ਲਾਂਸ ਏਜਲਸ (ਬਿਊਰੋ) — ਮਾਰਵਲ ਸਟੂਡੀਓ ਦੀ 2011 'ਚ ਆਈ ਫਿਲਮ 'ਥਾਰ' ਦੇ ਮਸ਼ਹੂਰ ਐਕਟਰ ਇਸਾਕ ਕੈਪੀ ਨੇ ਖੁਦਕੁਸ਼ੀ ਕਰਕੇ ਆਪਣੀ ਜੀਵਨਲੀਲਾ ਸਮਾਪਤ ਕਰ ਲਈ ਹੈ। ਦੱਸ ਦਈਏ ਕਿ ਅਦਾਕਾਰ ਇਸਾਕ ਕੈਪੀ ਨੇ ਗੱਡੀ ਹੇਠਾ ਆ ਕੇ ਖੁਦਕੁਸ਼ੀ ਕੀਤੀ ਹੈ। ਇਸ ਅਦਾਕਾਰ ਨੇ ਖੁਦਕੁਸ਼ੀ ਕਰਨ ਤੋਂ ਪਹਿਲਾਂ ਆਪਣੇ ਇੰਸਟਾਗ੍ਰਾਮ 'ਤੇ ਇਕ ਭਾਵੁਕ ਪੋਸਟ ਵੀ ਸ਼ੇਅਰ ਕੀਤੀ। ਇਸਾਕ ਕੈਪੀ 42 ਸਾਲਾਂ ਦੇ ਸਨ।
ਖਬਰਾਂ ਮੁਤਾਬਿਕ ਇਸਾਕ ਕੈਪੀ ਇਕ ਪੁਲ ਤੋਂ ਹਾਈਵੇਅ 'ਤੇ ਕੁੱਦੇ ਸਨ। ਇਸ ਦੌਰਾਨ ਦੋ ਮੁੰਡਿਆਂ ਨੇ ਇਸ ਐਕਟਰ ਨੂੰ ਰੋਕਣ ਦੀ ਕੋਸ਼ਿਸ਼ ਵੀ ਕੀਤੀ ਪਰ ਉਨ੍ਹਾਂ ਨੇ ਪੁਲ ਤੋਂ ਹੇਠਾ ਛਾਲ ਮਾਰ ਦਿੱਤੀ, ਜਿਸ ਤੋਂ ਬਾਅਦ ਉਹ ਸਾਹਮਣੇ ਤੋਂ ਆ ਰਹੀ ਗੱਡੀ ਨਾਲ ਟਕਰਾ ਗਏ ਅਤੇ ਮੌਕੇ ਹੀ ਉਨ੍ਹਾਂ ਦੀ ਮੌਤ ਹੋ ਗਈ।
ਦੱਸਣਯੋਗ ਹੈ ਕਿ ਅਦਾਕਾਰ ਦੀ ਮੌਤ ਦੀ ਪੁਸ਼ਟੀ ਪੁਲਸ ਨੇ ਵੀ ਕਰ ਦਿੱਤੀ ਹੈ। ਪਿਛਲੇ ਕਈ ਦਿਨਾਂ ਤੋਂ ਉਹ ਕਾਫੀ ਤਣਾਅ 'ਚ ਸਨ। ਇਸਾਕ ਕੈਪੀ ਵੱਲੋਂ ਸ਼ੇਅਰ ਕੀਤੀ ਪੋਸਟ 'ਚ ਉਨ੍ਹਾਂ ਨੇ ਆਪਣੇ ਜੀਵਨ ਦੇ ਕਈ ਪਹਿਲੂਆਂ ਦੀ ਗੱਲ ਕੀਤੀ ਹੈ। ਇਸ ਤੋਂ ਇਲਾਵਾ ਸ਼ਰਾਬ ਤੇ ਨਸ਼ੇ ਦਾ ਨਾਲ ਸੰਘਰਸ਼ ਬਾਰੇ ਵੀ ਲਿਖਿਆ ਹੈ।'' ਇਸ ਤੋਂ ਇਲਾਵਾ ਇਸਾਕ ਕੈਪੀ ਨੇ ਇਸ ਪੋਸਟ 'ਚ ਅਮਰੀਕੀ ਰਾਸ਼ਟਰਪਤੀ ਤੋਂ ਮੁਆਫੀ ਵੀ ਮੰਗੀ ਹੈ। ਇਸ ਤੋਂ ਇਲਾਵਾ ਕੈਪੀ ਨੇ ਉਨ੍ਹਾਂ ਲੋਕਾਂ ਤੋਂ ਵੀ ਮੁਆਫੀ ਮੰਗੀ ਹੈ, ਜਿਨ੍ਹਾਂ ਦਾ ਦਿਲ ਉਹ ਨੇ ਜਾਣੇ ਅਨਜਾਣੇ 'ਚ ਦੁਖਾਇਆ ਸੀ। ਇਸਾਕ ਕੈਪੀ ਨੇ 'ਥਾਰ' ਫਿਲਮ ਨਾਲ ਕਾਫੀ ਸੁਰਖੀਆਂ ਬਟੋਰੀਆਂ ਸਨ।