ਮੁੰਬਈ (ਬਿਊਰੋ) — ਬਾਲੀਵੁੱਡ ਦੀ ਖੂਬਸੂਰਤ ਅਦਾਕਾਰਾ ਸ਼ਿਲਪਾ ਸ਼ੈੱਟੀ ਨੇ ਹਾਲ ਹੀ 'ਚ ਇਕ ਹੈਰਾਨੀਜਨਕ ਖੁਲਾਸਾ ਕੀਤਾ ਹੈ, ਜਿਸ ਦੀ ਚਰਚਾ ਹਰ ਪਾਸੇ ਹੋ ਰਹੀ ਹੈ। ਇਹ ਖੁਲਾਸਾ ਸ਼੍ਰੀਲੰਕਾ ਹਮਲੇ ਅਤੇ ਉਸ ਦੇ ਪਤੀ ਰਾਜ ਕੁੰਦਰਾ ਨਾਲ ਜੁੜਿਆ ਹੋਇਆ ਹੈ। ਦਰਅਸਲ, ਸ਼੍ਰੀਲੰਕਾ 'ਚ 21 ਅਪ੍ਰੈਲ ਨੂੰ ਹੋਏ ਬੰਬ ਧਮਾਕਿਆਂ ਨੇ ਪੂਰੀ ਦੁਨੀਆ ਨੂੰ ਹਿਲਾ ਕੇ ਰੱਖ ਦਿੱਤਾ ਸੀ। ਹਮਲੇ 'ਚ ਕਰੀਬ 250 ਲੋਕਾਂ ਦੀ ਮੌਤ ਹੋਈ ਸੀ ਅਤੇ 500 ਤੋਂ ਜ਼ਿਆਦਾ ਲੋਕਾਂ ਦੇ ਜ਼ਖਮੀ ਹੋਣ ਦੀ ਪੁਸ਼ਟੀ ਹੋਈ ਸੀ। ਹੁਣ ਹਮਲੇ ਤੋਂ 13 ਦਿਨ ਬਾਅਦ ਸ਼ਿਲਪਾ ਨੇ ਦੱਸਿਆ ਕਿ ਮੇਰੇ ਪਤੀ ਰਾਜ ਕੁੰਦਰਾ ਦੀ ਜਾਨ ਇਸ ਹਮਲੇ 'ਚ ਜਾਂਦੇ-ਜਾਂਦੇ ਮਸਾ ਬਚੀ ਸੀ। ਜੀ ਹਾਂ, ਖੁਦ ਸ਼ਿਲਪਾ ਨੇ ਮੁੰਬਈ 'ਚ ਹੋਏ ਇਕ ਲਾਂਚਿੰਗ ਈਵੈਂਟ ਦੌਰਾਨ ਆਖੀ ਹੈ। ਦਰਅਸਲ ਸ਼ਿਲਪਾ ਸ਼ੈੱਟੀ ਨੇ ਇਸ ਈਵੈਂਟ 'ਚ ਸ਼੍ਰੀਲੰਕਾ ਬੰਬ ਬਲਾਸਟ ਨੂੰ ਲੈ ਕੇ ਸੰਵੇਦਨਾ ਜਤਾਈ। ਇਸੇ ਦੌਰਾਨ ਸ਼ਿਲਪਾ ਸ਼ੈੱਟੀ ਨੇ ਕਿਹਾ, ''ਹਮਲੇ 'ਚ ਮਾਰੇ ਗਏ ਲੋਕਾਂ ਨਾਗਰਿਕਾਂ ਦੇ ਪਰਿਵਾਰਾਂ ਨੂੰ ਮੇਰੀ ਹਮਦਰਦੀ ਹੈ। ਇਹ ਬਹੁਤ ਹੀ ਡਰਾਉਣਾ ਤੇ ਭਿਆਨਕ ਹਾਦਸਾ ਸੀ। ਜਦੋਂ ਇਹ ਭਿਆਨਕ ਹਮਲਾ ਹੋਇਆ ਸੀ ਤਾਂ ਉਦੋਂ ਮੇਰੇ ਪਤੀ ਰਾਜ ਕੁੰਦਰਾ ਆਪਣੇ ਕੁਝ ਦੋਸਤਾਂ ਨਾਲ ਉਸੇ ਹੋਟਲ 'ਚ ਜਾਣ ਵਾਲੇ ਸਨ ਪਰ ਇਹ ਵਾਹਿਗੁਰੂ ਦੀ ਸਾਡੇ ਕਿਪ੍ਰਾ ਰਹੀ ਹੈ ਕਿ ਉਨ੍ਹਾਂ ਦਾ ਇਹ ਟ੍ਰਿਪ ਨਹੀਂ ਬਣਿਆ।'' ਈਵੈਂਟ 'ਚ ਸ਼ਿਲਪਾ ਦੇ ਪਤੀ ਰਾਜ ਕੁੰਦਰਾ ਤੇ ਬੇਟਾ ਵਿਵਾਨ ਵੀ ਪਹੁੰਚਿਆ ਸੀ।
ਦੱਸ ਦਈਏ ਕਿ ਸ਼ਿਲਪਾ ਸ਼ੈੱਟੀ ਨੇ ਅੱਗੇ ਈਵੈਂਟ 'ਚ ਦੱਸਿਆ ਕਿ ਇਹ ਗੱਲ ਮੈਂ ਹਾਲੇ ਤੱਕ ਕਿਸੇ ਨੂੰ ਨਹੀਂ ਦੱਸੀ ਪਰ ਹੁਣ ਮੈਂ ਇਸ ਦਾ ਜ਼ਿਕਰ ਕਰ ਰਹੀ ਹਾਂ ਕਿਉਂਕਿ ਮੈਨੂੰ ਲੱਗਦਾ ਹੈ ਕਿ ਜ਼ਿੰਦਗੀ ਦਾ ਕੋਈ ਭਰੋਸਾ ਨਹੀਂ ਹੈ। ਸਾਡੀ ਕਿਸਮਤ ਚੰਗੀ ਸੀ ਕਿ ਰਾਜ ਕੁੰਦਰਾ ਤੇ ਉਨ੍ਹਾਂ ਦੇ ਦੋਸਤਾਂ ਨੂੰ ਕੁਝ ਨਹੀਂ ਹੋਇਆ। ਜਿਹੜੇ ਲੋਕਾਂ ਨੇ ਇਸ ਹਮਲੇ 'ਚ ਆਪਣੇ ਪਰਿਵਾਰਾਂ ਨੂੰ ਗੁਵਾਇਆ ਹੈ, ਅਸੀਂ ਉਨ੍ਹਾਂ ਦਾ ਦਰਦ ਸਮਝ ਸਕਦੇ ਹਾਂ।