ਮੁੰਬਈ (ਬਿਊਰੋ)— ਹਾਲੀਵੁੱਡ ਐਕਟਰ ਵਿੱਲ ਸਮਿਥ ਬੀਤੇ ਕੁਝ ਦਿਨਾਂ ਤੋਂ ਭਾਰਤ 'ਚ ਹਨ। ਹਾਲ ਹੀ 'ਚ ਉਹ ਆਗਰਾ ਘੁੰਮਦੇ ਨਜ਼ਰ ਆਏ। ਇਸ ਦੇ ਨਾਲ ਹੀ ਵਿੱਲ ਨੇ ਬੀਤੇ ਦਿਨੀਂ ਗੰਗਾ ਆਰਤੀ ਕੀਤੀ ਤੇ ਰੁਦਰਾਅਭਿਸ਼ੇਕ ਵੀ ਕੀਤਾ।
ਹੁਣ ਵਿੱਲ ਦੀ ਆਉਣ ਵਾਲੀ ਫਿਲਮ 'ਅਲਾਦੀਨ' ਦਾ ਫਰਸਟ ਲੁੱਕ ਰਿਲੀਜ਼ ਹੋਇਆ ਹੈ। ਇਸ ਨੂੰ ਸੋਸ਼ਲ ਮੀਡੀਆ 'ਤੇ ਖੁਦ ਸਮਿਥ ਨੇ ਹੀ ਰਿਲੀਜ਼ ਕੀਤਾ ਹੈ।
'ਅਲਾਦੀਨ' ਫਿਲਮ 'ਚ ਵਿੱਲ ਸਮਿਥ ਜਿੰਨੀ ਦੇ ਰੋਲ 'ਚ ਨਜ਼ਰ ਆਉਣਗੇ। ਇਸ ਦੇ ਪੋਸਟਰ ਨੂੰ ਸ਼ੇਅਰ ਕਰਦੇ ਹੋਏ ਵਿੱਲ ਨੇ ਲਿਖਿਆ, “ਮੈਨੂੰ ਬਾਹਰ ਆਉਣ ਦਿਓ। ਆਪਣਾ ਨੀਲਾ ਰੰਗ ਦਿਖਾਉਣ ਦਾ ਇੰਤਜ਼ਾਰ ਨਹੀਂ ਕਰ ਸਕਦਾ।''
ਸਾਹਮਣੇ ਆਏ ਪੋਸਟਰ 'ਚ ਸਿਰਫ ਅਲਾਦੀਨ ਦਾ ਚਿਰਾਗ ਨਜ਼ਰ ਆ ਰਿਹਾ ਹੈ। ਫਿਲਮ 'ਚ ਸਮਿਥ ਜਿੰਨੀ ਦਾ ਰੋਲ ਕਰ ਰਹੇ ਹਨ।
ਉਂਝ ਤਾਂ ਸਭ ਅਲਾਦੀਨ ਦੀ ਕਹਾਣੀ ਤੋਂ ਵਾਕਿਫ ਹਨ ਪਰ ਇਸ ਕਹਾਣੀ ਨੂੰ ਇਕ ਵਾਰ ਫਿਰ ਹਾਲੀਵੁੱਡ ਅੰਦਾਜ਼ 'ਚ ਦੇਖਣਾ ਦਿਲਚਸਪ ਹੋਵੇਗਾ।
ਇਸ ਫਿਲਮ 'ਚ ਮੇਨਾ ਸਮੂਦ ਅਲਾਦੀਨ ਦੇ ਰੋਲ 'ਚ ਤੇ ਨਓਮੀ ਸਕੌਟ, ਜੈਸਮੀਨ ਦੇ ਰੋਲ 'ਚ ਨਜ਼ਰ ਆਵੇਗੀ। 'ਅਲਾਦੀਨ' 'ਚ ਮਰਵਾਂ ਕੇਂਜਾਰੀ, ਜਫਰ ਦਾ ਕਿਰਦਾਰ ਨਿਭਾਅ ਰਹੇ ਹਨ।
ਫਿਲਮ ਨੂੰ ਗਾਏ ਰਿਚੀ ਡਾਇਰੈਕਟ ਕਰ ਰਹੇ ਹਨ, ਜੋ 24 ਮਈ, 2019 ਨੂੰ ਰਿਲੀਜ਼ ਹੋ ਰਹੀ ਹੈ।
