ਮੁੰਬਈ(ਬਿਊਰੋ)— ਸੁਚਿੱਤਰਾ ਕ੍ਰਿਸ਼ਨਾਮੂਰਤੀ ਨੇ ਜਦੋਂ ਕਬੀਰ ਬੇਦੀ ਅਤੇ ਉਸ ਦੀ ਪਤਨੀ ਪ੍ਰਵੀਨ ਦੁਸਾਂਝ ਬੇਦੀ ਨੂੰ ਹਾਲ ਹੀ ਵਿਚ ਧਨਤੇਰਸ ਦੇ ਮੌਕੇ 'ਤੇ ਕਿਊਨੀ ਸਿੰਘ ਦੀ ਪਾਰਟੀ ਵਿਚ ਡਾਇਮੰਡ ਪਹਿਨੇ ਹੋਏ ਦੇਖਿਆ ਤਾਂ ਉਸ ਨੂੰ ਇਨ੍ਹਾਂ ਦੀ ਫਜ਼ੂਲ ਖਰਚੀ ਚੰਗੀ ਨਹੀਂ ਲੱਗੀ ਤੇ ਉਸ ਨੇ ਜੋੜੇ ਦੀ ਤਸਵੀਰ ਖਿੱਚ ਕੇ ਆਪਣੀ ਫੇਸਬੁਕ 'ਤੇ ਅਪਲੋਡ ਕਰ ਦਿੱਤੀ, ਜਿਸ ਦੀ ਉਸ ਨੇ ਕੈਪਸ਼ਨ ਬਣਾਈ, ''ਡਾਇਮੰਡ ਦੀ ਖਰੀਦ 'ਤੇ ਇੰਨਾ ਜ਼ਿਆਦਾ ਪੈਸਾ ਖਰਚ ਕੀਤਾ ਪਰ ਆਪਣਾ ਖੁਦ ਦਾ ਫਲੈਟ ਨਹੀਂ ਲਿਆ ਤੇ ਕਾਵੇਰੀ ਦੇ ਘਰ ਨੂੰ ਖਾਲੀ ਨਹੀਂ ਕਰਦੇ।''
ਸਾਰੇ ਵਿਵਾਦ ਦੀ ਗੱਲ ਇਕ '3-ਬੀ. ਐੱਚ. ਕੇ' ਜੁਹੂ ਅਪਾਰਟਮੈਂਟ ਹੈ, ਜਿਥੇ ਕਬੀਰ ਬੇਦੀ ਅਤੇ ਉਸ ਦੀ ਪਤਨੀ ਪ੍ਰਵੀਨ ਪਿਛਲੇ ਦੋ ਸਾਲਾਂ ਤੋਂ ਰਹਿ ਰਹੇ ਹਨ। ਸੁਚਿੱਤਰਾ ਦੋਸ਼ ਲਾਉਂਦੀ ਹੈ ਕਿ ਜਿਸ ਮਕਾਨ ਵਿਚ ਬੇਦੀ ਰਹਿ ਰਹੇ ਹਨ, ਉਹ ਉਸ (ਸੁਚਿੱਤਰਾ) ਦੇ ਸਾਬਕਾ ਪਤੀ ਸ਼ੇਖਰ ਕਪੂਰ ਦੀ ਜਾਇਦਾਦ ਹੈ ਅਤੇ ਇਹ ਜੋੜਾ ਉਥੋਂ ਨਿਕਲਣ ਦਾ ਨਾਂ ਨਹੀਂ ਲੈਂਦਾ। ਐਕਟਰਸ ਸੁਚਿੱਤਰਾ ਇੰਨੀ ਗੁੱਸੇ ਵਿਚ ਹੈ ਕਿ ਉਸ ਨੇ ਸਾਬਕਾ ਪਤੀ ਨੂੰ ਇਸ ਮਾਮਲੇ ਦੀ ਜਾਂਚ ਲਈ ਬਹੁਤ ਸਾਰੇ ਨੋਟਿਸ ਵੀ ਦਿੱਤੇ ਹਨ ਪਰ ਕੋਈ ਹੁੰਗਾਰਾ ਨਹੀਂ ਮਿਲਿਆ। ਇਹ ਇਕ ਬੜੀ ਅਜੀਬ ਸਥਿਤੀ ਹੈ। ਅੱਧਾ ਸਮਾਂ ਪ੍ਰਵੀਨ ਲੰਡਨ ਵਿਚ ਸ਼ੇਖਰ ਕੋਲ ਰਹਿੰਦੀ ਹੈ ਅਤੇ ਇਸ ਔਰਤ ਨੇ ਇਸ ਮਕਾਨ 'ਤੇ ਕਬਜ਼ਾ ਕਰ ਰੱਖਿਆ ਹੈ। ਸੁਚਿੱਤਰਾ ਨੇ ਦੱਸਿਆ ਕਿ ਤੁਸੀਂ ਭਾਵੇਂ ਦੋਸਤ ਹੋ ਪਰ ਮੈਂ ਆਪਣੇ ਬੱਚੇ ਦੇ ਹੱਕਾਂ ਦੀ ਰਾਖੀ ਕਰਨੀ ਹੈ।
ਦੂਸਰੇ ਪਾਸੇ ਕਬੀਰ ਬੇਦੀ ਨੇ ਦੱਸਿਆ ਕਿ ਕਈ ਮਹੀਨਿਆਂ ਤੋਂ ਸੁਚਿੱਤਰਾ ਝੂਠੀਆਂ ਕਹਾਣੀਆਂ ਦਸ ਰਹੀ ਹੈ ਜਦਕਿ ਸ਼ੇਖਰ ਤੇ ਉਹ (ਕਬੀਰ ਬੇਦੀ) ਕਾਲਜ ਦੇ ਦਿਨਾਂ ਤੋਂ ਮਿੱਤਰ ਹਨ। ਕਬੀਰ ਬੇਦੀ ਨੇ ਅੱਗੇ ਦੱਸਿਆ ਕਿ ਜਿਥੇ ਉਹ ਰਹਿ ਰਿਹਾ ਹੈ, ਉਹ ਉਸ ਦੀ ਭੈਣ ਸੋਹੇਲਾ ਚਾਰਨਾਲੀਆਂ ਦੀ ਮਾਲਕੀਅਤ ਹੈ ਤੇ ਉਹ ਕੇਵਲ ਇਕ ਸਮਝੌਤੇ ਦੁਆਰਾ ਕਿਰਾਏ 'ਤੇ ਰਹਿ ਰਿਹਾ ਹੈ।