ਮੁੰਬਈ(ਬਿਊਰੋ)— ਹਰ ਕਿਸੇ ਦਾ ਸਪਨਾ ਹੁੰਦਾ ਹੈ ਕਿ ਉਸ ਦਾ ਮਾਇਆਨਗਰੀ ਮੁੰਬਈ 'ਚ ਇਕ ਸ਼ਾਨਦਾਰ ਬੰਗਲਾ ਹੋਵੇ। ਅਜਿਹਾ ਹੀ ਸੁਪਨਾ 'ਸਟੂਡੈਂਟ ਆਫ ਦਿ ਈਅਰ' ਨਾਲ ਬਾਲੀਵੁੱਡ ਕਰੀਅਰ ਦੀ ਸ਼ੁਰੂਆਤ ਕਰਨ ਵਾਲੇ ਐਕਟਰ ਸਿਧਾਰਥ ਮਲਹੋਤਰਾ ਦਾ ਵੀ ਰਿਹਾ ਪਰ ਹੁਣ ਲੱਗਦਾ ਹੈ ਉਸ ਦਾ ਇਹ ਸੁਪਨਾ ਪੂਰਾ ਹੋ ਗਿਆ ਹੈ।
ਉਸ ਨੂੰ ਵੀ ਆਪਣਾ ਡਰੀਮ ਹਾਊਸ ਮਿਲ ਗਿਆ ਹੈ। ਸਿਧਾਰਥ ਨੇ ਮੁੰਬਈ ਦੇ ਪੋਸ਼ ਇਲਾਕੇ 'ਪਾਲੀ ਹਿੱਲ' ਦੇ ਇਕ ਅਪਾਰਟਮੈਂਟ 'ਚ ਆਪਣਾ ਘਰ ਖਰੀਦਿਆ ਹੈ।
ਦੱਸਿਆ ਜਾ ਰਿਹਾ ਹੈ ਕਿ ਉਸ ਦਾ ਇਹ ਘਰ 9ਵੀਂ ਮੰਜ਼ਿਲ 'ਤੇ ਹੈ ਅਤੇ ਇਸ 'ਚ 3 ਬੈੱਡਰੂਮ ਹੋਣ ਦਾ ਅੰਦਾਜ਼ਾ ਲਾਇਆ ਜਾ ਰਿਹਾ ਹੈ ਪਰ ਸਿਧਾਰਥ ਦੇ ਇਸ ਨਵੇਂ ਘਰ ਦੀ ਸਭ ਤੋਂ ਖਾਸ ਗੱਲ ਇਹ ਹੈ ਕਿ ਇਸ ਨੂੰ ਬਾਲੀਵੁੱਡ ਦੇ ਕਿੰਗ ਖਾਨ ਯਾਨੀ ਕਿ ਸ਼ਾਹਰੁਖ ਖਾਨ ਦੀ ਪਤਨੀ ਗੌਰੀ ਖਾਨ ਨੇ ਸਜਾਇਆ ਹੈ।
ਜੀ ਹਾਂ ਗੌਰੀ ਨੇ ਸਿਧਾਰਥ ਦੇ ਘਰ ਦੀ ਇੰਟੀਰੀਅਰ ਡਿਜ਼ਾਈਨ ਦੀ ਜ਼ਿੰਮੇਦਾਰੀ ਲਈ ਸੀ ਅਤੇ ਉਨ੍ਹਾਂ ਨੇ ਇਸ ਨੂੰ ਬਖੂਬੀ ਢੰਗ ਨਾਲ ਪੂਰਾ ਵੀ ਕੀਤਾ ਹੈ।
ਹਾਲ ਹੀ 'ਚ ਗੌਰੀ ਨੇ ਆਪਣੇ ਸੋਸ਼ਲ ਮੀਡੀਆ 'ਤੇ ਘਰ ਦੇ ਖੂਬਸੂਰਤ ਇੰਟੀਰੀਅਰ ਨਾਲ ਇਕ ਵੀਡੀਓ ਸ਼ੇਅਰ ਕੀਤਾ ਹੈ। ਹਾਲਾਂਕਿ ਇਸ ਵੀਡੀਓ 'ਚ ਸਿਧਾਰਥ ਦੀ ਅਵਾਜ਼ ਸੁਣਾਈ ਦੇ ਰਹੀ ਹੈ, ਜੋ ਆਪਣੇ ਘਰ ਦੇ ਇਕ ਕੋਨੇ ਬਾਰੇ ਦੱਸ ਰਹੇ ਹਨ ਕਿ ਕਿਸ ਤਰ੍ਹਾਂ ਗੌਰੀ ਨੇ ਬਹੁਤ ਹੀ ਖੂਬਸੂਰਤੀ ਨਾਲ ਉਸ ਦੇ ਘਰ ਨੂੰ ਸਜਾਇਆ ਹੈ।
ਉੱਥੇ ਹੀ ਗੌਰੀ ਨੇ ਵੀਡੀਓ ਦੇ ਨਾਲ ਕੈਪਸ਼ਨ 'ਚ ਸਿਧਾਰਥ ਦਾ ਧੰਨਵਾਦ ਅਦਾ ਕੀਤਾ ਹੈ। ਹਾਲਾਂਕਿ ਸਿਧਾਰਥ ਦੇ ਇਸ ਘਰ ਦੀਆਂ ਕੁਝ ਤਸਵੀਰਾਂ ਵੀ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਹੀਆਂ ਹਨ।
ਦੱਸਣਯੋਗ ਹੈ ਕਿ ਗੌਰੀ ਖਾਨ ਇਕ ਮੰਨੀ–ਪ੍ਰਮੰਨੀ ਇੰਟੀਰੀਅਰ ਡਿਜ਼ਾਈਨਰ ਹੈ। ਉਨ੍ਹਾਂ ਨੇ ਸਿਧਾਰਥ ਤੋਂ ਇਲਾਵਾ ਰਣਬੀਰ ਕਪੂਰ ਅਤੇ ਜੈਕਲੀਨ ਫਰਨਾਂਡਿਜ਼ ਵਰਗੇ ਸਟਾਰਸ ਦੇ ਘਰ ਦਾ ਵੀ ਇੰਟੀਰੀਅਰ ਕੀਤਾ ਹੈ।
