ਨਵੀਂ ਦਿੱਲੀ (ਬਿਊਰੋ) — ਬਾਲੀਵੁੱਡ ਦੇ ਸੀਨੀਅਰ ਅਦਾਕਾਰ ਨਾਨਾ ਪਾਟੇਕਰ 'ਤੇ ਯੌਨ ਸ਼ੋਸ਼ਣ (ਮੀਟੂ) ਦਾ ਇਲਜ਼ਾਮ ਲਾਉਣ ਵਾਲੀ ਅਦਾਕਾਰਾ ਤਨੂਸ਼੍ਰੀ ਦੱਤਾ ਇਕ ਵਾਰ ਫਿਰ ਸਾਹਮਣੇ ਆਈ ਹੈ। ਇਸ ਵਾਰ ਉਸ ਨੇ ਨਾਨਾ ਪਾਟੇਕਰ 'ਤੇ ਫਿਰ ਹੱਲਾ ਬੋਲਿਆ ਹੈ। ਉਸ ਨੇ ਇਸ ਵਾਰ ਅਖਬਾਰੀ ਨੁਮਾਇੰਦਿਆਂ ਨਾਲ ਗੱਲਬਾਤ ਕਰਦੇ ਹੋਏ ਕਿਹਾ ਕਿ ਜਦੋਂ ਤਕ ਮੈਂ ਨਾਨਾ ਪਾਟੇਕਰ ਦੀ ਜਾਨ ਨਹੀਂ ਲੈ ਲਵਾਂਗੀ, ਉਦੋਂ ਤਕ ਉਸ ਨੂੰ ਛੱਡਾਂਗੀ ਨਹੀਂ। ਉਨ੍ਹਾਂ ਇਹ ਵੀ ਕਿਹਾ ਕਿ ਗਣੇਸ਼ ਆਚਾਰੀਆ ਅਸਲ ਮੁਲਜ਼ਮ ਹੈ।
ਦੱਸਣਯੋਗ ਹੈ ਕਿ ਤਨੂਸ਼੍ਰੀ ਦੱਤਾ ਦੇ ਵਕੀਲ ਨਿਤਿਨ ਸਤਪਤੇ ਤੇ ਉਨ੍ਹਾਂ ਦੀ ਮੁੰਬਈ ਹਾਈ ਕੋਰਟ ਦੀ ਇਕ ਸਾਥੀ ਵਕੀਲ ਨੇ ਛੇੜਛਾੜ ਦਾ ਇਲਜ਼ਾਮ ਲਾਇਆ ਸੀ। ਤਨੂਸ਼੍ਰੀ ਨੇ ਅਕਤੂਬਰ 2018 ਵਿਚ ਅਭਿਨੇਤਾ ਨਾਨਾ ਪਾਟੇਕਰ ਖਿਲਾਫ 2008 ਵਿਚ ਫਿਲਮ 'ਹਾਰਨ ਓਕੇ ਪਲੀਜ਼' ਦੇ ਸੈੱਟ 'ਤੇ ਸ਼ੂਟਿੰਗ ਦੌਰਾਨ ਪ੍ਰੇਸ਼ਾਨ ਕਰਨ ਅਤੇ ਮਾੜਾ ਵਰਤਾਓ ਦਾ ਦੋਸ਼ ਲਾਉਂਦੇ ਹੋਏ ਸ਼ਿਕਾਇਤ ਦਰਜ ਕਰਵਾਈ ਸੀ। ਉਸ ਦੀ ਸ਼ਿਕਾਇਤ ਦੇ ਆਧਾਰ 'ਤੇ ਨਾਨਾ ਪਾਟੇਕਰ, ਕੋਰੀਓਗ੍ਰਾਫਰ ਗਣੇਸ਼ ਆਚਾਰੀਆ, ਨਿਰਮਾਤਾ ਸੰਮੀ ਸਿੱਦੀਕੀ ਅਤੇ ਡਾਇਰੈਕਟਰ ਰਾਕੇਸ਼ ਸਾਰੰਗ ਖਿਲਾਫ ਮਾਮਲਾ ਦਰਜ ਕੀਤਾ ਗਿਆ ਸੀ।