ਮੁੰਬਈ(ਬਿਊਰੋ)— ਸਿਆਸਤਦਾਨਾਂ ਤੇ ਮੀਡੀਆ ਮਾਲਕਾਂ ਦਰਮਿਆਨ ਗੰਢਤੁਪ ਦੇ ਮੁੱਦੇ 'ਤੇ ਸਾਲ 1986 'ਚ ਆਈ ਫਿਲਮ 'ਨਿਊ ਦੇਹਲੀ ਟਾਈਮਜ਼' 'ਚ ਕੰਮ ਕਰਨ ਬਦਲੇ ਅਦਾਕਾਰ ਸ਼ਸ਼ੀ ਕਪੂਰ ਨੇ ਮਹਿਜ਼ 101 ਰੁਪਏ ਲਏ ਸਨ। ਇਸ ਫਿਲਮ 'ਚ ਈਮਾਨਦਾਰ ਪੱਤਰਕਾਰ ਦੀ ਭੂਮਿਕਾ ਨਿਭਾਉਣ ਬਦਲੇ ਸ਼ਸ਼ੀ ਕਪੂਰ ਨੂੰ ਬੇਹਿਤਰੀਨ ਅਦਾਕਾਰੀ ਲਈ ਕੌਮੀ ਪੁਰਸਕਾਰ ਨਾਲ ਨਵਾਜਿਆ ਗਿਆ ਸੀ।
ਆਪਣੇ ਸਮੇਂ ਦੇ ਕਮਰਸ਼ੀਅਲ ਸਿਨਮਾ ਦੇ ਸੁਪਰਸਟਾਰ ਸ਼ਸ਼ੀ ਕਪੂਰ ਉਨ੍ਹਾਂ ਮਸ਼ਹੂਰ ਹਸਤੀਆਂ 'ਚੋਂ ਸਨਸ ਜੋ ਫਿਲਮਸਾਜ਼ ਤੇ ਅਦਾਕਾਰ ਦੇ ਨਾਤੇ ਕਲਾ ਸਿਨਮਾ ਨੂੰ ਸਿਖਰਾਂ 'ਤੇ ਪਹੁੰਚਾਇਆ।
ਫਿਲਮ ਦੇ ਨਿਰਦੇਸ਼ਕ ਰਮੇਸ਼ ਸ਼ਰਮਾ ਨੇ 10ਵੇਂ ਬਿਫੀਜ਼ ਸਮਾਰੋਹ ਮੌਕੇ ਬਾਲੀਵੁੱਡ ਦੇ ਇਸ ਅਜ਼ੀਮ ਅਦਾਕਾਰ ਨੂੰ ਅਕੀਦਤ ਦੇਣ ਲਈ ਇਸ 'ਤੇ ਡਰਾਮਾ ਪੇਸ਼ ਕੀਤਾ।
ਸ਼ਸ਼ੀ ਕਪੂਰ ਦਾ ਪਿਛਲੇ ਸਾਲ 79 ਸਾਲ ਦੀ ਉਮਰ 'ਚ ਦੇਹਾਂਤ ਹੋਇਆ ਸੀ। ਉਨ੍ਹਾਂ ਦੱਸਿਆ, ''ਮੈਂ ਜਦੋਂ ਸ਼ਸ਼ੀ ਕਪੂਰ ਨੂੰ ਮਿਲਣ ਗਿਆ ਤਾਂ ਉਹ ਮੈਨੂੰ ਬੰਬਈ ਦੇ ਗੋਲਡਨ ਡਰੈਗਨ ਹੋਟਲ 'ਚ ਡਿਨਰ ਲਈ ਲੈ ਗਏ ਸਨ। ਮੈਂ ਉਨ੍ਹਾਂ ਨੂੰ ਫਿਲਮ ਦੀ ਕਹਾਣੀ ਸੁਣਾਈ ਤੇ ਫਰਮਾਇਸ਼ ਕੀਤੀ ਕਿ ਉਹ ਫਿਲਮ 'ਚ ਮੁੱਖ ਕਿਰਦਾਰ ਨਿਭਾਉਣ।
ਇਸ ਤੋਂ ਬਾਅਦ ਉਨ੍ਹਾਂ ਨੇ ਸਵਾਲ ਕੀਤਾ, ਤੁਹਾਡੀ ਜੇਬ 'ਚ ਕਿੰਨੇ ਪੈਸੇ ਹਨ ਤਾਂ ਮੈਂ ਸੋਚਿਆ ਕਿ ਉਹ ਬਿੱਲ ਚੁਕਤਾ ਕਰਨ ਲਈ ਪੁੱਛ ਰਹੇ ਹਨ? ਮੈਂ ਕਿਹਾ 'ਮੇਰੇ ਕੋਲ ਹਜ਼ਾਰ ਰੁਪਏ ਹਨ।' ਇਸ 'ਤੇ ਕਪੂਰ ਨੇ ਕਿਹਾ 100 ਰੁਪਏ ਕੱਢੋ। ਇਹ ਰਹੀ ਕਰਾਰਨਾਮਾ ਫੀਸ। ਮੈਂ ਤੁਹਾਡੀ ਫਿਲਮ 'ਚ ਕੰਮ ਕਰ ਰਿਹਾ ਹਾਂ।''