ਨਵੀਂ ਦਿੱਲੀ(ਬਿਊਰੋ)— ਬਾਲੀਵੁੱਡ ਦੀ ਮਸ਼ਹੂਰ ਅਦਾਕਾਰਾ ਸੋਨਾਲੀ ਬੇਂਦਰੇ ਨੂੰ 'ਹਾਈ ਗ੍ਰੇਡ ਕੈਂਸਰ' ਹੋਇਆ ਹੈ। ਉਹ ਆਪਣਾ ਇਲਾਜ਼ ਨਿਊਯਾਰਕ 'ਚ ਕਰਵਾ ਰਹੀ ਹੈ। ਉਸ ਨਾਲ ਉਸ ਦਾ 13 ਸਾਲ ਦਾ ਬੇਟਾ ਰਣਵੀਰ ਬਹਿਲ ਤੇ ਪਤੀ ਗੋਲਡੀ ਬਹਿਲ ਵੀ ਹੈ। 43 ਸਾਲ ਦੀ ਸੋਨਾਲੀ ਬੇਂਦਰੇ ਆਪਣੇ ਪਰਿਵਾਰ ਦੇ ਬੇਹੱਦ ਕਰੀਬ ਹੈ। ਉਸ ਦਾ ਇੰਸਟਾਗ੍ਰਾਮ ਅਕਾਊਂਟ ਉਸ ਦੇ ਪਰਿਵਾਰਿਕ ਮੈਂਬਰਾਂ ਦੀਆਂ ਤਸਵੀਰਾਂ ਨਾਲ ਭਰਿਆ ਹੋਇਆ ਹੈ। ਦੱਸ ਦੇਈਏ ਕਿ ਗੋਲਡੀ ਬਹਿਲ ਫਿਲਮ ਪ੍ਰੋਡਿਊਸਰ ਹੈ। ਉਸ ਨੇ ਸੋਨਾਲੀ ਨਾਲ ਪਹਿਲੀ ਨਜ਼ਰ 'ਚ ਹੀ ਪਿਆਰ ਹੋ ਗਿਆ ਸੀ। ਗੋਲਡੀ ਨੇ ਸੋਨਾਲੀ ਨੂੰ ਸਾਲ 1994 'ਚ 'ਨਾਰਾਜ਼' ਫਿਲਮ ਦੇ ਸੈੱਟ 'ਤੇ ਦੇਖਿਆ ਸੀ ਤੇ ਉਦੋਂ ਤੋਂ ਹੀ ਉਸ ਦੇ ਦੀਵਾਨੇ ਹੋ ਗਏ ਸਨ। 4 ਸਾਲ ਇਕ-ਦੂਜੇ ਨੂੰ ਡੇਟ ਕਰਨ ਤੋਂ ਬਾਅਦ ਦੋਵੇਂ ਸਾਲ 2002 'ਚ ਵਿਆਹ ਦੇ ਬੰਧਨ 'ਚ ਬੱਝੇ ਸਨ। ਸਾਲ 2005 'ਚ ਸੋਨਾਲੀ ਨੇ ਬੇਟੇ ਰਣਵੀਰ ਨੂੰ ਜਨਮ ਦਿੱਤਾ ਸੀ। ਗੋਲਡੀ ਦੀ ਭੈਣ ਸ਼੍ਰਿਸ਼ਟੀ ਆਰੀਆ, ਸੋਨਾਲੀ ਦੀ ਚੰਗੀ ਦੋਸਤ ਵੀ ਹੈ। ਸੋਨਾਲੀ ਬੇਂਦਰੇ ਮਰਾਠੀ ਹੈ, ਜਦੋਂਕਿ ਗੋਲਡੀ ਪੰਜਾਬੀ ਹੈ। ਇਸ ਤੋਂ ਇਲਾਵਾ ਸੋਨਾਲੀ ਲੇਖਿਕਾ ਵੀ ਹੈ। ਉਸ ਨੇ 'ਦਿ ਮਾਡਰਨ ਗੁਰੂਕੁਲ' ਨਾਂ ਦੀ ਕਿਤਾਬ ਵੀ ਲਿਖੀ ਹੈ। ਅਭਿਸ਼ੇਕ ਬੱਚਨ, ਸੋਨਾਲੀ ਬੇਂਦਰੇ ਤੇ ਗੋਲਡੀ ਕਾਫੀ ਚੰਗੇ ਦੋਸਤ ਹਨ। ਹਾਲ ਹੀ 'ਚ ਸੋਨਾਲੀ ਨੇ ਆਪਣੇ ਕੈਂਸਰ ਦੀ ਗੱਲ ਸੋਸ਼ਲ ਮੀਡੀਆ 'ਤੇ ਸ਼ੇਅਰ ਕੀਤੀ ਸੀ, ਜਿਸ ਤੋਂ ਬਾਅਦ ਬਾਲੀਵੁੱਡ ਜਗਤ ਨੇ ਉਨ੍ਹਾਂ ਦੇ ਜਲਦੀ ਠੀਕ ਹੋਣ ਦੀਆਂ ਦੁਆਵਾਂ ਵੀ ਮੰਗੀਆਂ। ਦੱਸਣਯੋਗ ਹੈ ਕਿ ਸੋਨਾਲੀ ਬੇਂਦਰੇ ਪਿਛਲੇ ਕਈ ਸਾਲਾਂ ਤੋਂ ਲਾਈਮਲਾਈਟ ਤੋਂ ਦੂਰ ਹੈ। ਉਸ ਨੂੰ 'ਸਰਫਰੋਸ਼', 'ਹਮ ਸਾਥ-ਸਾਥ ਹੈਂ' ਅਤੇ 'ਲੱਜਾ' ਵਰਗੀਆਂ ਚਰਚਿਤ ਫਿਲਮਾਂ 'ਚ ਯਾਦਗਾਰ ਕਿਰਦਾਰਾਂ ਲਈ ਜਾਣਿਆਂ ਜਾਂਦਾ ਹੈ। ਹਾਲ ਹੀ 'ਚ ਸਾਂਝੀ ਕੀਤੀ ਪੋਸਟ ਰਾਹੀਂ ਸੋਨਾਲੀ ਨੇ ਆਪਣੀ ਇਸ ਬੀਮਾਰੀ ਬਾਰੇ ਦੱਸਿਆ ਹੈ। ਉਸ ਨੇ ਇੰਸਟਾਗ੍ਰਾਮ 'ਤੇ ਇਕ ਪੋਸਟ ਲਿਖ ਕੇ ਖੁਦ ਨੂੰ ਕੈਂਸਰ ਹੋਣ ਦੀ ਗੱਲ ਆਖੀ ਹੈ। ਹਾਲਾਂਕਿ ਉਸ ਨੇ ਲਿਖਿਆ ਹੈ ਕਿ, ''ਮੇਰਾ ਪਰਿਵਾਰ ਤੇ ਕਰੀਬੀ ਦੋਸਤ ਮੇਰਾ ਪੂਰਾ ਧਿਆਨ ਰੱਖ ਰਹੇ ਹਨ। ਫਿਲਹਾਲ ਮੈਂ ਨਿਊਯਾਰਕ 'ਚ ਹਾਂ, ਜਿੱਥੇ ਮੇਰਾ ਇਲਾਜ ਚੱਲ ਰਿਹਾ ਹੈ। ਮੈਂ ਇਸ ਲੜਾਈ ਨਾਲ ਲੜਨ ਲਈ ਪੂਰੀ ਤਰ੍ਹਾਂ ਤਿਆਰ ਹਾਂ।''