ਮੁੰਬਈ(ਬਿਊਰੋ)— ਸੋਨਾਲੀ ਬੋਸ ਪ੍ਰਿਅੰਕਾ ਚੋਪੜਾ ਤੇ ਅਭਿਸ਼ੇਕ ਬੱਚਨ ਨਾਲ ਫਿਲਮ ਕਰਨ ਜਾ ਰਹੀ ਹੈ। ਹੁਣ ਖਬਰ ਹੈ ਕਿ ਇਸ ਫਿਲਮ 'ਚ 'ਦੰਗਲ' ਫੇਮ ਜ਼ਾਇਰਾ ਵਸੀਮ ਦੀ ਐਂਟਰੀ ਹੋ ਗਈ ਹੈ। ਜ਼ਾਇਰਾ ਇਸ ਫਿਲਮ ਨਾਲ ਪਹਿਲੀ ਵਾਰ ਅਭਿਸ਼ੇਕ ਤੇ ਪ੍ਰਿਯੰਕਾ ਨਾਲ ਸਕ੍ਰੀਨ ਸ਼ੇਅਰ ਕਰੇਗੀ। ਸੋਨਾਲੀ ਦੀ ਇਹ ਫਿਲਮ ਇਕ ਮਹਿਲਾ ਹੀਰੋ ਦੀ ਕਹਾਣੀ ਹੈ ਤੇ ਸੱਚੀ ਘਟਨਾ 'ਤੇ ਆਧਾਰਿਤ ਹੈ। ਇਹ ਫਿਲਮ ਆਇਸ਼ਾ ਚੌਧਰੀ ਦੀ ਜ਼ਿੰਦਗੀ ਦੀ ਕਹਾਣੀ ਹੈ। ਇਸ 'ਚ ਪ੍ਰਿਯੰਕਾ ਤੇ ਅਭਿਸ਼ੇਕ ਨੂੰ ਪਹਿਲਾਂ ਹੀ ਸਾਈਨ ਕਰ ਲਿਆ ਗਿਆ ਹੈ ਪਰ ਹੁਣ ਮੁੱਖ ਕਿਰਦਾਰ ਲਈ ਜ਼ਾਇਰਾ ਰੱਖਿਆ ਗਿਆ ਹੈ। ਸੋਨਾਲੀ ਦੀ ਫਿਲਮ ਦਾ ਟਾਈਟਲ ਅਜੇ ਤੈਅ ਨਹੀਂ ਹੋ ਸਕਿਆ। ਫਿਲਮ ਨੂੰ ਰੋਨੀ ਸਕਰੂਵਾਲਾ ਤੇ ਸਿਧਾਰਥ ਰਾਏ ਕਪੂਰ ਪ੍ਰੋਡਿਊਸ ਕਰਨ ਵਾਲੇ ਹਨ। ਇਹ ਕਹਾਣੀ ਇਕ ਪ੍ਰੇਰਣਾਦਾਇਕ ਕਹਾਣੀ ਹੋਵੇਗੀ, ਜਿਸ 'ਚ 13 ਸਾਲ ਦੀ ਕੁੜੀ ਦੀ ਬੀਮਾਰੀ ਨਾਲ ਸੰਘਰਸ਼ ਦਿਖਾਈ ਜਾਵੇਗੀ। ਇਸ ਲੜਾਈ ਤੋਂ ਬਾਅਦ ਉਸ ਨੇ 'ਮਾਈ ਲਿਟਲ ਏਪਿਫਨੀਜ਼' ਨਾਂ ਦੀ ਕਿਤਾਬ ਲਿਖੀ। ਆਇਸ਼ਾ ਦੀ ਸਪੀਚਸ (speeches) ਬਹੁਤ ਫੇਮਸ ਹੋਈਆਂ ਤੇ ਸਿਰਫ 18 ਸਾਲ ਦੀ ਉਮਰ 'ਚ ਉਸ ਨੇ ਇਸ ਦੁਨੀਆ ਨੂੰ ਪ੍ਰੇਰਣਾ ਦੇ ਕੇ ਅਲਵਿਦਾ ਕਹਿ ਦਿੱਤਾ ਸੀ। ਗੱਲ ਕਰੀਏ ਅਭਿਸ਼ੇਕ ਤੇ ਪ੍ਰਿਯੰਕਾ ਦੀ ਤਾਂ ਦੋਨੋਂ ਇਸ ਤੋਂ ਪਹਿਲਾਂ ਵੀ 2008 'ਚ ਹਿੱਟ ਫਿਲਮ 'ਦੋਸਤਾਨਾ' 'ਚ ਕੰਮ ਕਰ ਚੁੱਕੇ ਹਨ। ਸੋਨਾਲੀ ਨੇ ਇਸ ਫਿਲਮ ਲਈ ਅਭਿਸ਼ੇਕ ਨਾਲ 'ਮਨਮਰਜ਼ੀਆਂ' ਦੇ ਸੈੱਟ 'ਤੇ ਮੁਲਾਕਾਤ ਕੀਤੀ ਸੀ। ਪ੍ਰਿਅੰਕਾ ਇਸ ਫਿਲਮ 'ਚ 13 ਸਾਲ ਦੀ ਬੱਚੀ ਦੀ ਮਾਂ ਦਾ ਰੋਲ ਕਰੇਗੀ। ਇਸ ਤੋਂ ਇਲਾਵਾ ਪ੍ਰਿਯੰਕਾ ਜਲਦੀ ਹੀ ਸਲਮਾਨ ਖਾਨ ਨਾਲ ਵੀ ਫਿਲਮ 'ਭਾਰਤ' 'ਚ ਨਜ਼ਰ ਆਵੇਗੀ।