ਮੁੰਬਈ (ਬਿਊਰੋ)— ਫਿਲਮਕਾਰ ਸ਼ਿਰੀਸ਼ ਕੁੰਦਰ ਦਾ ਜਨਮ 24 ਮਈ 1973 ਨੂੰ ਕਰਨਾਟਕ ਦੇ ਮੈਂਗਲੌਰ 'ਚ ਹੋਇਆ ਸੀ। ਸ਼ਿਰੀਸ਼ ਫਿਲਮ ਰਾਈਟਰ, ਨਿਰਦੇਸ਼ਕ, ਐਡੀਟਰ ਅਤੇ ਕੰਪੋਜ਼ਰ ਹਨ। ਸ਼ਿਰੀਸ਼ ਨੇ ਸਾਲ 2004 'ਚ ਬਾਲੀਵੁੱਡ ਦੀ ਮਸ਼ਹੂਰ ਫਿਲਮ ਨਿਰਦੇਸ਼ਕ ਅਤੇ ਕੋਰੀਓਗਰਾਫਰ ਫਰਾਹ ਖਾਨ ਨਾਲ ਵਿਆਹ ਕੀਤਾ। ਫਿਲਮਾਂ 'ਚ ਆਉਣ ਤੋਂ ਪਹਿਲਾਂ ਉਹ 4 ਸਾਲ ਇਲੈਕਟ੍ਰੀਕਲ ਇੰਜੀਨੀਅਰ ਰਹੇ ਸਨ।
ਸਾਲ 2004 'ਚ ਫਿਲਮ 'ਮੈਂ ਹੂੰ ਨਾ' ਦੀ ਸ਼ੂਟਿੰਗ ਦੌਰਾਨ ਪਹਿਲੀ ਵਾਰ ਸ਼ਿਰੀਸ਼ ਅਤੇ ਫਰਾਹ ਖਾਨ ਦੀ ਮੁਲਾਕਾਤ ਹੋਈ। ਇਸ ਤੋਂ ਬਾਅਦ 9 ਦਸੰਬਰ 2004 ਨੂੰ ਦੋਵੇਂ ਵਿਆਹ ਦੇ ਬੰਧਨ 'ਚ ਬੱਝ ਗਏ। ਫਰਾਹ ਉਮਰ 'ਚ ਸ਼ਿਰੀਸ਼ ਤੋਂ 8 ਸਾਲ ਵੱਡੀ ਹੈ। ਫਿਲਮਾਂ ਤੋਂ ਵੱਧ ਸ਼ਿਰੀਸ਼ ਦਾ ਨਾਂ ਵਿਵਾਦਾਂ ਨਾਲ ਵੀ ਜੁੜਿਆ ਰਹਿੰਦਾ ਹੈ।
ਸ਼ਾਹਰੁਖ ਖਾਨ ਨੇ ਸ਼ਿਰੀਸ਼ ਨੂੰ ਸੰਜੇ ਦੱਤ ਦੀ ਪਾਰਟੀ ਦੌਰਾਨ ਥੱਪੜ ਮਾਰਿਆ ਸੀ। ਫਿਲਮ 'ਰਾ.ਵਨ' ਦੀ ਰਿਲੀਜ਼ ਦੇ ਸਮੇਂ ਸ਼ਿਰੀਸ਼ ਨੇ ਸ਼ਾਹਰੁਖ ਦੀ ਫਿਲਮ ਬਾਰੇ ਟਵਿਟਰ 'ਤੇ ਕੁਮੈਂਟ ਕਰਦੇ ਹੋਏ ਲਿਖਿਆ ਸੀ, 'ਸੁਣਿਆ ਹੈ ਸੌ ਕਰੋੜ ਦਾ ਪਟਾਕਾ ਫੁੱਸ ਨਿਕਲਿਆ।''
ਇਸ ਤੋਂ ਬਾਅਦ ਇਹ ਸਿਲਸਿਲਾ ਇੱਥੇ ਹੀ ਨਹੀਂ ਰੁੱਕਿਆ ਅਤੇ ਸੰਜੇ ਦੱਤ ਦੀ ਪਾਰਟੀ 'ਚ ਜਿੱਥੇ ਦੋਵੇਂ ਮੌਜੂਦ ਸਨ, ਸ਼ਿਰੀਸ਼ ਗੱਲ-ਗੱਲ 'ਤੇ ਸ਼ਾਹਰੁਖ ਨੂੰ ਉਕਸਾ ਰਹੇ ਸਨ। ਇਕ ਸਮੇਂ ਬਾਅਦ ਜਦੋਂ ਪਾਣੀ ਸਿਰ ਤੋਂ ਉੱਪਰ ਲੰਘ ਗਿਆ ਤਾਂ ਸ਼ਾਹਰੁਖ ਨੇ ਉਨ੍ਹਾਂ ਨੇ ਥੱਪੜ ਮਾਰਿਆ ਅਤੇ ਦੋਹਾਂ ਵਿਚਕਾਰ ਹੱਥੋਂ-ਪਾਈ ਹੋ ਗਈ।
ਇਸ ਤੋਂ ਬਾਅਦ ਉੱਥੇ ਮੌਜੂਦ ਬਾਕੀ ਲੋਕਾਂ ਨੇ ਦੋਹਾਂ ਨੂੰ ਛਡਵਾਇਆ ਪਰ ਬਾਅਦ 'ਚ ਫਰਾਹ ਖਾਨ ਕਾਰਨ ਦੋਹਾਂ ਵਿਚਕਾਰ ਸੁਲਹ ਵੀ ਹੋ ਗਈ। ਸ਼ਿਰੀਸ਼ ਨੇ ਜਾਨ-ਏ-ਮਨ ਅਤੇ 'ਜੋਕਰ' ਵਰਗੀ ਫਿਲਮ ਦਾ ਨਿਰਦੇਸ਼ਨ ਕੀਤਾ ਹੈ।
ਇਸ ਤੋਂ ਇਲਾਵਾ ਉਹ ਫਿਲਮ 'ਤੀਸ ਮਾਰ ਖਾਂ' ਦੇ ਲੇਖਕ ਅਤੇ ਨਿਰਮਾਤਾ ਵੀ ਹਨ। ਸ਼ਿਰੀਸ਼ ਫਿਲਮ ਐਡੀਟਰ ਵੀ ਹਨ। ਉਹ 'ਚੈਂਪੀਅਨ', 'ਆਂਖੇ', 'ਵਕਤ', 'ਓਮ ਸ਼ਾਂਤੀ ਓਮ' ਅਤੇ 'ਤੀਸ ਮਾਰ ਖਾਂ' ਵਰਗੀਆਂ ਫਿਲਮਾਂ 'ਚ ਐਡੀਟਰ ਦੀ ਭੂਮਿਕਾ ਨਿਭਾਅ ਚੁੱਕੇ ਹਨ।