ਮੁੰਬਈ(ਬਿਊਰੋ)— ਬਾਲੀਵੁੱਡ ਦੇ ਦੋ ਸ਼ਾਨਦਾਰ ਐਕਟਰ ਵਿਨੋਦ ਖੰਨਾ ਤੇ ਫਿਰੋਜ਼ ਖਾਨ ਦੀ ਮੌਤ 27 ਅਪ੍ਰੈਲ ਨੂੰ ਹੀ ਹੋਈ ਸੀ। ਦੋਵੇਂ ਬਹੁਤ ਚੰਗੇ ਦੋਸਤ ਸਨ। ਵਿਨੋਦ ਖੰਨਾ ਦੀ ਮੌਤ ਪਿਛਲੇ ਸਾਲ 27 ਅਪ੍ਰੈਲ ਨੂੰ ਬਲੱਡ ਕੈਂਸਰ ਕਾਰਨ ਹੋਈ ਸੀ। ਦੱਸ ਦੇਈਏ ਕਿ ਆਪਣੇ ਅੰਤਿਮ ਦਿਨਾਂ 'ਚ ਵਿਨੋਦ ਬੇਹੱਦ ਕਮਜ਼ੋਰ ਹੋ ਗਏ ਸਨ। ਫਿਰੋਜ਼ ਖਾਨ ਤੇ ਵਿਨੋਦ ਖੰਨਾ ਦੀ ਜੋੜੀ 'ਸਿਨੇ ਸਕ੍ਰੀਨ' 'ਤੇ ਕਈ ਫਿਲਮਾਂ 'ਚ ਦੇਖੀ ਹੈ, ਜਿਥੇ ਵਿਨੋਦ 2017 'ਚ ਦੁਨੀਆ ਤੋਂ ਰੁਖਸਤ ਹੋਏ, ਫਿਰੋਜ਼ ਖਾਨ 2009 'ਚ ਦੁਨੀਆ ਨੂੰ ਅਲਵਿਦਾ ਕਹਿ ਗਏ ਸਨ। ਫਿਰੋਜ਼ ਖਾਨ ਤੇ ਵਿਨੋਦ ਫਿਲਮ 'ਦਯਾਵਾਨ', 'ਕੁਰਬਾਨੀ' ਤੇ 'ਸ਼ੰਕਰ-ਸ਼ੰਭੂ' 'ਚ ਨਜ਼ਰ ਆਏ ਸਨ। ਸਾਲ 1980 'ਚ ਆਈ ਫਿਲਮ ਕੁਰਬਾਨੀ ਵਿਨੋਦ ਖੰਨਾ ਦੀ ਜ਼ਿੰਦਗੀ ਦੀ ਸਭ ਤੋਂ ਵੱਡੀ ਹਿੱਟ ਫਿਲਮ ਸੀ। ਇਸ ਫਿਲਮ ਨਾਲ ਵਿਨੋਦ ਨੇ ਸੰਨਿਆਸ ਲੈਣ ਤੋਂ ਬਾਅਦ ਬਾਲੀਵੁੱਡ 'ਚ ਵਾਪਸੀ ਕੀਤੀ ਸੀ। ਇਸ ਫਿਲਮ 'ਚ ਫਿਰੋਜ਼ ਖਾਨ ਨੇ ਤਿੰਨ ਰੋਲ ਡਾਇਰੈਕਟਰ, ਪ੍ਰੋਡਿਊਸਰ ਤੇ ਐਕਟਰ ਦਾ ਕੰਮ ਕੀਤਾ ਸੀ। ਇਸ ਫਿਲਮ ਤੋਂ ਬਾਅਦ ਦੋਵਾਂ ਦੀ ਦੋਸਤੀ ਡੂੰਘੀ ਹੋ ਗਈ। ਵਿਨੋਦ ਖੰਨਾ ਨੂੰ ਭਾਰਤੀ ਸਿਨੇ ਜਗਤ 'ਚ ਆਪਣੇ ਯੋਗਦਾਨ ਲਈ ਲਾਈਫਟਾਈਮ ਅਚੀਵਮੈਂਟ ਐਵਾਰਡ ਨਾਲ ਨਵਾਜਿਆ ਗਿਆ। ਉਨ੍ਹਾਂ ਨੇ ਆਪਣੇ ਕਰੀਅਰ 'ਚ 140 ਫਿਲਮਾਂ 'ਚ ਕੰਮ ਕੀਤਾ ਹੈ। ਵਿਨੋਦ ਖੰਨਾ ਨੇ ਆਪਣੇ ਕਰੀਅਰ ਦੀ ਸ਼ੁਰੂਆਤ ਵਿਲਨ ਵਜੋਂ ਕੀਤੀ ਸੀ ਪਰ ਮਿਹਨਤ ਤੇ ਐਕਟਿੰਗ ਦੇ ਚੱਲਦਿਆਂ ਉਹ ਹੀਰੋ ਬਣ ਗਏ।