ਜਲੰਧਰ (ਬਿਊਰੋ) — ਬਾਲੀਵੁੱਡ ਤੋਂ ਸਿਆਸੀ ਪਾਰਟੀ 'ਚ ਸਰਗਰਮ ਹੋਣ ਵਾਲੇ ਸੰਨੀ ਦਿਓਲ ਤੇ ਉਨ੍ਹਾਂ ਦਾ ਪਰਿਵਾਰ ਅਕਸਰ ਲਾਈਮ ਲਾਈਟ ਅਤੇ ਬਾਲੀਵੁੱਡ ਪਾਰਟੀਆਂ ਤੋਂ ਦੂਰ ਰਹਿੰਦਾ ਹੈ। ਸ਼ਾਇਦ ਹੀ ਬਾਲੀਵੁੱਡ ਦੀ ਕੋਈ ਪਾਰਟੀ ਹੋਵੇਗੀ, ਜਿਸ 'ਚ ਸੰਨੀ ਦਿਓਲ ਪਹੁੰਚੇ ਹੋਣਗੇ। ਇੱਥੇ ਹੀ ਬਸ ਨਹੀਂ ਸੰਨੀ ਦਿਓਲ ਸ਼ਰਾਬ ਅਤੇ ਸਿਗਰੇਟ ਤੋਂ ਵੀ ਦੂਰ ਰਹਿੰਦੇ ਹਨ। ਹਾਲ ਹੀ 'ਚ ਇਕ ਇੰਟਰਵਿਊ ਦੌਰਾਨ ਸੰਨੀ ਦਿਓਲ ਨੇ ਇਸ ਗੱਲ ਦਾ ਖੁਲਾਸਾ ਕੀਤਾ ਹੈ ਕਿ ਉਹ ਸ਼ਰਾਬ ਤੇ ਤੰਬਾਕੂਨੋਸ਼ੀ ਤੋਂ ਕਿਉਂ ਦੂਰ ਰਹਿੰਦੇ ਹਨ। ਉਨ੍ਹਾਂ ਖੁਲਾਸਾ ਕੀਤਾ ਕਿ ਮੈਨੂੰ ਸ਼ਰਾਬ 'ਚੋਂ ਆਉਣ ਵਾਲੀ ਬਦਬੂ ਅਤੇ ਇਸ ਨੂੰ ਪੀਣ ਤੋਂ ਬਾਅਦ ਹੋਣ ਵਾਲੇ ਸਾਈਡ ਇਫੈਕਟ ਤੋਂ ਐਲਰਜੀ ਹੈ। ਸੰਨੀ ਦਿਓਲ ਦਾ ਕਹਿਣਾ ਹੈ ਕਿ ਇਕ ਦੋ ਵਾਰ ਉਨ੍ਹਾਂ ਨੇ ਸ਼ਰਾਬ ਪੀ ਕੇ ਦੇਖੀ ਸੀ, ਜਿਸ ਤੋਂ ਬਾਅਦ ਉਨ੍ਹਾਂ ਦਾ ਸਿਰ ਫਟਣ ਲੱਗ ਜਾਂਦਾ ਹੈ ਅਤੇ ਉਨ੍ਹਾਂ ਨੂੰ ਸ਼ਰਾਬ 'ਚੋਂ ਆਉਣ ਵਾਲੀ ਬਦਬੂ ਵੀ ਬਹੁਤ ਗੰਦੀ ਲੱਗਦੀ ਹੈ।
ਦੱਸ ਦਈਏ ਕਿ ਸੰਨੀ ਦਿਓਲ ਨੇ ਦੱਸਿਆ ਕਿ ਪਾਰਟੀਆਂ 'ਚ ਲੋਕ ਅਕਸਰ ਸ਼ਰਾਬ ਅਤੇ ਸਿਗਰੇਟ ਦਾ ਨਸ਼ਾ ਕਰਦੇ ਹਨ। ਇਸ ਲਈ ਉਹ ਪਾਰਟੀਆਂ ਤੋਂ ਵੀ ਦੂਰ ਰਹਿੰਦੇ ਹਨ। ਉਨ੍ਹਾਂ ਨੇ ਕਿਹਾ ਕਿ ਪਾਰਟੀਆਂ 'ਚ ਲੋਕ ਅਕਸਰ ਇਕ ਦੂਜੇ ਨੂੰ ਸ਼ਰਾਬ ਅਤੇ ਸਿਗਰੇਟ ਪੀਣ ਲਈ ਫੋਰਸ ਕਰਦੇ ਹਨ। ਇਸੇ ਕਰਕੇ ਉਹ ਇਨ੍ਹਾਂ ਪਾਰਟੀਆਂ ਤੋਂ ਦੂਰ ਰਹਿੰਦੇ ਹਨ।