ਮੁੰਬਈ (ਬਿਊਰੋ) — ਬਾਲੀਵੁੱਡ ਅਦਾਕਾਰ ਸੋਨੂੰ ਸੂਦ ਨੇ ਆਪਣੀ ਮਾਂ ਨੂੰ ਯਾਦ ਕਰਦੇ ਹੋਏ ਇਕ ਭਾਵੁਕ ਪੋਸਟ ਆਪਣੇ ਇੰਸਟਾਗ੍ਰਾਮ 'ਤੇ ਸ਼ੇਅਰ ਕੀਤੀ ਹੈ। ਦੋ ਦਿਨ ਪਹਿਲਾਂ ਸ਼ੇਅਰ ਕੀਤੀ ਇਸ ਪੋਸਟ ਦੇ ਸ਼ਬਦ ਇੰਨ੍ਹੇ ਜ਼ਿਆਦਾ ਭਾਵੁਕ ਹਨ ਕਿ ਇਹ ਹਰ ਇਕ ਦੀਆਂ ਅੱਖਾਂ ਨਮ ਹੋ ਰਹੀਆਂ ਹਨ। ਸੋਨੂੰ ਸੂਦ ਨੇ ਆਪਣੀ ਮਾਂ ਦੀਆਂ ਤਸਵੀਰਾਂ ਸ਼ੇਅਰ ਕਰਦੇ ਹੋਏ ਲਿਖਿਆ ਹੈ, ''ਜਦੋਂ ਵੀ 13 ਅਕਤੂਬਰ ਆਉਂਦੀ ਹੈ ਤਾਂ ਮੈਨੂੰ 12 ਸਾਲ ਪੁਰਾਣੀ ਉਹ ਫੋਨ ਕਾਲ ਯਾਦ ਆ ਜਾਂਦੀ ਹੈ, ਜਿਸ ਨੇ ਮੇਰੀ ਜ਼ਿੰਦਗੀ ਹਮੇਸ਼ਾ ਲਈ ਬਦਲ ਦਿੱਤੀ ਸੀ। ਮੇਰੀ ਮਾਰਗ ਦਰਸ਼ਕ ਮੇਰੇ ਤੋਂ ਦੂਰ ਚਲੇ ਗਈ ਸੀ। ਮੇਰੇ ਦਿਨ ਦੀ ਸ਼ੁਰੂਆਤ ਮਾਂ ਨੂੰ ਫੋਨ ਕਰਨ ਨਾਲ ਹੁੰਦੀ ਸੀ ਪਰ ਇਸ ਫੋਨ ਕਾਲ ਨੇ ਮੈਨੂੰ ਅਹਿਸਾਸ ਕਰਵਾ ਦਿੱਤਾ ਸੀ ਕਿ ਮੈਂ ਹੁਣ ਤੁਹਾਨੂੰ ਕਦੇ ਵੀ ਕਾਲ ਨਹੀਂ ਕਰ ਸਕਾਂਗਾ।
ਜ਼ਿੰਦਗੀ ਚੰਗੀ ਕੱਟ ਰਹੀ ਹੈ, ਬਹੁਤ ਕੁਝ ਪਾ ਲਿਆ ਹੈ ਤੇ ਬਹੁਤ ਕੁਝ ਪਾ ਰਿਹਾ ਹਾਂ ਪਰ ਇਹ ਸਭ ਅਰਥ ਹੀਣ ਲੱਗਦਾ ਹੈ। ਮੈਂ ਉਸੇ ਰਾਹਾਂ 'ਤੇ ਚੱਲ ਰਿਹਾ ਹਾਂ, ਜਿਹੜਾ ਕਿ ਤੁਸੀਂ ਮੈਨੂੰ ਦਿਖਾਇਆ ਸੀ। ਜਿਹੜਾ ਪੁੱਤਰ ਆਪਣੀ ਮਾਂ ਤੋਂ 12 ਮਿੰਟ ਦੂਰ ਨਹੀਂ ਸੀ ਰਹਿੰਦਾ, ਉਹ ਪਿਛਲੇ 12 ਸਾਲਾਂ ਤੋਂ ਬਿਨ੍ਹਾਂ ਮਾਂ ਦੇ ਰਹਿ ਰਿਹਾ ਹੈ। ਇਹ ਸੌਖਾ ਨਹੀਂ ਸੀ। ਜਦੋਂ ਵੀ ਮੈਂ ਇੱਕਲਾ ਬੈਠਦਾ ਹਾਂ ਤਾਂ ਸੋਚਦਾ ਹਾਂ ਕਿ ਅਸੀਂ ਇੱਕਠੇ ਸਮਾਂ ਬਿਤਾਉਣ ਦੀ ਯੋਜਨਾ ਬਣਾਈ ਸੀ ਪਰ ਇਸ ਤਰ੍ਹਾਂ ਨਹੀਂ ਹੋਇਆ। ਰੱਬ ਨੇ ਮੇਰੇ ਨਾਲ ਸਹੀ ਨਹੀਂ ਕੀਤਾ। ਖੁਸ਼ ਰਹੋ ਤੁਸੀਂ ਜਿੱਥੇ ਵੀ ਹੋ। ਮੈਂ ਤੁਹਾਨੂੰ ਹਰ ਸਾਹ ਨਾਲ ਯਾਦ ਕਰਦਾ ਹਾਂ। ਤੁਹਾਨੂੰ ਪਿਆਰ ਕਰਦਾ ਹਾਂ।''
ਦੱਸ ਦਈਏ ਕਿ ਸੋਨੂੰ ਸੂਦ ਦਾ ਜਨਮ 30 ਜੁਲਾਈ, 1973 'ਚ ਪੰਜਾਬ ਦੇ ਮੋਗਾ ਜ਼ਿਲੇ 'ਚ ਹੋਇਆ ਸੀ। ਜਨਮ ਤੋਂ ਬਾਅਦ ਉਨ੍ਹਾਂ ਦੀ ਪੜ੍ਹਾਈ ਨਾਗਪੁਰ 'ਚ ਪੂਰੀ ਹੋਈ ਸੀ। ਸੋਨੂੰ ਨੇ ਇੰਜਨੀਅਰਿੰਗ ਦੀ ਪੜ੍ਹਾਈ ਕੀਤੀ। ਸੋਨੂੰ ਸੂਦ ਨੇ ਕਈ ਐਕਸ਼ਨ ਕਿਰਦਾਰ ਨਿਭਾਏ ਹਨ। ਆਪਣੇ ਹੁਨਰ ਕਰਕੇ ਉਨ੍ਹਾਂ ਨੂੰ ਲਗਾਤਾਰ ਫਿਲਮਾਂ 'ਚ ਕੰਮ ਮਿਲਦਾ ਰਹਿੰਦਾ ਹੈ। ਬਾਲੀਵੁੱਡ 'ਚ ਰੋਮਾਂਟਿਕ, ਕਾਮੇਡੀ ਤੇ ਵਿਲੇਨ ਕਈ ਤਰ੍ਹਾਂ ਦਾ ਕਿਰਦਾਰ ਨਿਭਾਉਣ ਵਾਲੇ ਸੋਨੂੰ ਸੂਦ ਬਾਰੇ ਕਈ ਗੱਲਾਂ ਸ਼ੇਅਰ ਕਰਨ ਜਾ ਰਹੇ ਹਾਂ।
ਦੱਸਣਯੋਗ ਹੈ ਕਿ ਸੋਨੂੰ ਸੂਦ ਨੇ ਅਭਿਨੈ ਦੀ ਸ਼ੁਰੂਆਤ 1999 ਦੀ ਤਾਮਿਲ ਫਿਲਮ 'ਕਲਾਝਾਗਰ' ਨਾਲ ਕੀਤੀ ਸੀ। ਸਾਊਥ 'ਚ ਫਿਲਮਾਂ ਕਰਦੇ ਹੋਏ ਸੋਨੂੰ ਨੇ ਆਪਣੀ ਪਹਿਲੀ ਹਿੰਦੀ ਫਿਲਮ 2002 'ਚ 'ਸ਼ਹੀਦ ਏ ਆਜ਼ਮ' ਕੀਤੀ ਸੀ, ਜਿਸ 'ਚ ਉਨ੍ਹਾਂ ਸ਼ਹੀਦ ਭਗਤ ਸਿੰਘ ਦਾ ਕਿਰਦਾਰ ਨਿਭਾਇਆ ਸੀ। ਸੋਨੂੰ ਨੇ ਆਪਣੇ ਫਿਲਮੀ ਕਰੀਅਰ ਦੌਰਾਨ ਤਾਮਿਲ, ਤੇਲਗੂ, ਕੰਨੜ, ਹਿੰਦੀ ਅਤੇ ਪੰਜਾਬੀ ਭਾਸ਼ਾਵਾਂ 'ਚ ਫਿਲਮਾਂ ਕੀਤੀਆਂ ਹਨ।