ਮੁੰਬਈ(ਬਿਊਰੋ)— ਬਾਲੀਵੁੱਡ ਦੀ ਮਸ਼ਹੂਰ ਅਦਾਕਾਰਾ ਸ਼੍ਰੀਦੇਵੀ ਨੂੰ ਇਸ ਦੁਨੀਆਂ ਆਲਵਿਦਾ ਆਖਿਆ ਅੱਜ ਪੂਰੇ 26 ਦਿਨ ਹੋ ਗਏ ਹਨ। ਉਨ੍ਹਾਂ ਦੀ ਅਚਾਨਕ ਹੋਈ ਮੌਤ ਨਾਲ ਬਾਲੀਵੁੱਡ ਇੰਡਸਟਰੀ ਨੂੰ ਕਾਫੀ ਧੱਕਾ ਲੱਗਾ। ਹਾਲ ਹੀ 'ਚ ਸ਼੍ਰੀਦੇਵੀ ਦੀਆਂ ਕੁਝ ਤਸਵੀਰਾਂ ਸਾਹਮਣੇ ਆਈਆਂ ਹਨ, ਜਿਨ੍ਹਾਂ 'ਚ ਉਹ ਪਤੀ ਬੋਨੀ ਕਪੂਰ ਨਾਲ ਨਜ਼ਰ ਆ ਰਹੀ ਹੈ।
ਇਹ ਤਸਵੀਰਾਂ ਅਕਤੂਬਰ 2017 'ਚ ਜਾਵੇਦ ਅਖਤਰ ਤੇ ਸ਼ਾਬਨਾ ਆਜ਼ਮੀ ਦੇ ਘਰ ਹੋਈ ਦੀਵਾਲੀ ਪਾਰਟੀ ਤੋਂ ਬਾਅਦ ਦੀਆਂ ਹਨ। ਇਸ 'ਚ ਦੇਖਿਆ ਜਾ ਸਕਦਾ ਹੈ ਕਿ ਪਾਰਟੀ ਤੋਂ ਨਿਕਲਦੇ ਸਮੇਂ ਅਖਤਰ ਦੇ ਘਰ ਦੇ ਬਾਹਰ ਮੌਜ਼ੂਦਾ ਫੋਟੋਗ੍ਰਾਫਰਜ਼ ਦੀ ਫਲੈਸ਼ ਲਾਈਟ ਕਾਰਨ ਸ਼੍ਰੀਦੇਵੀ ਪਰੇਸ਼ਾਨ ਹੋ ਜਾਂਦੀ ਸੀ।
ਇਸੇ ਦੌਰਾਨ ਸ਼੍ਰੀਦੇਵੀ ਨੇ ਬੋਨੀ ਕਪੂਰ ਨੂੰ ਕਿਹਾ ਕਿ ਕੁਝ ਨਜ਼ਰ ਨਹੀਂ ਆ ਰਿਹਾ। ਇੰਨਾ ਹੀ ਨਹੀਂ ਰੋਸ਼ਨੀ ਤੋਂ ਪਰੇਸ਼ਾਨ ਸ਼੍ਰੀਦੇਵੀ ਕਿਸੇ ਹੋਰ ਦੀ ਕਾਰ 'ਚ ਬੈਠ ਜਾਂਦੀ ਹੈ ਤਾਂ ਬੋਨੀ ਕਪੂਰ ਨੇ ਕਿਹਾ ਕਿ ਸਾਡੀ ਕਾਰ ਅੱਗੇ ਹੈ।
ਪਹਿਲਾਂ ਤਾਂ ਸ਼੍ਰੀਦੇਵੀ ਜਵਾਬ ਦਿੰਦੀ ਹੈ ਕਿ ਉਹ ਅੱਗੇ ਜਾ ਕੇ ਗੱਡੀ ਬਦਲ ਲਵੇਗੀ ਪਰ ਬਾਅਦ 'ਚ ਉਹ ਗੱਡੀ 'ਚੋਂ ਉਤਰ ਕੇ ਆਪਣੀ ਕਾਰ ਵੱਲ ਚੱਲੀ ਜਾਂਦੀ।
ਦੱਸਣਯੋਗ ਹੈ ਕਿ ਸ਼੍ਰੀਦੇਵੀ 24 ਫਰਵਰੀ ਨੂੰ ਦੁਬਈ 'ਚ ਆਪਣੇ ਭਾਣਜੇ ਦੇ ਵਿਆਹ 'ਚ ਸ਼ਾਮਲ ਹੋਣ ਲਈ ਧੀ ਖੁਸ਼ੀ ਕਪੂਰ ਤੇ ਪਤੀ ਬੋਨੀ ਕਪੂਰ ਨਾਲ ਪੁੱਜੀ ਸੀ। ਇਸ ਦੌਰਾਨ ਸਾਰੇ ਫੰਕਸ਼ਨ ਸ਼੍ਰੀਦੇਵੀ ਨੇ ਵਧੀਆ ਢੰਗ ਨਾਲ ਦੇਖੇ।
ਇਸੇ ਦੌਰਾਨ 24 ਫਰਵਰੀ ਦੇਰ ਰਾਤ ਹੋਟਲ ਦੇ ਬਾਥਟੱਬ 'ਚ ਡੁੱਬਣ ਕਾਰਨ ਸ਼੍ਰੀਦੇਵੀ ਦੀ ਮੌਤ ਹੋ ਗਈ। ਸ਼੍ਰੀਦੇਵੀ ਦੀ ਮ੍ਰਿਤਕ ਦੇਹ 27 ਫਰਵਰੀ ਨੂੰ ਦੇਰ ਰਾਤ ਮੁੰਬਈ ਲਿਆਂਦੀ ਗਈ ਤੇ 28 ਫਰਵਰੀ ਨੂੰ ਪੂਰੇ ਰੀਤੀ ਰਿਵਾਜਾਂ ਨਾਲ ਉਨ੍ਹਾਂ ਦਾ ਅੰਤਿਮ ਸੰਸਕਾਰ ਕੀਤਾ ਹੈ।