ਨਵੀਂ ਦਿੱਲੀ(ਬਿਊਰੋ)— ਉਬਰ ਡਰਾਈਵਰ ਵੱਲੋਂ ਆਪਣੇ ਗ੍ਰਾਹਕਾਂ ਨਾਲ ਬਤਮੀਜ਼ੀ ਦਾ ਇੱਕ ਹੋਰ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਵਾਰ ਇਸ ਦਾ ਸ਼ਿਕਾਰ ਬਣੀ ਹੈ ਕਾਮੇਡੀਅਨ ਅਤੇ ਅਦਾਕਾਰਾ ਮਲਿਕਾ ਦੁਆ। ਮਾਲਿਕਾ ਨੇ ਇਸ ਦਾ ਜ਼ਿਕਰ ਆਪਣੇ ਫੇਸਬੁੱਕ 'ਤੇ ਕੀਤਾ ਹੈ। ਕਾਮੇਡੀਅਨ ਅਤੇ ਇੰਟਰਨੈੱਟ ਸਟਾਰ ਮਲਿਕਾ ਦੁਆ ਨਾਲ ਉਬਰ ਵਿਚ ਸਫਰ ਦੌਰਾਨ ਕੁਝ ਅਜਿਹਾ ਹੋਇਆ ਕਿ ਉਸ ਨੂੰ ਆਪਣੇ ਫੇਸਬੁੱਕ 'ਤੇ ਲਿਖਣਾ ਪਿਆ।
ਮਲਿਕਾ ਨੇ ਫੇਸਬੁੱਕ ਪੇਜ਼ 'ਤੇ ਆਪਣੀ ਆਪਬੀਤੀ ਸੁਣਾਉਂਦੇ ਹੋਏ ਲਿਖਿਆ ਹੈ ਕਿ, ''ਉਬਰ ਇੰਡੀਆ ਬਹੁਤ ਹੀ ਨਿਕੰਮੀ ਸੰਸਥਾ ਹੈ, ਉਹ ਆਪਣੇ ਡਰਾਈਵਰਾਂ ਦੀ ਪ੍ਰੋਫਾਈਲ ਤੱਕ ਚੈੱਕ ਨਹੀਂ ਕਰਦੀ ਅਤੇ ਲੱਗਦਾ ਹੈ ਉਨ੍ਹਾਂ ਨੇ ਆਪਣੀਆਂ ਗ਼ਲਤੀਆਂ ਤੋਂ ਵੀ ਕੁਝ ਨਹੀਂ ਸਿੱਖਿਆ ਹੈ। ਜਦੋਂ ਮੈਂ ਡਰਾਈਵਰ ਨੂੰ ਏ. ਸੀ. ਵਧਾਉਣ ਲਈ ਕਿਹਾ ਤਾਂ ਉਸ ਨੇ ਮੈਨੂੰ ਗੱਡੀ ਤੋਂ ਉਤਰਨ ਲਈ ਕਿਹਾ।
ਜੀ ਹਾਂ, ਤਾਪਮਾਨ ਨੂੰ ਲੈ ਕੇ ਉਸ ਨੇ ਟਿਰਪ ਖਤਮ ਕਰ ਦਿੱਤਾ ਅਤੇ ਕਿਹਾ”ਉਤਰ ਗਾਡੀ ਤੋਂ, ਮੈਂ ਏ. ਸੀ ਨਹੀਂ ਵਧਾਵਾਂਗਾ। 'ਤੁਹਾਨੂੰ ਉਬਰ ਆਪਣੀ ਵਿਗਿਆਪਨ ਵਿਚ ਕੁਝ ਵੀ ਦਿਖਾਉਂਦਾ ਹੈ ਕਿ ਗੱਡੀ ਨੂੰ ਆਪਣੀ ਸਮਝੋ। ਅਜਿਹਾ ਕੁਝ ਨਹੀਂ ਹੈ। ਇਸ ਤੋਂ ਬਾਅਦ ਸਾਡੇ ਵਿਚਕਾਰ ਕਾਫੀ ਬਹਿਸ ਹੋਈ।
