ਮੁੰਬਈ (ਬਿਊਰੋ)— ਅੱਜ ਬਾਲੀਵੁੱਡ ਦੇ ਕਈ ਸਟਾਰਸ ਹਾਲੀਵੁੱਡ 'ਚ ਕੰਮ ਕਰਕੇ ਆਪਣੇ ਨਾਂ ਦਾ ਲੋਹਾ ਮੰਨਵਾ ਚੁੱਕੇ ਹਨ। ਪ੍ਰਿਯੰਕਾ ਚੋਪੜਾ, ਦੀਪਿਕਾ ਪਾਦੂਕੋਨ, ਅਨਿਲ ਕਪੂਰ ਤੇ ਇਰਫਾਨ ਖਾਨ ਤੋਂ ਬਾਅਦ ਹੁਣ ਹਾਲੀਵੁੱਡ ਫਿਲਮ 'ਚ ਜਲਵਾ ਦਿਖਾਉਣ ਵਾਲੇ ਐਕਟਰ ਬਣਨਗੇ ਟਾਈਗਰ ਸ਼ਰਾਫ। ਟਾਈਗਰ ਨੂੰ ਬਾਲੀਵੁੱਡ ਦਾ ਬਿਹਤਰੀਨ ਐਕਸ਼ਨ ਹੀਰੋ ਹੋਣ ਦੇ ਨਾਲ-ਨਾਲ ਵਧੀਆ ਡਾਂਸਰ ਦਾ ਖਿਤਾਬ ਵੀ ਹਾਸਲ ਹੈ। ਟਾਈਗਰ ਬਾਲੀਵੁੱਡ 'ਚ ਫਿਲਮ 'ਹੀਰੋਪੰਤੀ' 'ਚ ਆਪਣਾ ਕਮਾਲ ਦਿਖਾ ਚੁੱਕੇ ਹਨ, ਜਿਸ 'ਚ ਟਾਈਗਰ ਦੇ ਐਕਸ਼ਨ ਤੇ ਡਾਂਸ ਮੂਵਜ਼ ਨੂੰ ਦੇਖ ਕੇ ਆਡੀਅੰਸ ਉਸ ਦੀ ਫੈਨ ਹੀ ਹੋ ਗਈ ਸੀ। ਦਰਸ਼ਕ ਹੀ ਨਹੀਂ ਹੁਣ ਤਕ ਆਪਣੇ ਐਕਸ਼ਨ ਨਾਲ ਟਾਈਗਰ ਕਈ ਬਾਲੀਵੁੱਡ ਸਟਾਰਸ ਨੂੰ ਵੀ ਹੈਰਾਨ ਕਰ ਚੁੱਕੇ ਹਨ। ਇਸ ਕਾਰਨ ਹੁਣ ਟਾਈਗਰ ਆਪਣੇ ਐਕਸ਼ਨਾਂ ਕਰਕੇ ਵਿਦੇਸ਼ਾਂ 'ਚ ਵੀ ਮਸ਼ਹੂਰ ਹੋ ਗਏ ਹਨ।
ਹੁਣ ਖਬਰਾਂ ਹਨ ਕਿ ਟਾਈਗਰ ਜਲਦੀ ਹੀ ਲਾਰੇਂਸ ਕਸਨੌਫ ਦੇ ਵੱਡੇ ਪ੍ਰੋਜੈਕਟ ਦਾ ਹਿੱਸਾ ਬਣਦੇ ਨਜ਼ਰ ਆਉਣਗੇ। ਲਾਰੇਂਸ ਮਾਰਸ਼ਨਲ ਕੌਮਬੇਟ ਸੀਰੀਜ਼ ਲਈ ਜਾਣੇ ਜਾਂਦੇ ਹਨ। ਖਬਰਾਂ ਦੀ ਮੰਨੀਏ ਤਾਂ ਹਾਲ ਹੀ 'ਚ ਲਾਰੇਂਸ ਮੁੰਬਈ ਆਏ ਹੋਏ ਸਨ। ਉਨ੍ਹਾਂ ਨੇ ਟਾਈਗਰ ਨਾਲ ਮੁਲਾਕਾਤ ਕੀਤੀ ਸੀ। ਟਾਈਗਰ ਤੇ ਲਾਰੇਂਸ ਨੇ ਇਹ ਮੁਲਾਕਾਤ ਆਪਣੇ ਪ੍ਰੋਜੈਕਟ 'ਤੇ ਆਖਰੀ ਫੈਸਲਾ ਲੈਣ ਲਈ ਕੀਤੀ ਸੀ। ਮੀਟਿੰਗ 'ਚ ਗੁਲਸ਼ਨ ਗਰੋਵਰ ਦਾ ਬੇਟਾ ਸੰਜੇ ਗਰੋਵਰ ਵੀ ਸ਼ਾਮਲ ਸੀ। ਉਹ ਇਸ ਪ੍ਰੋਜੈਕਟ ਦਾ ਪਿੱਛਲੇ ਇਕ ਸਾਲ ਤੋਂ ਹਿੱਸਾ ਹਨ। ਸੰਜੇ ਨੇ ਹੀ ਇਸ ਪ੍ਰੋਜੈਕਟ ਲਈ ਟਾਈਗਰ ਦਾ ਨਾਂ ਸੁਝਾਅ 'ਚ ਦਿੱਤਾ ਸੀ।