ਮੁੰਬਈ(ਬਿਊਰੋ)- ਕੋਰੋਨਾ ਵਾਇਰਸ ਕਾਰਨ ਲਗਾਏ ਗਏ ਲਾਕਡਾਊਨ ਨੇ ਆਮ ਲੋਕਾਂ ਤੋਂ ਲੈ ਕੇ ਖਾਸ ਤੱਕ ਦੀ ਜ਼ਿੰਦਗੀ ਵਿਚ ਵੱਡੀਆਂ ਸਮੱਸਿਆਵਾਂ ਖੜ੍ਹੀਆਂ ਕਰ ਦਿੱਤੀਆਂ ਹਨ। ਨਰਿੰਦਰ ਮੋਦੀ ਨੇ ਘੋਸ਼ਣਾ ਵੀ ਕੀਤੀ ਹੈ ਕਿ ਇਸ ਨੂੰ ਹੋਰ ਅੱਗੇ ਵਧਾਇਆ ਜਾਵੇਗਾ। ਅਜਿਹੇ ਵਿਚ ਕਈ ਟੀ.ਵੀ. ਸਿਤਾਰੇ ਅਜਿਹੇ ਹਨ, ਜੋ ਇਨ੍ਹੀਂ ਦਿਨੀਂ ਆਰਥਿਕ ਸੰਕਟ ’ਚੋਂ ਗੁਜ਼ਰ ਰਹੇ ਹਨ। ਹੁਣ ਅਜਿਹੀ ਦੀ ਹਾਲਤ ਵਿਚ ਟੀ.ਵੀ. ਅਦਾਕਾਰਾ ਸੋਨਲ ਵੇਂਗੁਰਲੇਕਰ ਫਸ ਗਈ ਹੈ। ਸੋਨਲ ਵੇਂਗੁਰਲੇਕਰ ਇਨ੍ਹੀਂ ਦਿਨੀਂ ਕੋਰੋਨਾ ਵਾਇਰਸ ਕਾਰਨ ਸੈਲਫ ਆਈਸੋਲੇਸ਼ਨ ਵਿਚ ਹੈ। ਹੁਣ ਸੋਨਲ ਨੇ ਇਕ ਭਾਵੁਕ ਪੋਸਟ ਸ਼ੇਅਰ ਕੀਤੀ ਹੈ। ਜਿਸ ਵਿਚ ਉਹ ਆਪਣੇ ਮੇਕਅੱਪ ਮੈਨ ਦਾ ਧੰਨਵਾਦ ਅਦਾ ਕਰ ਰਹੀ ਹੈ।
ਆਪਣੀ ਪੋਸਟ ਵਿਚ ਸੋਨਲ ਵੇਂਗੁਰਲੇਕਰ ਨੇ ਲਿਖਿਆ,‘‘ਅੱਜ ਮੈਂ ਆਪਣੇ ਮੇਕਅੱਪ ਮੈਨ ਨਾਲ ਗੱਲ ਕਰ ਰਹੀ ਸੀ ਕਿ ਮੇਰੇ ਕੋਲ ਅਗਲੇ ਮਹੀਨੇ ਤੱਕ ਲਈ ਜ਼ਰੂਰਤ ਮੁਤਾਬਕ ਪੈਸਾ ਨਹੀਂ ਹੈ ਕਿਉਂਕਿ ਕੁੱਝ ਨਿਰਮਾਤਾਵਾਂ ਨੇ ਮੇਰਾ ਪੈਸਾ ਨਹੀਂ ਦਿੱਤਾ ਹੈ, ਜੋ ਕਿ ਲੰਬੇ ਸਮੇਂ ਤੋਂ ਰੁਕਿਆ ਹੋਇਆ ਹੈ। ਮੈਂ ਆਪਣੇ ਮੇਕਅੱਪ ਮੈਨ ਲਈ ਪ੍ਰੇਸ਼ਾਨ ਸੀ ਕਿ ਉਹ ਇਸ ਹਾਲਤ ਵਿਚ ਕਿਵੇਂ ਗਜ਼ਾਰਾ ਕਰ ਰਿਹਾ ਹੋਵੇਗਾ। ਉਸ ਦੀ ਪਤਨੀ ਗਰਭਵਤੀ ਹੈ ਅਤੇ ਕਈ ਖਰਚੇ ਹਨ ਪਰ ਮੈਨੂੰ ਮੇਕਅੱਪ ਮੈਨ ਵੱਲੋਂ ਜੋ ਮੈਸੇਜ ਮਿਲਿਆ ਉਸ ਨੂੰ ਦੇਖਣ ਤੋਂ ਬਾਅਦ ਮੇਰੀਆਂ ਅੱਖਾਂ ਵਿਚ ਹੰਝੂ ਆ ਗਏ। ਉਸ ਨੇ ਮੈਸੇਜ ਕੀਤਾ ਸੀ ਕਿ ਮੈਮ ਮੇਰੇ ਕੋਲ 15 ਹਜ਼ਾਰ ਹੈ, ਹੁਣੇ ਤੁਹਾਨੂੰ ਚਾਹੀਦੇ ਹਨ ਤਾਂ ਲੈ ਲਓ। ਮੇਰੀ ਪਤਨੀ ਦੀ ਡਿਲੀਵਰੀ ਦੇ ਸਮੇਂ ਮੈਨੂੰ ਦੇ ਦੇਈਓ। ਮੈਂ ਹੈਰਾਨ ਸੀ ਕਿ ਜਿਨ੍ਹਾਂ ’ਤੇ ਮੇਰੇ ਲੱਖਾਂ ਰੁਪਏ ਬਾਕੀ ਹਨ, ਉਹ ਮੇਰਾ ਕਾਲ ਪਿਕ ਨਹੀਂ ਕਰ ਰਹੇ ਹਨ ਅਤੇ ਮੈਨੂੰ ਬਲਾਕ ਕਰਕੇ ਮੇਰੇ ਹੀ ਕਮਾਏ ਪੈਸੇ ਨਹੀਂ ਦੇ ਰਹੇ ਹਨ।’’
ਸੋਨਲ ਵੇਂਗੁਰਲੇਕਰ ਨੇ ਲਿਖਿਆ,‘‘ਮੇਰਾ ਮੇਕਅੱਪ ਮੈਨ ਪੰਕਜ ਗੁਪਤਾ, ਜੋ ਪਰਿਵਾਰ ਦੀ ਤਰ੍ਹਾਂ ਹੈ, ਮੈਨੂੰ ਪੈਸੇ ਦੇਣ ਲਈ ਤਿਆਰ ਹੈ। ਪੈਸਾ ਵੱਡੀ ਗੱਲ ਨਹੀਂ ਹੈ, ਸਗੋਂ ਇਹ ਹੈ ਕਿ ਉਨ੍ਹਾਂ ਕੋਲ ਪੈਸੇ ਨਹੀਂ ਹੁੰਦੇ ਹੋਏ ਵੀ ਉਹ ਮੇਰੇ ਬਾਰੇ ਵਿਚ ਸੋਚ ਰਹੇ ਹਨ। ਸਮਾਂ ਆ ਗਿਆ ਹੈ ਕਿ ਤਥਾਕਥਿਤ ਅਮੀਰ ਲੋਕ ਵੀ ਦਿਲੋਂ ਅਮੀਰ ਹੋ ਜਾਣ।’’
ਦੱਸ ਦੇਈਏ ਕਿ ਸੋਨਲ ਵੇਂਗੁਰਲੇਕਰ ਨੇ ਕਈ ਸ਼ੋਅ ਜਿਵੇਂ- ‘ਸ਼ਾਸਤਰੀ ਸਿਸਟਰਸ’, ‘ਯੇ ਵਾਦਾ ਰਹਾ’ ਅਤੇ ‘ਸਾਮ ਦਾਮ ਦੰਡ ਭੇਦ’ ਵਿਚ ਕੰਮ ਕੀਤਾ ਹੈ।