ਮੈਂ ਕਿਹਾ ਮੈ ਤੇਰੇ ਖਿਲਾਫ ਐਕਸ਼ਨ ਲਵਾਂਗੀ ਅਤੇ ਉਸ ਨੇ ਮੈਨੂੰ ਕਿਹਾ ਕਿ ਉਤਰ ਜਾ ਗੱਡੀ ਤੋਂ ਅਤੇ ਗਾਲਾਂ ਕੱਢਣ ਲੱਗਾ। ਉਹ ਗੱਡੀ ਤੇਜ਼-ਤੇਜ਼ ਚਲਾਉਣ ਲੱਗਿਆ ਤਾਂ ਮੈਂ ਗੱਡੀ ਰੁਕਵਾਉਣ ਲਈ ਉੱਚੀ-ਉੱਚੀ ਚੀਂਕਣ ਲੱਗੀ। ਇਸ ਦੌਰਾਨ ਉਹ ਮੈਨੂੰ ਗੰਦੀਆਂ ਗਾਲਾਂ ਕੱਢਦਾ ਰਿਹਾ।
ਮਲਿਕਾ ਨੇ ਅੱਗੇ ਲਿਖਿਆ ਹੈ ਕਿ ਮੈਂ ਤਾਂ ਸ਼ਹਿਰ ਵਿਚ ਗੱਡੀ ਅਤੇ ਡਰਾਈਵਰ ਰੱਖ ਸਕਦੀ ਹਾਂ ਪਰ ਉਨ੍ਹਾਂ ਬਾਰੇ ਸੋਚੋ, ਜਿਨ੍ਹਾਂ ਕੋਲ ਕੋਈ ਹੋਰ ਰਸਤਾ ਨਹੀਂ ਹੈ ਕੀ ਉਹ ਹਰ ਵਾਰ ਖੁਦ ਨੂੰ ਖਤਰੇ ਵਿਚ ਪਾਉਂਦੇ ਰਹਿਣਗੇ।
ਨਾਲ ਹੀ ਮਲਿਕਾ ਨੇ ਕਿਹਾ ਹੈ ਜੇਕਰ ਕਿਸੇ ਦੇ ਵੀ ਸੰਪਰਕ ਵਿਚ ਕੰਪਨੀ ਨਾਲ ਜੁੜਿਆ ਕੋਈ ਨੰਬਰ ਹੈ ਤਾਂ ਉਨ੍ਹਾਂ ਨਾਲ ਸ਼ੇਅਰ ਕਰਨ ਮਾਲਿਕਾ ਦੀ ਇਸ ਪੋਸਟ ਨੂੰ ਹੁਣ ਤੱਕ ਢਾਈ ਹਜ਼ਾਰ ਤੋਂ ਵਧ ਲੋਕ ਸ਼ੇਅਰ ਕਰ ਚੁੱਕੇ ਹਨ।
ਦੱਸ ਦਈਏ ਕਿ ਇਹ ਪਹਿਲਾ ਮਾਮਲਾ ਨਹੀਂ ਹੈ ਜਦੋਂ ਉਬਰ ਕੈਬ ਡਰਾਈਵਰ ਵੱਲੋਂ ਇੱਕ ਮਹਿਲਾ ਨਾਲ ਇਸ ਤਰ੍ਹਾਂ ਦੀ ਬਤਮੀਜ਼ੀ ਕੀਤੀ ਗਈ ਹੋਵੇ। ਇਸ ਤੋਂ ਪਹਿਲਾ ਵੀ ਇਸ ਤਰ੍ਹਾਂ ਦੇ ਕਈ ਮਾਮਲੇ ਸਾਹਮਣੇ ਆ ਚੁੱਕੇ ਹਨ।