ਮੁੰਬਈ(ਬਿਊਰੋ)— ਅਦਾਕਾਰ ਤੇ ਭਾਜਪਾ ਸੰਸਦ ਸ਼ਤਰੂਘਨ ਸਿਨਹਾ ਦੇ ਜੁਹੂ ਸਥਿਤ ਘਰ ਰਾਮਾਇਣ 'ਚ ਬੀ. ਐੱਮ. ਸੀ. ਨੇ ਨਜਾਇਜ਼ ਨਿਰਮਾਣ ਨੂੰ ਤੋੜਿਆ ਹੈ। ਬੀ. ਐੱਮ. ਸੀ. ਨੇ 8 ਮੰਜ਼ਿਲੀ ਇਮਾਰਤ ਅੰਦਰ ਕੀਤੇ ਨਜਾਇਜ਼ ਨਿਰਮਾਣ 'ਤੇ ਕਾਰਵਾਈ ਕੀਤੀ ਹੈ। ਸ਼ਤਰੂਘਨ ਸਿਨਹਾ ਇੱਥੇ ਪਰਿਵਾਰ ਨਾਲ ਰਹਿੰਦੇ ਹਨ। ਬੀ. ਐੱਮ. ਸੀ. ਦੀ ਇਸ ਕਾਰਵਾਈ 'ਤੇ ਸ਼ਤਰੂਘਨ ਸਿਨਹਾ ਨੇ ਕਿਹਾ, ਉਨ੍ਹਾਂ ਦੇ ਘਰ 'ਚ ਮਾਮੂਲੀ ਬਦਲਾਅ ਹੋਏ ਸਨ। ਮੈਂ ਬੀ. ਐੱਮ. ਸੀ. ਕਰਮਚਾਰੀ ਨੂੰ ਇਸ ਨਿਰਮਾਣ ਨੂੰ ਹਟਾਉਣ 'ਚ ਸਹਿਯੋਗ ਦਿੱਤਾ।
ਅਸੀਂ ਉੱਪਰ ਟਾਇਲੇਟ ਇਸ ਲਈ ਬਣਾਇਆ ਸੀ ਤਾਂ ਕਿ ਵਰਕਰਜ਼ ਉਸ ਦਾ ਇਸਤੇਮਾਲ ਕਰ ਸਕਨ। ਸਾਨੂੰ ਬੀ. ਐੱਮ. ਸੀ. ਤੋਂ ਕੋਈ ਇਤਰਾਜ਼ ਨਹੀਂ ਹੈ। ਮੰਦਰ ਨੂੰ ਉਸ ਜਗ੍ਹਾ ਤੋਂ ਫਿਲਹਾਲ ਸ਼ਿਫਟ ਕਰ ਦਿੱਤਾ ਗਿਆ ਹੈ। ਬੀ. ਐੱਮ. ਸੀ. ਅਧਿਕਾਰੀਆਂ ਮੁਤਾਬਕ ਸੰਸਦ ਦੇ ਘਰ 'ਚ 2 ਟਾਇਲੇਟ ਤੇ ਇਕ ਪੈਂਟਰੀ (ਸਟੋਰ ਰੂਮ) ਦਾ ਨਜਾਇਜ਼ ਨਿਰਮਾਣ ਸੀ।
ਇਕ ਟਾਇਲੇਟ ਛੱਤ 'ਤੇ ਇਕ ਆਫਿਸ 'ਚ ਸੀ। ਬਿਲਡਿੰਗ 'ਚ ਬਣਿਆ ਪੂਜਾ ਘਰ ਵੀ ਨਜਾਇਜ਼ ਨਿਰਮਾਣ ਦੇ ਤਹਿਤ ਆਉਂਦਾ ਹੈ। ਪੂਜਾ ਘਰ ਨੂੰ ਛੱਡ ਕੇ ਬਾਕੀ ਸਾਰੇ ਨਜਾਇਜ਼ ਨਿਰਮਾਣਾਂ ਨੂੰ ਹਟਾ ਦਿੱਤਾ ਗਿਆ ਹੈ। ਅਧਿਕਾਰੀਆਂ ਨੇ ਸ਼ਤਰੂਘਨ ਸਿਨਹਾ ਨੂੰ ਪੂਜਾ ਰੂਮ ਸ਼ਿਫਟ ਕਰਨ ਲਈ ਕਿਹਾ ਹੈ। ਸਿਨਹਾ ਵਿਰੁੱਧ ਜਲਦ ਹੀ ਇਕ ਪੁਲਸ ਕੇਸ ਦਰਜ ਕੀਤਾ ਜਾਵੇਗਾ। ਇਸ ਦੇ ਨਾਲ ਹੀ ਉਸਾਰੀ ਢਾਹੁਣ ਦੌਰਾਨ ਲੱਗੀ ਲਾਗਤ ਵੀ ਵਸੂਲੀ ਜਾਵੇਗੀ।
ਮਜ਼ੇਦਾਰ ਗੱਲ ਇਹ ਹੈ ਕਿ ਸ਼ਤਰੂਘਨ ਸਿਨਹਾ ਨੂੰ ਬੀ. ਐੱਮ. ਸੀ. ਵਲੋਂ ਪਹਿਲਾ ਨੋਟਿਸ ਪਿਛਲੇ ਸਾਲ 6 ਦਸੰਬਰ ਨੂੰ ਮਿਲਿਆ ਸੀ। ਨੋਟਿਸ ਤੋਂ ਠੀਕ ਇਕ ਦਿਨ ਪਹਿਲਾਂ ਉਹ ਭਾਜਪਾ ਆਗੂ ਯਸ਼ਵੰਤ ਸਿਨਹਾ ਦੇ ਪਾਰਟੀ ਵਿਰੁੱਧ ਛੇੜੇ ਗਏ ਵਿਰੋਧ ਦੇ ਸਮਰਥਨ 'ਚ ਆਏ ਸਨ। ਜਦੋਂ ਉਨ੍ਹਾਂ ਕੋਲੋਂ ਪੁੱਛਿਆ ਗਿਆ ਕਿ ਕਿਤੇ ਉਨ੍ਹਾਂ ਦੇ ਘਰ 'ਤੇ ਬੀ. ਐੱਮ. ਸੀ. ਦੀ ਕਾਰਵਾਈ ਯਸ਼ਵੰਤ ਸਿਨਹਾ ਦਾ ਸਮਰਥਨ ਕਰਨ ਦੀ ਵਜ੍ਹਾ ਕਾਰਨ ਤਾਂ ਨਹੀਂ ਹੋਈ।
ਇਸ ਸਵਾਲ ਨੂੰ ਉਨ੍ਹਾਂ ਨੇ ਹੱਸ ਕੇ ਟਾਲ ਦਿੱਤਾ। ਸਿਵਿਕ ਅਧਿਕਾਰੀਆਂ ਤੋਂ ਪਤਾ ਲੱਗਾ ਹੈ ਕਿ ਉਨ੍ਹਾਂ ਕੋਲ੍ਹ 3 ਮਹੀਨਿਆਂ ਪਹਿਲਾਂ ਇਹ ਸ਼ਿਕਾਇਤ ਆਈ ਸੀ, ਜਿਸ 'ਚ ਦੱਸਿਆ ਗਿਆ ਸੀ ਕਿ ਸਿਨਹਾ ਨੇ ਫਲੋਰ ਸਪੇਸ ਇੰਡੈਕਸ ਦੇ ਨਿਯਮਾਂ ਦੀ ਉਲੰਘਣਾ ਕੀਤਾ ਹੈ ਤੇ ਬਿਨਾਂ ਇਜਾਜ਼ਤ ਗੈਰ ਕਾਨੂੰਨੀ ਨਿਰਮਾਣ ਕਰਵਾਇਆ ਹੈ।