ਨਵੀਂ ਦਿੱਲੀ(ਬਿਊਰੋ)— ਫਿਲਮ 'ਦਿ ਐਕਸੀਡੈਂਟਲ ਪ੍ਰਾਈਮ ਮਨਿਸਟਰ' ਨੂੰ ਆਉਣ ਵਾਲੀਆਂ ਚੋਣਾਂ 'ਚ ਵੱਡਾ ਹਥਿਆਰ ਮੰਨ ਕੇ ਚੱਲ ਰਹੀ ਭਾਰਤੀ ਜਨਤਾ ਪਾਰਟੀ ਨੂੰ ਵੱਡਾ ਮੁੱਦਾ ਮਿਲਿਆ ਹੈ। 'ਦਿ ਐਕਸੀਡੈਂਟਲ ਪ੍ਰਾਈਮ ਮਨਿਸਟਰ' 'ਚ ਸਾਬਕਾ ਪੀ. ਐੱਮ. ਮਨਮੋਹਨ ਸਿੰਘ ਦਾ ਕਿਰਦਾਰ ਨਿਭਾ ਰਹੇ ਅਨੁਪਮ ਖੇਰ ਨੇ ਮੋਦੀ ਸਰਕਾਰ ਤੋਂ ਨਾਰਾਜ਼ਗੀ ਜ਼ਾਹਰ ਕੀਤੀ ਹੈ। ਅਨੁਪਮ ਖੇਰ ਨੇ ਕਿਹਾ ਹੈ ਕਿ ਕਸ਼ਮੀਰੀ ਪੰਡਿਤਾਂ ਲਈ ਮੋਦੀ ਸਰਕਾਰ ਨੇ ਕੁਝ ਨਹੀਂ ਕੀਤਾ।
ਬਾਲੀਵੁੱਡ ਕਲਾਕਾਰ ਅਨੁਪਮ ਖੇਰ ਨੇ ਕਸ਼ਮੀਰੀ ਪੰਡਿਤਾਂ ਸਬੰਧੀ ਚੁੱਕੇ ਸਵਾਲ 'ਤੇ ਕਿਹਾ ਕਿ ਨਹੀਂ ਕੀਤਾ... ਕੁਝ ਨਹੀਂ ਕੀਤਾ... ਮੈਂ ਤਾਂ ਹਮੇਸ਼ਾ ਬੋਲਦਾ ਹਾਂ। ਉਨ੍ਹਾਂ (ਮੋਦੀ ਸਰਕਾਰ) ਨੇ ਵੀ ਕੁਝ ਨਹੀਂ ਕੀਤਾ। ਅਨੁਪਮ ਖੇਰ ਨੇ ਕਿਹਾ ਕਿ ਭਾਵੇਂ ਦੇਸ਼ 'ਚ ਸਰਕਾਰ ਕਿਸੇ ਦੀ ਆਈ ਹੋਵੇ ਪਰ ਜੇਕਰ ਕਿਸੇ ਕਮਿਊਨਿਟੀ ਨੂੰ ਅਣਦੇਖਿਆ ਕੀਤਾ ਜਾਂਦਾ ਹੈ ਤਾਂ ਉਹ ਕਸ਼ਮੀਰੀ ਪੰਡਿਤ ਹਨ। ਇਸ ਨਾਲ ਹੀ ਐਕਟਰ ਨੇ ਕਸ਼ਮੀਰ 'ਚ ਲਾਗੂ ਧਾਰਾ 370 'ਤੇ ਵੀ ਬਿਆਨ ਦਿੱਤਾ। ਉਨ੍ਹਾਂ ਕਿਹਾ, ''ਜਿਸ ਦਿਨ ਧਾਰਾ 370 ਖਤਮ ਕਰ ਦਿੱਤੀ ਗਈ, ਹਾਲਾਤ ਸੁਧਰ ਜਾਣਗੇ ਹਾਂ ਪਰ ਪੰਡਿਤਾਂ ਲਈ ਕੁਝ ਵੀ ਨਹੀਂ ਕੀਤਾ।''