ਨਵੀਂ ਦਿੱਲੀ (ਭਾਸ਼ਾ)- ਹਾਲੀਵੁੱਡ ਦੀ ਫਿਲਮ 'ਮਿਸ਼ਨ ਇੰਪਾਸੀਬਲ-ਫਾਲਆਊਟ' ਦੇ ਨਿਰਮਾਤਾਵਾਂ ਨੂੰ ਟਾਮ ਕਰੂਜ਼ ਦਾ ਇਕ ਖਤਰੇ ਭਰਿਆ ਦ੍ਰਿਸ਼ ਫਿਲਮਾਉਣ ਲਈ ਵਿਸ਼ੇਸ਼ ਫੌਜੀ ਹਵਾਈ ਜਹਾਜ਼ ਦੀ ਲੋੜ ਪਈ। ਆਬੂਧਾਬੀ ਦੀ ਮੀਡੀਆ ਜ਼ੋਨ ਅਥਾਰਟੀ ਦੀ ਸੀ. ਈ. ਓ. ਮਰੀਅਮ ਈਦ ਅਲ ਮਹਿਰੀ ਨੇ ਦੱਸਿਆ ਕਿ ਇਹ ਜਹਾਜ਼ ਸਿਰਫ ਸੰਯੁਕਤ ਅਰਬ ਅਮੀਰਾਤ ਦੀ ਫੌਜ ਨੂੰ ਹੀ ਮਿਲ ਸਕਦਾ ਸੀ। ਆਬੂਧਾਬੀ ਵਿਖੇ 'ਮਿਸ਼ਨ ਇੰਪਾਸੀਬਲ-ਫਾਲਆਊਟ' ਦੇ ਨਿਰਮਾਣ ਦੌਰਾਨ ਸਾਡੇ ਮੀਡੀਆ ਉਦਯੋਗ ਲਈ ਅਤਿਅੰਤ ਅਹਿਮ ਪਲ ਸਨ ਅਤੇ ਸਾਨੂੰ ਮਾਣ ਹੈ ਕਿ ਇਸ ਖਤਰੇ ਭਰੇ ਸਟੰਟ ਨੂੰ ਪੂਰਾ ਕਰਵਾਉਣ ਵਿਚ ਅਸੀਂ ਸਫਲ ਰਹੇ। ਉਨ੍ਹਾਂ ਦੱਸਿਆ ਕਿ ਪੈਰਾਮਾਊਂਟ ਪਿਕਚਰਜ਼ ਨੂੰ ਸੀ-17 ਫੌਜੀ ਹਵਾਈ ਜਹਾਜ਼ ਦੀ ਲੋੜ ਸੀ। ਇਸ ਦੀ ਵਰਤੋਂ ਰਿਹਰਸਲ ਅਤੇ ਸ਼ੂਟਿੰਗ ਦੌਰਾਨ ਕੀਤੀ ਜਾਣੀ ਸੀ। ਇਹ ਫਿਲਮ 27 ਜੁਲਾਈ ਨੂੰ ਰਿਲੀਜ਼ ਹੋਈ ਸੀ।