ਨਵੀਂ ਦਿੱਲੀ (ਬਿਊਰੋ) — ਫਿਲਮ 'ਉੜੀ ਦਿ ਸਰਦੀਕਲ ਸਟ੍ਰਾਈਕ' 'ਚ ਆਰਮੀ ਅਫਸਰ ਦਾ ਕਿਰਦਾਰ ਨਿਭਾ ਚੁੱਕੇ ਵਿੱਕੀ ਕੌਸ਼ਲ ਨੇ ਭਾਰਤੀ ਸੈਨਾ ਲਈ ਆਪਣੇ ਜੀਵਨ ਦੇ ਪਹਿਲੀ ਰੋਟੀ ਬਣਾਈ ਹੈ। ਵਿੱਕੀ ਕੌਸ਼ਲ ਨੇ ਇੰਸਟਾਗ੍ਰਾਮ 'ਤੇ ਕੁਝ ਤਸਵੀਰਾਂ ਪੋਸਟ ਕੀਤੀਆਂ ਹਨ, ਜਿਨ੍ਹਾਂ 'ਚ ਉਹ ਭਾਰਤ-ਚੀਨ ਦੇ ਬਾਰਡਰ ਕੋਲ ਅਰੁਣਾਚਲ ਪ੍ਰਦੇਸ਼ ਦੇ ਤਵਾਂਗ 'ਚ ਨਜ਼ਰ ਆ ਰਹੇ ਹਨ।
ਵਿੱਕੀ ਨੇ ਤਸਵੀਰ ਦੇ ਕੈਪਸ਼ਨ 'ਚ ਲਿਖਿਆ ਹੈ ਕਿ 'ਮੈਂ ਆਪਣੀ ਜ਼ਿੰਦਗੀ ਦੀ ਪਹਿਲੀ ਰੋਟੀ, ਜੋ ਬਣਾਈ ਹੈ ਉਹ ਭਾਰਤੀ ਸੈਨਾ ਲਈ ਹੈ।' ਇਨ੍ਹਾਂ ਤਸਵੀਰਾਂ 'ਚ ਵਿੱਕੀ ਨੂੰ ਭਾਰਤੀ ਸੈਨਾ ਦੇ ਕੁਕ ਦੇ ਨਾਲ ਦੇਖਿਆ ਜਾ ਸਕਦਾ ਹੈ। ਇਸ ਤਸਵੀਰ ਦੇ ਕੈਪਸ਼ਨ 'ਚ ਵਿੱਕੀ ਨੇ ਲਿਖਿਆ, ''ਮੈਂ ਬਹੁਤ ਖੁਸ਼ ਹਾਂ ਕਿ ਮੈਨੂੰ ਭਾਰਤੀ ਸੈਨਾ ਦੇ ਨੌਜਵਾਨਾਂ ਨਾਲ 14,000 ਫੁੱਟ 'ਤੇ ਕੁਝ ਦਿਨ ਬਿਤਾਉਣ ਦਾ ਮੌਕਾ ਮਿਲਿਆ ਹੈ।
ਦੱਸਣਯੋਗ ਹੈ ਕਿ 'ਉੜੀ' ਤੋਂ ਬਾਅਦ ਵਿੱਕੀ ਕੌਸ਼ਲ ਕੁਝ ਅਜਿਹੇ ਪ੍ਰੋਜੈਕਟਸ 'ਤੇ ਕੰਮ ਕਰ ਰਹੇ ਹਨ, ਜੋ ਆਰਮੀ ਨਾਲ ਜੁੜੇ ਹਨ। ਉਹ ਮੇਘਣਾ ਗੁਲਜ਼ਾਰ ਦੀ ਫਿਲਮ 'ਚ ਫੀਲਡ ਮਾਰਸ਼ਸ ਸੈਮ ਮਾਨੇਕਸ਼ਾ ਦੇ ਕਿਰਦਾਰ 'ਚ ਨਜ਼ਰ ਆਉਣਗੇ। ਇਹ ਫਿਲਮ ਸੈਮ ਮਾਨੇਕਸ਼ਾ ਦੀ ਬਾਇਓਪਿਕ ਹੋਣ ਜਾ ਰਹੀ ਹੈ।
ਸੈਮ ਪਹਿਲਾ ਅਜਿਹੇ ਭਾਰਤੀ ਆਰਮੀ ਆਫਸਰ ਹਨ, ਜਿਨ੍ਹਾਂ ਨੂੰ ਫੀਲਡ ਮਾਰਸ਼ਲ ਦੀ ਰੈਂਕ ਲਈ ਪ੍ਰਮੋਟ ਕੀਤਾ ਗਿਆ ਸੀ। ਦੱਸ ਦਈਏ ਕਿ ਵਿੱਕੀ ਕੌਸ਼ਲ 'ਸ਼ਹੀਦ ਊਧਮ ਸਿੰਘ' ਦੀ ਬਾਇਓਪਿਕ ਤੇ ਇਕ ਹਾਰਰ ਫਿਲਮ ਨੂੰ ਲੈ ਕੇ ਚਰਚਾ 'ਚ ਹਨ। ਇਸ ਤੋਂ ਇਲਾਵਾ ਉਹ ਕਰਨ ਜੌਹਰ ਦੀ ਮਲਟੀਸਟਾਰਰ ਫਿਲਮ 'ਤਖਤ' ਦਾ ਵੀ ਹਿੱਸਾ ਹਨ।