ਮੁੰਬਈ(ਬਿਊਰੋ)— ਬਾਲੀਵੁੱਡ ਅਦਾਕਾਰਾ ਅਨੁਸ਼ਕਾ ਸ਼ਰਮਾ ਤੇ ਇੰਡੀਅਨ ਕ੍ਰਿਕਟ ਟੀਮ ਦੇ ਕੈਪਟਨ ਵਿਰਾਟ ਕੋਹਲੀ ਨੇ ਸੋਮਵਾਰ ਨੂੰ ਇਟਲੀ ਦੇ ਫਲੋਰੈਂਸ ਸ਼ਹਿਰ 'ਚ ਪਰਿਵਾਰ ਤੇ ਕਰੀਬੀਆਂ ਦੀ ਮੌਜੂਦਗੀ 'ਚ ਸੱਤ ਫੇਰੇ ਲਏ। ਇਟਲੀ 'ਚ ਹੋਏ ਇਸ ਗੁੱਪ-ਚੁੱਪ ਵਿਆਹ ਤੋਂ ਬਾਅਦ ਅਨੁਸ਼ਕਾ ਤੇ ਵਿਰਾਟ ਮੁੰਬਈ ਸਥਿਤ ਇਕ ਸੀ-ਫੇਸਿੰਗ ਅਪਾਰਟਮੈਂਟ 'ਚ ਸ਼ਿਫਟ ਹੋ ਜਾਣਗੇ।
ਆਮ ਤੌਰ 'ਤੇ ਅਜਿਹਾ ਹੁੰਦਾ ਹੈ ਕਿ ਵਿਆਹ ਤੋਂ ਬਾਅਦ ਲਾੜੀ ਆਪਣਾ ਘਰ ਛੱਡ ਕੇ ਸਹੁਰੇ ਚਲੀ ਜਾਂਦੀ ਹੈ ਪਰ ਇੱਥੇ ਉਲਟਾ ਹੋਵੇਗਾ, ਕਿਉਂਕਿ ਵਿਰਾਟ ਆਪਣਾ ਦਿੱਲੀ ਸਥਿਤ ਘਰ ਛੱਡ ਕੇ ਹੁਣ ਅਨੁਸ਼ਕਾ ਸ਼ਰਮਾ ਨਾਲ ਰਹਿਣਗੇ।
ਜੋੜੀ ਦੇ ਨਵੇਂ ਘਰ ਦੀ ਜਾਣਕਾਰੀ ਆਰਕੀਟੈਕਚਰਲ ਡਾਈਜੈਸਟ ਨੇ ਦਿੱਤੀ ਹੈ। ਵਿਰਾਟ ਤੇ ਅਨੁਸ਼ਕਾ ਦਾ ਨਵਾਂ ਘਰ ਵਰਲੀ ਦੇ ਓਮਕਾਰ 1973 ਟਾਵਰ 'ਚ ਸਥਿਤ ਹੈ।
29 ਸਾਲਾ ਕ੍ਰਿਕਟਰ ਨੇ 7171 ਵਰਗਫੁੱਟ ਦਾ ਇਹ ਲਗਜ਼ਰੀ ਅਪਾਰਟਮੈਂਟ ਸਾਲ 2016 'ਚ 34 ਕਰੋੜ ਰੁਪਏ 'ਚ ਖਰੀਦਿਆ ਸੀ।
ਇਹ ਆਲੀਸ਼ਾਨ ਘਰ ਸਾਰੀਆਂ ਸਹੂਲਤਾਂ ਨਾਲ ਭਰਪੂਰ ਹੋਵੇਗਾ। ਮੈਗਜ਼ੀਨ ਮੁਤਾਬਕ ਇਸ ਬਿਲਡਿੰਗ 'ਚ ਪਾਲਤੂ ਜਾਨਵਰਾਂ ਲਈ ਸਪਾ, ਫਿਟਨੈੱਸ ਤੇ ਸਪੋਰਟਸ ਨਾਲ ਜੁੜੀਆਂ ਸਹੂਲਤਾਂ ਹੋਣਗੀਆਂ।
ਪਾਰਟੀ ਹੋਸਟ ਕਰਨ ਲਈ ਟੈਰਿਸ ਤੇ ਬੱਚਿਆਂ ਦੇ ਖੇਡਣ ਲਈ ਝੂਲਾ ਘਰ, ਪੂਲ ਤੇ ਪਲੇਅ ਗਰਾਊਂਡ ਹੋਵੇਗਾ। ਅਨੁਸ਼ਕਾ ਫਿਲਹਾਲ ਆਪਣੀ ਫੈਮਿਲੀ ਨਾਲ ਬਦਰੀਨਾਥ ਟਾਵਰਜ਼ 'ਚ ਰਹਿੰਦੀ ਹੈ।
ਵਿਆਹ ਤੋਂ ਬਾਅਦ ਉਹ ਵਿਰਾਟ ਨਾਲ 4 ਬੀ ਐਂਚ ਕੇ ਅਪਾਰਟਮੈਂਟ 'ਚ ਸ਼ਿਫਟ ਹੋ ਜਾਵੇਗੀ। ਉਮੀਦ ਜਤਾਈ ਜਾ ਰਹੀ ਹੈ ਕਿ ਦੱਖਣੀ ਅਫਰੀਕਾ ਟੂਰ ਤੋਂ ਵਾਪਸ ਆਉਣ ਤੋਂ ਬਾਅਦ ਇਹ ਜੋੜਾ ਆਪਣੇ ਨਵੇਂ ਘਰ 'ਚ ਸ਼ਿਫਟ ਹੋ ਜਾਵੇਗਾ।
70 ਫਲੋਰ ਦੇ ਓਮਕਾਰ 1973 ਟਾਵਰ 'ਚ ਵਿਰਾਟ-ਅਨੁਸ਼ਕਾ ਦੇ ਜਾਣ-ਪਛਾਣ ਦੇ ਲੋਕ ਵੀ ਰਹਿਣਗੇ।
ਜੀ ਹਾਂ ਸਾਲ 2013 'ਚ ਇਸੇ ਟਾਵਰ ਦੇ 29ਵੇਂ ਫਲੋਰ 'ਤੇ ਕ੍ਰਿਕਟਰ ਯੁਵਰਾਜ ਸਿੰਘ ਨੇ ਅਪਾਰਟਮੈਂਟ ਖਰੀਦਿਆ ਸੀ। ਉਹ ਆਪਣੀ ਪਤਨੀ ਹੇਜ਼ਲ ਕੀਚ ਨਾਲ ਇੱਥੇ ਰਹਿਣਗੇ।