ਜਲੰਧਰ (ਬਿਊਰੋ) — ਪੰਜਾਬੀ ਸਿਨੇਮਾ ਤੇ ਗਾਇਕਾਂ ਦਾ ਅਦਾਕਾਰੀ 'ਚ ਆਉਣ ਦਾ ਰੁਝਾਨ ਕਾਫੀ ਸਮੇਂ ਤੋਂ ਚੱਲਿਆ ਆ ਰਿਹਾ ਹੈ। ਜਿਥੇ ਗਾਇਕੀ ਤੋਂ ਅਦਾਕਾਰੀ ਵੱਲ ਆਏ ਬਹੁਤ ਸਾਰੇ ਬਿਹਤਰੀਨ ਕਲਾਕਾਰ ਪੰਜਾਬੀ ਸਿਨੇਮਾ ਨੂੰ ਮਿਲੇ ਹਨ ਉੱਥੇ ਹੀ ਬਹੁਤ ਸਾਰੇ ਅਜਿਹੇ ਵੀ ਗਾਇਕ ਹਨ, ਜਿੰਨ੍ਹਾਂ ਨੂੰ ਸਿਨੇਮਾ 'ਤੇ ਜ਼ਿਆਦਾ ਕਾਮਯਾਬੀ ਨਹੀਂ ਮਿਲੀ।
ਹੁਣ ਆਉਣ ਵਾਲੇ ਸਮੇਂ 'ਚ ਵੀ ਕਈ ਗਾਇਕ ਫਿਲਮਾਂ 'ਚ ਨਜ਼ਰ ਆਉਣਗੇ, ਜਿੰਨ੍ਹਾਂ 'ਚ ਗਾਇਕਾਂ ਦੀ ਤਿੱਕੜੀ 'ਦਿ ਲੈਂਡਰਸ' ਦਾ ਨਾਂ ਵੀ ਅੱਗੇ ਆ ਰਿਹਾ ਹੈ। ਜੀ ਹਾਂ ਗਾਇਕ ਗੁਰੀ ਸਿੰਘ, ਦੇਵੀ ਸਿੰਘ ਅਤੇ ਸੁੱਖ ਖਰੌੜ ਦੀ ਫਿਲਮ 'ਉੱਲੂ ਦੇ ਪੱਠੇ' ਦਾ ਸ਼ੂਟ ਸ਼ੁਰੂ ਹੋ ਚੁੱਕਿਆ ਹੈ, ਜਿਸ ਦੀਆਂ ਕੁਝ ਤਸਵੀਰਾਂ ਵੀ ਸਾਹਮਣੇ ਆਈਆਂ ਹਨ।
ਦੱਸ ਦਈਏ ਇਹ ਫਿਲਮ ਕਾਮੇਡੀ ਜੌਨਰ ਦੀ ਫਿਲਮ ਹੋਣ ਵਾਲੀ ਹੈ, ਜਿਸ ਨੂੰ ਨਿਰਦੇਸ਼ਕ ਤਾਜ ਵੱਲੋਂ ਡਾਇਰੈਕਟ ਕੀਤਾ ਜਾ ਰਿਹਾ ਹੈ। ਇਸ ਫਿਲਮ ਦੀ ਕਹਾਣੀ ਵੀ ਤਾਜ ਨੇ ਲਿਖੀ ਹੈ। ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਇਹ ਫਿਲਮ ਕੁਝ ਵੱਖਰੀ ਹੋਣ ਵਾਲੀ ਹੈ, ਜਿਸ ਦਾ ਕੰਸੈਪਟ ਵੀ ਵੱਖਰਾ ਹੋਵੇਗਾ। ਇਸ ਫਿਲਮ ਨੂੰ ਆਸ਼ੀਸ਼ ਕੁਮਾਰ ਮਦਾਦ, ਆਕਾਸ਼ ਗੁਪਤਾ, ਮੋਹਨ ਮੈਗੋ, ਸੌਰਭ ਗੋਇਲ, ਦਿਵਿਆ ਭਾਰਦਵਾਜ ਪ੍ਰੋਡਿਊਸ ਕਰ ਰਹੇ ਹਨ। ਵੀ. ਆਈ. ਐੱਲ. ਐੱਲ. ਪੀ. ਅਤੇ ਰਾਈਜਿੰਗ ਸਟਾਰ ਐਂਟਰਟੇਨਮੈਂਟ ਦੀ ਪੇਸ਼ਕਸ਼ ਇਹ ਫਿਲਮ ਅਗਲੇ ਸਾਲ ਰਿਲੀਜ਼ ਹੋਣ ਜਾ ਰਹੀ ਹੈ।