ਐਸ਼ਵਰਿਆ ਦਾ ਮਜ਼ਾਕ ਉੱਡਾ ਕੇ ਬੁਰੇ ਫਸੇ ਵਿਵੇਕ, ਮੰਗਣੀ ਪਈ ਮੁਆਫ਼ੀ

ਮੁੰਬਈ— ਐਸ਼ਵਰਿਆ ਰਾਏ ਬੱਚਨ 'ਤੇ ਮੀਮ ਸ਼ੇਅਰ ਕਰਨ 'ਤੇ ਘਿਰੇ ਅਭਿਨੇਤਾ ਵਿਵੇਕ ਓਬਰਾਏ ਨੇ ਮੰਗਲਵਾਰ ਦੀ ਸਵੇਰ ਮੁਆਫ਼ੀ ਮੰਗ ਲਈ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਜੋ ਮੀਮ ਸ਼ੇਅਰ ਕੀਤਾ ਸੀ, ਉਸ ਨੂੰ ਵੀ ਡਿਲੀਟ ਕਰ ਦਿੱਤਾ। ਵਿਵੇਕ ਨੇ ਇਕੱਠੇ 2 ਟਵੀਟ ਕੀਤੇ। ਪਹਿਲੇ ਟਵੀਟ 'ਚ ਉਨ੍ਹਾਂ ਨੇ ਲਿਖਿਆ,''ਕਦੇ-ਕਦੇ ਕਿਸੇ ਨੂੰ ਪਹਿਲੀ ਵਾਰ ਜੋ ਮਜ਼ੇਦਾਰ ਅਤੇ ਹਾਨੀਰਹਿਤ ਲੱਗਦਾ ਹੈ, ਉਹ ਦੂਜਿਆਂ ਨੂੰ ਸ਼ਾਇਦ ਨਹੀਂ ਲੱਗਦਾ। ਮੈਂ ਪਿਛਲੇ 10 ਸਾਲ, 2000 ਤੋਂ ਵਧ ਅਸਹਾਏ ਲੜਕੀਆਂ ਦੇ ਮਜ਼ਬੂਤੀਕਰਨ 'ਚ ਬਿਤਾਏ ਹਨ। ਮੈਂ ਕਦੇ ਕਿਸੇ ਔਰਤ ਦੇ ਅਪਮਾਨ ਬਾਰੇ ਸੋਚ ਵੀ ਨਹੀਂ ਸਕਦਾ।''

ਉੱਥੇ ਹੀ ਦੂਜੇ ਟਵੀਟ 'ਚ ਵਿਵੇਕ ਨੇ ਲਿਖਿਆ,''ਜੇਕਰ ਮੀਮ 'ਤੇ ਮੇਰੇ ਰਿਪਲਾਈ ਨਾਲ ਇਕ ਵੀ ਔਰਤ ਦੁਖੀ ਹੋਈ ਹੈ ਤਾਂ ਇਸ 'ਚ ਸੁਧਾਰ ਦੀ ਲੋੜ ਹੈ। ਮੁਆਫ਼ੀ ਮੰਗਦਾ ਹਾਂ। ਟਵੀਟ ਡਿਲੀਟ ਕਰ ਦਿੱਤਾ ਹੈ।''ਇਸ ਤਰ੍ਹਾਂ ਸੀ ਵਿਵਾਦਿਤ ਮੀਮ
ਜ਼ਿਕਰਯੋਗ ਹੈ ਕਿ ਸੋਮਵਾਰ ਨੂੰ ਵਿਵੇਕ ਓਬਰਾਏ ਨੇ ਤਿੰਨ ਤਸਵੀਰਾਂ ਵਾਲਾ ਇਕ ਮੀਮ ਟਵਿੱਟਰ ਹੈਂਡਲ ਤੋਂ ਸ਼ੇਅਰ ਕੀਤਾ ਸੀ। ਮੀਮ ਤਿੰਨ ਹਿੱਸਿਆ- ਓਪੀਨੀਅਨ ਪੋਲ, ਐਗਜਿਟ ਪੋਲ ਅਤੇ ਰਿਜਲਟ (ਨਤੀਜੇ) 'ਚ ਵੰਡਿਆ ਸੀ। ਓਪੀਨੀਅਨ ਪੋਲ 'ਚ ਐਸ਼ਵਰਿਆ ਸਲਮਾਨ ਨਾਲ ਨਜ਼ਰ ਆ ਰਹੀ ਸੀ, ਐਗਜਿਟ ਪੋਲ 'ਚ ਵਿਵੇਕ ਓਬਰਾਏ ਨਾਲ ਅਤੇ ਨਤੀਜਿਆਂ 'ਚ ਉਹ ਅਭਿਸ਼ੇਕ ਬੱਚਨ ਅਤੇ ਅਰਾਧਿਆ ਨਾਲ ਨਜ਼ਰ ਆ ਰਹੀ ਸੀ। ਐਸ਼ਵਰਿਆ ਅਤੇ ਉਸ ਦੀ ਬੇਟੀ ਨੂੰ ਮੀਮ 'ਚ ਇਸ ਤਰ੍ਹਾਂ ਨਾਲ ਪ੍ਰਦਰਸ਼ਿਤ ਕਰਨ ਨੂੰ ਲੈ ਕੇ ਓਬਰਾਏ ਨਾ ਸਿਰਫ ਸੋਸ਼ਲ ਮੀਡੀਆ 'ਤੇ ਟਰੋਲ ਹੋਏ, ਸਗੋਂ ਰਾਸ਼ਟਰੀ ਮਹਿਲਾ ਕਮਿਸ਼ਨ ਨੇ ਵੀ ਨੋਟਿਸ ਲੈਂਦੇ ਹੋਏ ਔਰਤ ਅਤੇ ਬੱਚੀ ਦਾ ਅਪਮਾਨ ਮੰਨਦੇ ਹੋਏ ਨੋਟਿਸ ਭੇਜ ਦਿੱਤਾ।