉੱਨੀ ਨੇ ਕਮਲ ਹਾਸਨ ਦੀ ਫਿਲਮ 'ਵਿਸ਼ਵਰੂਮਨ' ਦਾ ਇਕ ਗੀਤ ਗਾਇਆ ਹੈ। ਰਾਕੇਸ਼ ਪੇਸ਼ੇ ਤੋਂ ਇਕ ਮਜਦੂਰ ਹੈ। ਰਾਕੇਸ਼ ਵਲੋਂ ਗਾਇਆ ਸ਼ੰਕਰ ਮਹਾਦੇਵਨ ਦਾ ਇਹ ਗੀਤ ਸ਼ੁੱਕਰਵਾਰ ਤੋਂ ਕਾਫੀ ਵਾਇਰਲ ਹੋ ਰਿਹਾ ਹੈ।

ਖੁਦ ਸ਼ੰਕਰ ਨੇ ਵੀ ਗੀਤ ਨੂੰ ਫੇਸਬੁੱਕ 'ਤੇ ਸ਼ੇਅਰ ਕਰਦਿਆਂ ਲਿਖਿਆ, 'ਇਹ ਆਦਮੀ ਕੌਣ ਹੈ? ਇਸ ਨੂੰ ਕਹਿੰਦੇ ਹਨ ਮਿਹਨਤ ਦਾ ਫਲ ਮਿਲਣਾ। ਜਦੋਂ ਮੈਂ ਇਹ ਗੀਤ ਸੁਣਿਆ ਤਾਂ ਮੈਨੂੰ ਆਪਣੇ ਦੇਸ਼ 'ਤੇ ਮਾਣ ਮਹਿਸੂਸ ਹੋਇਆ। ਇਥੇ ਇੰਨੇ ਟੈਲੇਂਟਿਡ ਤੇ ਕਲਾ ਦੇ ਧਨੀ ਲੋਕ ਪੈਦਾ ਹੁੰਦੇ ਹਨ?'

ਸ਼ੰਕਰ ਮਹਾਦੇਵਨ ਨੇ ਕਿਸੇ ਤਰ੍ਹਾਂ ਗੀਤ ਗਾਉਣ ਵਾਲੇ ਸ਼ਖਸ ਦਾ ਫੋਨ ਨੰਬਰ ਲੱਭਿਆ ਤੇ ਉਸ ਨੂੰ ਫੋਨ ਮਿਲਾਇਆ। ਰਾਕੇਸ਼ ਨੇ ਉਨ੍ਹਾਂ ਨੂੰ ਮਿਲਣ ਦੀ ਇੱਛਾ ਜ਼ਾਹਿਰ ਕੀਤੀ। ਸ਼ੰਕਰ ਨੇ ਕਿਹਾ ਕਿ ਉਹ ਉਸ ਨੂੰ ਮਿਲਣ ਦੇ ਨਾਲ-ਨਾਲ ਗੀਤ ਵੀ ਰਿਕਾਰਡ ਕਰਨਗੇ। ਇਕ ਇੰਟਰਵਿਊ ਦੌਰਾਨ ਰਾਕੇਸ਼ ਨੇ ਦੱਸਿਆ ਕਿ ਉਸ ਦੇ ਇਕ ਡਰਾਈਵਰ ਦੋਸਤ ਨੇ ਇਹ ਗੀਤ ਰਿਕਾਰਡ ਕੀਤਾ ਤੇ ਵੀਡੀਓ ਪੋਸਟ ਕਰ ਦਿੱਤੀ। ਉਸ ਨੂੰ ਇਸ ਬਾਰੇ ਉਦੋਂ ਤਕ ਪਤਾ ਨਹੀਂ ਲੱਗਾ, ਜਦੋਂ ਤਕ ਕੁਵੈਤ ਤੋਂ ਉਸ ਦੀ ਭੈਣ ਦੇ ਪਤੀ ਨੇ ਇਸ ਦੀ ਜਾਣਕਾਰੀ ਨਹੀਂ ਦਿੱਤੀ।